E Vakamatatataki ena Veituberi ni iVoladusidusi Na Cakacaka ni Veivakabulai

Mai vei Adam C. Olson

Mekasini ni Lotu

Ena veituberi ni veiliutaki e vuravura raraba ena Feperueri ni 2011, eratou a vakasalataka na Mataveiliutaki Taumada kei na Kuoramu ni iApositolo Le Tinikarua vei ira na vakaitavi kina na kena vakayagataki vakavinaka cake sara na ivoladusidusi vou. Na soqoni oqo e talemuria tiko na veituberi ni veiliutaki e vuravura raraba ni Noveba 2010 na gauna a tavoci kina na ivoladusidusi.

Era a vakamatatataka o ira era vosa kina na ivakarau me vakayagataki kina na ivoladusidusi oqo ena sala e veivakauqeti vakayalo, na bibi ni kena kilai vakavinaka na yavu vakaivunau ni ivoladusidusi vou oqo, na sala ni kena vakayagataki na ivakavuvuli ni vakamatautaki ki na parokaramu ni Lotu, na sala ni kena rawa ni vakayagataki na veisau oqo ena ivoladusidusi me vakayacori rawa kina na cakacaka ni veivakabulai, kei na nodra itavi na marama ena matabose.

Era a vakaitavi ena kakaburaki oqo o Peresitedi Henry B. Eyring, iMatai ni Daunivakasala ena Mataveiliutaki Taumada; Elder Russell M. Nelson, Elder Dallin H. Oaks, Elder Richard G. Scott, Elder Robert D. Hales, Elder Jeffrey R. Holland, Elder David A. Bednar, Elder Quentin L. Cook, Elder D. Todd Christofferson, kei Elder Neil L. Andersen ena Kuoramu ni iApositolo Le Tinikarua; o Elder Craig C. Christensen; Elder Bruce D. Porter kei Elder W. Craig Zwick ena Vitusagavulu; kei ira na peresitedi raraba ni veimataisoqosoqo.

Vakayagataki Vakalevu ni iVoladusidusi ena Veivakauqeti Vakayalo

Ena nona vakatoka na soqoni me “ikarua ni madigi oqo me ra kila na ivakarau me ra vakayagataka vakavinaka cake kina na ivoladusidusi,” a vakauqeti ira kina na iliuliu o Peresitedi Eyring me ra vakatorocaketaka na nodra rawa ni ciqoma na ivakatakila.

“Ena veivuke ga ni Yalotabu e rawa ni o kila kina na ivakarau mo vakayagataka kina na veika o wilika ena ivoladusidusi,” a kaya. “… Ena sega beka ni vakaibalebale vei iko mo namaka se vakanuinui ki na kena drodro mai na ivakatakila o gadreva ena nomu veiqaravi ni veisiga. Ena sega ni yaco mai ke sega na vakabauta kei na cakacaka vakaukauwa, ia e rawa.”

A yalataka o Peresitedi Eyring ni gauna era na cakacakataka ka masulaka kina na iliuliu me ra “kila ka muria na vosa ni bula” sa soli vei ira, ena rawa ni vukei ira na Turaga me ra na veiqaravi yani ka veiliutaki ena nodra kaukauwa e levu cake sara.

Yavu Vakaivunau ni iVoladusidusi

“E vakaivunau na ivoladusidusi oqo,” e kaya o Elder Oaks, “ka lekaleka cake mai na ivoladusidusi taumada ena vuku ga ni levu ni ulutaga era sa sega ni veivakaroti tiko se veidusimaki kina. Sa yaco ga, me solia na ivakavuvuli era na rawa ni vakayagataka na iliuliu vakauqeti vakayalo … me veisotari kei na kena ena nodra vanua.”

