Aoao e Faalogo ma Malamalama i le Agaga
O se tasi o mea e aupito taua e mafai ona tatou faia o le aoao lea e faalogo ma mulimuli i uunaiga a le Agaga.
Sa soifua ae lo’u tama i le taulaga laitiiti o Monticello, Iuta. Ina ua fitu ona tausaga, o se tasi o ana galuega i aso uma o le tulituli mai lea o povi a le aiga mai le fanua sa tataa ai. O lana meatotino na sili ona faapelepele i ai o lana naifi faamoe, lea sa ia feaveaia i taimi uma lava. O se tasi aso ao tietie atu i lana solofanua e tuli mai povi, sa tago ifo i lana taga mo lana naifi faamoe. Sa matuai te’i o ia ina ua iloa ua leiloa i se mea o le auala. Sa matuai faanoanoa o ia, ae sa talitonu i mea sa aoaoina ai o ia e lona tama ma lona tina: E faafofoga ma tali mai le Atua i tatalo.
Sa ia taofi i lana solofanua ma faasee ese mai i lona papatua i le eleele. O iina sa tootuli ai o ia ma ole atu i le Tama Faalelagi e fesoasoani mai ia te ia e sue lana naifi faamoe. Sa toe oso ae o ia i lana solofanua, liliu, ma toe foi i le auala na ui mai ai. Ina ua tuanai sina vaega mamao o le ala sa tu lana solofanua. Sa oso ese Tama mai le solofanua ma autago i le pefu mafiafia o le auala. O iina, sa tanumia ai i le pefu, na maua ai lana naifi faamoe faapelepele. Sa ia iloaina na faafofoga ma tali mai e le Alii lana tatalo.
Ona sa ia aoao e faalogo ma gaoioi e tusa ai ma musumusuga a le Agaga, sa faamanuiaina ai lo’u tama e vaai i le aao o le Alii i le tele o mea na tutupu i lona olaga. Sa ia molimauina ni vavega se tele. Ae a ia faapotopotoina lona aiga e aoao mai ia i matou le talalelei, sa masani ona ia faamatalaina lona aafiaga i le auala pefu i Monticello, ina ua faafofoga ma tali mai le Alii i le tatalo a se “tamaitiiti foliga taelagoa e fitu tausaga le matua.”
I ni tausaga na mulimuli ane, sa ia faamatalaina mai ai ia i matou sa ia aoaoina se isi mea mai lenei aafiaga a o laitiiti. Sa faaivi lona mata ma fai mai, “Sa ou iloaina ai e mafai e le Atua ona talanoa i solofanua!”
O le aafiaga o lo’u tama a o laitiiti na tuua ai se lagona tumau ia te ia ona o se amataga lea o lona aoaoina patino faaleagaga. O le taimi lea sa ia iloaina ai mo ia lava e faafofoga mai le Atua i talosaga. O le taimi lea sa ia amataina ai, e pei ona ta’ua e le Perofeta o Iosefa Samita, ona iloa le Agaga o le Atua.1
O Le Meaalofa o le Agaga Paia
Sa folafola atu e le Faaola i Ana Aposetolo, a mavae ona Ia tuua i latou, o le a latou fiafia i le meaalofa o le Agaga Paia. Sa Ia fetalai, “A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou” (Ioane 14:26). Sa faataunuuina lenei folafolaga i le aso o le Penetekoso.
E agavaa foi tagata O Le Ekalesia a Iesu Keriso o le Au Paia o Aso e Gata Ai i lenei lava meaalofa. A uma ona papatisoina i tatou, e tuuina mai le meaalofa o le Agaga Paia i o tatou luga i le faaeeina o lima o e ua i ai le pule e fai ai sauniga o le talalelei. O lenei meaalofa o le aia tatau, pe a tatou agavaa mo lea meaalofa, i le mafutaga faifai pea a le sui lona tolu o le Aigaatua.
O le mafutaga a le Agaga Paia o se tasi o faamanuiaga silisili e mafai ona tatou fiafia ai i le olaga nei. Na saunoa Elder Bruce R. McConkie (1915–85) o le Korama a Aposetolo e Toasefululua:
“E ao i alii—ia sili atu i lo mea uma o lenei lalolagi—ona saili mo le taitaiga a le Agaga Paia. E leai se mea e pei lona taua ma le mauaina o le mafutaga ma le Agaga Paia. …
“E leai se tau e sili ona maualuga, leai se galuega e sili ona mamafa, leai se tauiviga e sili ona tuga, leai se osigataulaga e maoae atu, pe afai o ia mea uma tatou te maua ai ma fiafia ai i le meaalofa o le Agaga Paia.”2
Na aoao mai le Perofeta o Iosefa Samita, o le Agaga o le Atua e mafai ona aoaoina ma “o le aoaoina o le Agaga o le Atua ma malamalama i ai, o le a outou ola ai i le mataupu faavae o faaaliga, seia oo ina faaatoatoaina outou ia Iesu Keriso.”3
O se tasi o mea aupito taua e mafai ona tatou faia o le iloa le Agaga o le Atua—aoao e faalogo ma mulimuli i uunaiga a le Agaga. Afai tatou te mananao i ai ma tatou agavaa, o le a aoaoina i tatou e le Alii i le mataupu faavae o faaaliga.
