Eda Tukuni Karisito

Veivutuni, Gole Vua na Turaga, mo Vakabulai

Mai vei David L. Frischknecht

Tabacakacaka ni Lewenivuli

“Raica ko koya sa veivutunitaka na nona ivalavala ca, ena vosoti, ia koi au na Turaga, au na sega ni nanuma tale” (V&V 58:42).

E dua na marama au kilai koya ka itovo vinaka ka yalodina a mavoa bibi ena coqa ni motoka ena dua na gauna lekaleka sa oti. A ramusu talega kina na sarisarina kei na nona suitu. A tiki talega ni nona qaravi vakavuniwai me vakausuusu na domona kei na dakuna me kakua kina ni yavalata rawa. E vutivutia sara toka ga na irairai ni iusuusu oqo. Ia e gadrevi vakalevu. Oqo me na rawa ni laki mavo kina na dakuna kei na domona.

Na veivutuni sa vaka na iusuusu o ya. Ni da ivalavala ca, ena mavoa kina na yaloda, ka sa gadrevi kina na veiqaravi vakalou meda taucoko tale kina. Na veivutuni e vakaraitaka na sala eso me rawa kina vua na iVakabula, ena kaukauwa ni Veisorovaki, me vakabulai keda (raica na 3 Nifai 9:13). Kevaka e vutivutia toka eso na tiki ni veivutuni—me vakataka na iusuusu ena daku e ramusu—sa dodonu ga meda veivutuni.

E vakavulica o Peresitedi Dieter F. Uchtdorf, iKarua ni Daunivakasala ena Mataveiliutaki Taumada: “Na veivutuni dina ena muataki keda lesu ki na veika dodonu meda vakayacora. Ni da sa veivutuni vakaidina eda na liaca ni da sa caka cala ka yalo veivutuni, se rarawa vakalou, ka vakatusa na ivalavala ca kece oqori vua na Kalou. Kevaka e bibi na noda caka cala sa gadrevi meda vakatusa talega vei ira na noda iliuliu vakabete era sa lesi vakakina. Ena gadrevi meda kerea na veivosoti ni Kalou ka da cakava na veika eda rawa ni da vakavinakataka kina na veika e veivakamavoataki eda a cakava beka. Na veivutuni sa kena ibalebale na kena veisautaki na vakasama kei na yalo—eda sa sega tale ni cakava na veika e ca, ka da sa tekivu meda cakava na ka dodonu. Ena solia vei keda e dua na vakanananu vou me baleta na Kalou, kivei keda vakaikeda, kei na bula raraba.”¹

Ni da sa rawata taucoko na gacagaca ni veivutuni, sa qai kauta mai na veivakabulai, vakacegu, kei na bula marau. E vola vakaoqo o Dorothy J. R. White:

Mo raica na wai ni mata sa tuturu e tuba,

Ia mo savata na kena e loma.²

Sa veivakamasuti kina na Turaga ena veigauna, ena loloma, kei na veivakauqeti meda veivutuni, baleta ni gadreva o Koya me vakabulai keda. A vakararawataki na Yagona kei na Yalona me sauma kina na noda ivalavala ca kevaka eda na veivutuni. E tukuna o Koya:

“Raica koi au na Kalou, au sa vosota oti na veika oqo, me ra bula kina ko ira era sa veivutuni;

“Ia kevaka era sa sega ni veivutuni era na vakararawataki me vakataki au;

“Raica koi au na Kalou sa Kaukauwa sara; au a sa sautaninini ena mosi ni veivakararawataki ko ya, au a bunotaka na dra ka sa yaluma sara kina na yagoqu kei na yaloqu—io au sa kerea me kau tani vei au na bilo ni cudru—

“Ia me vakarokorokotaki ga ko Tamaqu, raica au a gunuva na bilo ko ya, ka vakacavara na noqu itavi ena vukudra na luve ni tamata” (V&V 19:16–19).

“Raica au sa vakaroti iko tale oqo mo veivutuni” (V&V 19:16–20).

Meda sa veivutuni sara oqo, gole Vua na Turaga, meda vakabulai.

iVakamacala

1. Dieter F. Uchtdorf, “Gauna ni Lesubula Mai,” Liaona, Me 2007, 100.

2. Dorothy J. R. White, “Repentance,” Ensign, July 1996, 27.

Na cava so na veivakalougatataki ni veivutuni kei na veivosoti?

• Na Yalo Tabu ena vakadeitaka vei keda ni da sa vosoti.

• Ena kauta laivi na Kalou na icolacola ni yaloda sa ivalavala ca.

• Eda na marautaka na veivakauqeti ni Yalo Tabu ena kena cecere duadua.

Me baleta na ikuri ni ivakamacala ni ulutaga oqo, raica na Isikeli 33:15–16; Alama 12:33–34; 36:13, 17–20; kei na vosa nei Boyd K. Packer, “The Brilliant Morning of Forgiveness,” Ensign, Nov. 1995, 18–21.

Na Veivakalougatataki ni Veivutuni

“Na ivalavala ca sai koya na yalo e gadreva me voroka na lawa vakalou. Sai solisoli ni Kalou kivei ira na Luvena na Veisorovaki i Jisu Karisito me rawa ni vakadodonutaka ka bokoca laivi na isau ni ivalavala ca. …

“Na isolisoli ni Veisorovaki i Jisu Karisito sa vakarautaka tu vei keda ena veigauna kei na veivanua kecega na veivakalougatataki ni veivutuni kei na veivosoti.”

Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “Gauna ni Lesubula Mai,” Liaona, Me 2007, 99, 101.

Na Cava e Vakabulai Keda Kina na Veivutuni?

E veivuke kina o Elder Neil L. Andersen ena Kuoramu ni iApositolo Le Tinikarua me sauma na taro oqo mai na nona vosa ena koniferedi raraba “Dou Veivutuni … Meu Vakabulai Kemudou” (Liaona, Nove. 2009, 40–43). E vukei keda vakakina na parofita o Alama meda kila vakavinaka kina na veivutuni kei na Veisorovaki (raica na Alama 42).

1. Ni da veivutuni sa qai mana kina vei keda na Veisorovaki i Karisito ka vakabulai rawa. Na vakararawataki i Karisito e Kecisemani ka vakakina mai Kolikoca sa sorovaki rawa kina na noda ivalavala ca kecega na tamata. Sa rawa Vua ka gadreva sara me vosota na noda ivalavala ca.

2. Ni da caka cala, eda sa vuki tani mai Vua na Kalou. Qo ena mavoa kina na yaloda.

3. Ni da sa veivutuni, eda sa “lesu-kina” Vua na Kalou. Oqo ena vakaotia na noda rarawa. Na veivosoti ena “bokoca tani na noda ivalavala ca” (Alama 24:10) ka kauta mai na “vakacegu [ni yaloda]” (Mosaia 4:3), eda sa vakabulai kina.

Sa rawa mo wasea vua e dua na nomu ivakadinadina ni veivakalougatataki sa yaco mai vei iko baleta ni ko sa veivutuni.

A lesu ena yalomalumalumu na gone cidroi vei tamana ka kaya vua, “I Tamaqu, au sa ivalavala ca ki lomalagi, vei kemuni talega, kau sa sega kina ni yaga meu vakatokai tale me luvemuni” (Luke 15:21). A kidavaki koya o tamana ena marau. Sa vakakina ena kidavaki keda ena marau na Tamada Vakalomalagi ni da sa veivutuni.

Na Lesu nei Gone Cidroi, mai vei James Tissot