Kau mai ni Lalai ki na iTikotiko
O Jisu Karisito na Noqu iVakabula ka Dauveivueti
E rawa ni o vakayagataka na lesoni kei na itaviqaravi oqo mo vulica kina eso tale na ka me baleta na ulutaga ni Lalai ena vula oqo.
“Keimami vakabauta ni na vakabulai na tamata kecega ena isoro nei Karisito, kevaka eda sa muria na ivunau kei na ivakavuvuli ni itukutuku vinaka” (Yavu ni Vakabauta 1:3).
Na cava beka o sa tu vakarau mo solia ena vukuna e dua o dau lomana vakalevu sara? Na noda iVakabula o Jisu Karisito, sa rui lomani keda vakalevu sa solia kina na Nona bula ena vukuda.
Sa kila tu na Tamada Vakalomalagi kevaka eda na ivalavala ca ka caka cala, ena sega ni rawa me da laki bula tale vata kei Koya. O koya sa soli Koya kina na Luvena o Jisu Karisito me noda iVakabula. E digitaki Koya na Tamada Vakalomalagi me vakabulai keda baleta ni o Koya duadua ga e rawa ni bulataka e dua na bula sega ni ivalavala ca.
Sa vakararawataki ko Jisu ka mate me vakabulai keda mai na mate kei na noda ivalavala ca. Na ivalavala ni loloma oqo e vakatokai me Veisorovaki. Ena vuku ni Veisorovaki, sa rawa kina ni da veivutunitaka na noda ivalavala ca, me da vosoti, ka yaco me savasava sara me vakataki Jisu.
A vakoti ki na kauveilatai ko Jisu ka mate, ia ni oti e tolu na siga sa vakaturi cake tale mai na mate ko Koya. A bula tale ko Koya! Ni sa vakaturi cake tale mai na mate, eda na vakaturi cake talega koi keda. Sa kena ibalebale oqo ni na vakaduavatataki me tawamudu na yagoda kei na yaloda.
Sa dina sara, ko Jisu Karisito na noda iVakabula ka Dauveivueti. O Koya na ivakaraitaki e uasivi sara vei keda kece. E vakavulica vei keda o Koya na sala me da dau veirairaici kina ena yalovinaka. E vakavuvulitaka vei keda na ivakarau me da dau veiqaraqaravi kina vakataki keda. E vakavuvulitaka vei keda o Koya na ivakarau me da tamata vinaka cake kina. Ena sega ni rawa vei keda me da bulataka e dua na bula uasivi sara me vakataki Koya, ia e rawa ni da lesu tale ka laki bula vata kei Jisu kei na Tamada Vakalomalagi ena noda talairawarawa ki na ivakarao ka cakava na noda vinaka duadua. Eda na gadreva me da muri Jisu Karisito tiko e veisiga.
iMawi: ivakaraitaki mai vei Paul Mann © 1991 IRI; imatau: ivakaraitaki mai vei Beth M. Whittaker