O Mea Faatauvaa ma Faavalea

2011

Fepuari 2011

O Mea Faatauvaa ma Faavalea

“O mea faatauvaa ma mea faavalea ua faataunuuina ai mea tetele” (Alema 37:6).

Aisea e Pese ai?

O le lagiina o viiga e mafai ona valaaulia ai le Agaga ia tatou sauniga o le Ekalesia, i o tatou aiga, ma aso uma o o tatou olaga. Na aoao mai Peresitene J. Reuben Clark Jr. (1871–1961) o le Au Peresitene Sili, “Tatou te latalata atili atu i le Alii e ala i musika nai lo se isi lava mea sei vagana ai le tatalo.”¹

Ua saunia e le Ekalesia se Uepi saite mo le faaaogaina o viiga (e maua i gagana Peretania, Farani, Potukale, ma le Sipaniolo). E aofia ai i le Music.lds.org ni faatonuga mo le taitaiina o musika ma le taina o viiga e faaaoga ai piano feaveai ma o loo i ai foi ni fautuaga mo le filifiliina o viiga talafeagai mo sauniga faamanatuga.

E mafai ona faitauina, sii mai, po o le taina sao mai le Uepi saite ia musika ma fatuga, lea e matua faapitoa lava le aoga mo tagata o le ekalesia e leai se piano po o se piano feaveai.

E mafai ona faaaoga le musika i le aiga faapea foi ma le lotu. Na fautua mai le Au Peresitene Sili: “Aoao a outou fanau ia fiafia i viiga. Pepese ai i le Sapati, i afiafi faale[aiga], i le taimi o aoaoga i tusitusiga paia, ma taimi o talosaga. Pepese ao outou galulue, ao outou taaalo, ma ao outou malaga faatasi.”² O viiga e mafai ona aumaia le agaga o le alofa ma le lotogatasi i totonu o le aiga.

Faamanuiaina Auaunaga Faaleuelefea a le Ekalesia

O loo taumafai le polokalama lauiloa a Le Ekalesia a Iesu Keriso o le Au Paia o Aso e Gata Ai e faaleleia olaga o e le tagolima i le sauniaina o taumafa, vai mama, tausiga o mata, nofoafaataavalevale, tui puipui, ma le tali atu i faalavelave faafuasei. Mai amataga faigofie, ua faalauteleina le polokalama i le aluga o tausaga ina ia fesoasoani i le faitau miliona i le lalolagi atoa.

Faaiuga o le vaitausaga o le 1920: Ua faatulaga faatoaga o le Uelefea. Ua teuina fua o faatoaga i faleteuoloa.

1932: Ua faatuina le uluai fale o meaai tuuapa.

1936: Ua faavaeina le Komiti Aoao o le Uelefea a le Ekalesia. Faatulaga ni risone se sefulufa o le uelefea e faafoeina gaoioiga faaleuelefea i le salafa o le lalolagi.

1936: Faatulaga le uluai nofoaga tutotonu aloaia mo galuega.

1936–1940: Amata galuega faatino gaosi oloa, e aofia ai se ili laupapa, fale gaosi pa’u manu, fale gaosi makaroni, tuuapaina o samani, tuuapaina o le pata pinati, gaosiga o fasimoli, ma le tuufaguina o le susu.

1937: Faatuina le uluai fale teuoloa o le risone i le Aai o Sate Leki.

1938: Amata galuega mo le fausiaina o le Lotoa o le Uelefea, e aofia ai se masini faamama saito ma se fale teuoloa tutotonu.

1938: Tatala le uluai faleoloa a le Deseret Industries mo oloa taugofie i le Aai o Sate Leki.

1940: Mae’a le fausiaina o le Lotoa o le Uelefea.

1945: Auina atu e le Ekalesia i vaa le tele o meaai, lavalava, ma isi sapalai mo tagata o le ekalesia o loo pagatia i Europa i le faaiuga o le Taua Lona II a le Lalolagi.

1960: Mae’a ia fale tuuapa fou ma le fale gaosi susu i le Lotoa o le Uelefea.

1970: Ua faalautele atu galuega faatino faale-uelefea ma le gaosiga o oloa i Mekisiko, Egelani, ma atumotu o le Pasefika.

1973: Ua faatulaga le Auaunaga Faalauaitele a le AAG (lea ua ta’ua nei o le Tautua a le AAG mo Aiga) e avea o se faalapotopotoga aloaia a le Ekalesia.

1976: Amata faalauteleina e le Ekalesia ia faleteuoloa i itu uma o Kanata ma le Iunaite Setete. Ua faalauiloaina foi le faalauteleina o fale tuuapa ma le gaosiga o oloa.

1982: Asiasi atu le peresitene o le I.S. o Ronald Reagan i le Lotoa o le Uelefea.

1985: Amata ona saunia e le Ekalesia vai eli mama i Aferika, ma faailogaina ai le amataga o le faalauteleina i le lalolagi atoa o taumafaiga o auaunaga agaalofa a le Ekalesia.

Vaitausaga o le 1990: Ua faavaeina le Nofoaga Autu mo Auaunaga Agaalofa a le Au Paia o Aso e Gata Ai ina ia faavasega ai lavalava ma isi mea ua tele, e aofia ai sapalai faafomai, mo le auina atu o uta i le lalolagi atoa e tali atu ai i le mativa ma mala.

2002: Ua amata ona tuuina atu e le Auaunaga Lima Foa’i a le AAG nofoa faataavalevale, vai mama, ma galuega faatino mo le faamanavaina o pepe faatoa fananau mai.

2003: Ua faatasi atu le Auaunaga Lima Foa’i a le AAG i polokalama a le lalolagi atoa e faatatau i le misela ma tautino atu le tasi miliona tala I.S. i tausaga taitasi e lagolago ai lenei taumafaiga. E faapena foi, ona amataina se polokalama o togafitiga o mata i le lalolagi atoa.

2010: Ua amata e le Auaunaga Lima Foa’i a le AAG se polokalama o mea taumafa ina ia faateleina ai le gaosiga o meaai ma ia lelei mea taumafa i nisi o atunuu sili ona matitiva i le lalolagi. Ua suatia le eleele mo se Faleteuoloa Tutotonu fou a le Epikopo e 600,000-futu-faatafafa (56,000 m²) i le Aai o Sate Leki.

Ata o le Malumalu o São Paulo Pasila na pueina e Matthew Reier; O Le Samaria Agalelei, Saunia e Joseph Brickey

Agavale mamao (mai luga): tolu ata mai le faaaloaloga a le Matagaluega o le Uelefea a le Ekalesia; ata na pu’eina e Welden C. Andersen; agavale (mai luga): ata na pu’eina e Gerry Avant, Deseret News; ata na pue’ina e Howard M. Collett; ata na pu’eina e © Rosa Pena