Na iNaki ni iSoqosoqo ni Veivukei

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira na marama oqo me yaco na iSoqosoqo ni Veivukei me dua na tiki bulabula ni nomu bula vakai iko.

Vakabauta • Matavuvale • Veivukei

Ena imatai ni gauna a kacivi kina na neitou mataveiliutaki, a soli vei keitou eso na ivola baleta na itukutuku makawa ni iSoqosoqo ni Veivukei. Keitou a vulica ka masulaka sara, ena neitou gadreva me keitou kila na inaki ni iSoqosoqo ni Veivukei kei na veika e gadreva na Turaga me keitou vakayacora. Keitou a vulica ni inaki ni iSoqosoqo ni Veivukei me vaka a tauyavutaka kina na Turaga sai koya me ra vakasoqoni vata, vakavulici, ka vakauqeti ira na Luvena yalewa mera vakarautaki ki na veivakalougatataki ni bula tawamudu.

Ena kena gadrevi me vakavotukanataki na inaki ni iSoqosoqo ni Veivukei, sa solia kina na Turaga na ilesilesi vei ira yadua na marama kei na isoqosoqo raraba mera:

Vakalevutaki ni Vakabauta kei na Bula Savasava Vakayadua

Vaqaqacotaki ni nodra matavuvale kei na itikotiko.

Veivukei ena qaravi ni Turaga kei ira na Luvena.

Sa rawa meda cakava na cakacaka oqo ena sala ni Turaga ena gauna ga eda vakasaqara, ciqoma , ka cakacakataka na ivakatakila soli vei keda yadudua. Ni sega na ivakatakila ki na tamata yadudua, eda na guce. Kevaka meda vakamuria na ivakatakila kivei keda yadudua, eda na sega ni guce. E vakasalataki keda o parofita Nifai ni Yalo Tabu ena vakatakila vei keda “na veika kece [meda] kitaka” (2 Nifai 32:5). Meda soli keda meda dau vakanomodi ka tiko vakamalua meda rogoca rawa kina na domo ni Yalotabu.

Kemuni na taciqu, e tiko na noda itavi bibi meda vakayacora me tarai cake kina na matanitu ni Kalou ka vakavakarau ki na nona lesu mai na Turaga. Io, na cakacaka ni Turaga ena sega ni rawa me vakavotukanataki ke sega kina na nodra veivuke na Luvena yalewa. Ena vuku ni ka oqo, sa namaka tiko na Turaga meda vakalevutaka na noda isolisoli. Sa namaki keda tiko meda vakavotukanataka na inaki ni iSoqosoqo ni Veivukei ena kena vinaka duadua.

Julie B. Beck, peresitedi raraba ni iSoqosoqo ni Veivukei.

Mai na iVolanikalou

Na iVakarua 6:5–7; Luke 10:30–37; Jemesa 1:27; 2 Nifai 25:26; Mosaia 3:12–13

Mai na Keda iTukutuku

Ena dua na soqoni ni iSoqosoqo ni Veivukei ena ika 9 June, 1842, a vakavulica kina o Parofita Josefa Simici vei ira na marama ni nodra isoqosoqo “e sega walega ni baleta mera vukei na dravudravua, ia mera vakabulai na tamata.”¹ Na itukutuku vakayalo o ya ka sa vakayago talega na kena inaki sa mai tuvanaki kina na iSoqosoqo ni Veivukei ena kena itukutuku taucoko ni veigauna. Ena 1906 a vakavulica kina o Peresitedi Joseph F. Smith (1838–1918): “[Na iSoqosoqo ni Veivukei] e sega walega ni veiqaravi vei ira na dravudravua, na tauvimate se vei ira na vakaleqai tu, ka tiko tale eso na itavi e dau vakayacora—me qarava—na veika vakayalo kei na nodra vakabulai na tina kei ira na luvedra mai Saioni; mera raica me kua ni dua e sega ni qaravi, ka mera qarauni ni ra leqa, mai na veika rerevaki, na kaukauwa ni butobuto, kei na veika ca era dau sotava e vuravura.”² Ena 2001a tokarutaka kina vakaoqo o Elder M. Russell Ballard ena Kuoramu ni iApositolo Le Tinikarua, “O ira yadua na marama era lewena na Lotu oqo ka ra sa veiyalayalati oti kei na Turaga sa soli vei ira e dua na ilesilesi vakalou mera vakabulai ira na tamata, mera liutaki ira na marama e vuravura, mera vaqaqacotaka na itikotiko e Saioni, ka mera tara cake na matanitu ni Kalou.”³

iTaba vakadroini mai vei Christina Smith