Aoao e Faalogo ma Faatino
Ina ia iloa le Agaga o le Atua, e tatau ona aoao e faalogo ma o tatou loto. Na saunoa Peresitene Boyd K. Packer, Peresitene o le Korama a Aposetolo e Toasefululua: “O le siufofoga o le Agaga o se leo filemu ma le itiiti—o se leo e lagonaina nai lo le faalogoina. O se leo faaleagaga e oo mai i le mafaufau e pei o se mafaufau ua tuu i lou loto.”4
Na aoao mai foi Peresitene Packer: “O musumusuga e faigofie ona oo mai i nofoaga filemu. O upu e pei o le filemu, mālu, toafilemu, Fesoasoani o loo ta’ua soo i tusitusiga paia: ‘Ina soia, ma ia outou iloa o a’u lava o le Atua.’ (Salamo 46:10; ua faaopoopo le faatusilima.) Ma le folafolaga, ‘O le a e maua foi lo’u Agaga, o le Agaga Paia, o le Fesoasoani lea, o lē o le a aoaoina oe i mataupu tau le filemu o le malo.’ (MFF 36:2; ua faaopoopo le faatusilima).”
Sa faaopoopo mai Peresitene Packer: “A o tatou valaaulia lenei fesootaiga, e le mafai lava ona faamalosia! Afai tatou te taumafai e faamalosi, e ono faaseseina ai i tatou.”5
O le mea e aupito sili ona taua i la tatou faagasologa o le aoaoina, o lo tatou tiutetauave o le faatino, e aunoa ma le faatuai, e tusa ai ma le uunaiga faaleagaga tatou te maua. Na saunoa Peresitene Thomas S. Monson: “Tatou te mata’itu. Tatou te faatalitali. Tatou te faalogologo mo lena leo itiiti ma le lemu. A tautala mai, e usiusitai alii ma tamaitai popoto. E le tatau ona tolopoina uunaiga a le Agaga.”6
O le aoao e faalogo ma malamalama i le Agaga o se faagasologa faifaimalie ma faifai pea. Na fetalai le Faaola, “O lē talia foi le malamalama, ma tumau pea i le Atua, e faateleina atu i ai le malamalama; ma e tuputupu pea le pupula o lea malamalama seia oo mai le aso e atoatoa ona lelei” (MFF 50:24). “O lē talia ou te foai atili ai ia te ia” (2 Nifae 28:30).
E pei foi o Keriso “na le maua e ia i le atoatoaga muamua, a e na maua lea amioga mama ma lea amioga mama” (MFF 93:12), o lea foi la, a o tatou tausia Ana poloaiga, o le a tatou “maua lea amioga mama ma lea amioga mama” (MFF 93:20; tagai foi i le Ioane 1:16) ma le “upu ma le upu, o le fuaiupu ma le fuaiupu” (2 Nifae 28:30). O le faagasologa o lo tatou aoaoina e masani lava ona faifaimalie e pei o le totō ifo o le sau mai le lagi (tagai MFF 121:45; 128:19).
Na aoao mai Elder Richard G. Scott o le Korama a Aposetolo e Toasefululua “e leai se isi fuafaatatau faigofie po o se faiga [tatou] te vave maua ai le tomai e taitaiina ai e le leo o le Agaga.” Nai lo lena, “ua faamoemoe mai lo tatou Tama Faalelagi ia [tatou] aoaoina le auala tatou te maua ai lena fesoasoani faalelagi, e ala i le faaaoga o le faatuatua ia te Ia ma Lona Alo, o Iesu Keriso.”
Sa faaauau le saunoaga a Elder Scott: “O se mea atonu na foliga muamua mai o se galuega lofituina, o le a matua faigofie lava ona taulima pe a mavae se taimi, a o e taumafai pea e le aunoa ia iloa ma mulimuli i lagona e uunaia e le Agaga. O lou talitonu maua’i i le taitaiga e te maua mai i le Agaga Paia, o le a malosi atu foi,”ma “o lou talitonu maua’i i uunaiga e te maua, e mafai ona mautinoa atili nai lo lou faalagolago i mea e te vaai pe faalogo foi i ai.”7
O se vaega o le faagasologa o lo tatou a’otauina, o le a fesoasoani ai le Alii ia tatou iloa taunuuga, i o tatou lava olaga ma olaga o isi, o lo tatou tali atu i uunaiga tatou te maua mai le Agaga. O nei aafiaga o le a faamalolosia ai o tatou faatuatua ma tuuina mai ai ia i tatou le lototele sili atu e usitai ai i le lumanai.
O le aoao e faalogo ma malamalama i le Agaga e manaomia ai se taumafaiga tele. Ae ua folafola mai e le Alii o e faamaoni o le a “maua lea faaaliga ma lea faaaliga, o lea poto ma lea poto, ina ia [mafai ona latou] iloa mea lilo atoa ma mataupu tau le filemu—e aumaia le olioli, e aumaia foi le ola faavavau” (MFF 42:61).
Ata na tusia e Greg Newbold
Ata o Polika Iaga na saunia e Dan Weggeland, mai faaaloaloga a le Falemataaga o Talafaasolopito o le Ekalesia