Rau a vakaroti ira na iliuliu o Elder Bednar kei Elder Christofferson me ra kakua ni kalawaca na itekitekivu ni wase ni iVoladusidusi 2 ka gole sara ki na lawatu era tiko ena wase e tarava. Na itekitekivu ni wase sa vakadavori tu kina na yavu vakaivunau me kilai vakavinaka ka vakayagataki na ivakavuvuli kei na lawatu era tarava mai.

E kaya o Elder Bednar ni kena gadrevi na ivoladusidusi me “yavutaki-vakaivakavuvuli, ka vakamatatataki e vica na kena ivakavakayagataki sa gadrevi kina vei keda kece sara na bula vakayalo kei na cakacaka gugumatua e vinakati kina.”

iVakavuvuli ni Vakamatautaki

“Me baleta na veika ni vunau, veiyalayalati, kei na lawatu eratou sa tauyavutaka oqo na Mataveiliutaki Taumada kei na Le Tinikarua, eda na sega ni gole tani mai na ivoladusidusi,” e kaya o Elder Nelson. “E vakatarai na veisau ena so tale na itaviqaravi me veisotari kei na gagadre ni vanua o ya.”

E kaya o Elder Porter, ni wase 17, “Vakaduavatataki ka Vakamatautaki,” a okati talega me vukei ira na iliuliu ni veivanua me ra muria na Yalotabu ka vakadeitaka na gauna dodonu me ra vakamatautaka na veika eso ena so na parokaramu. E vakamacalataka na wase oqo na veika ena sega ni rawa ni veisautaki ka solia kina e lima na ilalavaki me ra na vakayacori ga kina na veivakamatautaki oqo: na ituvaki ni matavuvale, na leqa ni veilakoyaki kei na veitaratara, na lailai ni kuoramu se kalasi, lewe lailai ni iliuliu, kei na ituvaki ni veitaqomaki.

“Na vakamatautaka na veika eso ena sega ni vakamalumalumutaka na Lotu; era na vaqaqacotaka ga,” e kaya o Elder Porter ena dua na vosa a wilika o Elder W. Craig Zwick ena Vitusagavulu. Ena kena vakayacori na vakamatautaki ni veika eso e vakauqeti vakayalo, me ra kakua ni nanuma na iliuliu ni ra sa vakalolovirataka na kena e dodonu. “Sa soli tu ki na veitabanilotu yadua ni Lotu na vunau, na cakacaka vakalotu, na kaukauwa ni matabete, kei na isolisoli ni Yalotabu sa gadrevi tu ki na nodra vakabulai kei na nodra bula vakalagilagi na luve ni Kalou,” a vola vakaoqo o Elder Porter.

Na Cakacaka ni Veivakabulai

Na veisau sa vakayacori taucoko sara ena iVoladusidusi 2 sa baleta tiko na kena vakatorocaketaki na cakacaka ni veivakabulai. E kaya kina o Peresitedi Eyring: “Ena yaco na ivoladusidusi me nomu iyau ni o vakayagataka me vukei iko ena nomu liutaki ira tale eso me ra digitaka na sala ki na bula tawamudu. Oqori na kena inaki.”

Ena ulutaga “Na Cakacaka ni Veivakabulai ena Tabanalevu kei na iTeki” e kauta vata mai kina na wase 5 e vica na ulutaga era a tu ga vakataki ira e liu, oka kina na cakacaka ni kaulotu, nodra maroroi na saumaki mai, vakabulabulataki, cakacaka ni valetabu kei na tuvakawa, kei na vakavulica na kosipeli.

“E kaya kina o Paula ena, itabagauna oqo ni taucoko ni gauna, ni na vakasoqoni vata mai na ka kecega ka duavata ena Karisito,” e kaya o Elder Bednar (raica na Efeso 1:10). “E dua ga na cakacaka.”

Me kena ivakaraitaki, na veika era nanuma taumada eso ni ilesilesi vakatikitiki ni Lotu era sa “ikoya tikoga na cakacaka o ya ena dua tale na ituvaki,” a kaya. Na cakacaka ni kaulotu sai koya na kena kaburaki na kosipeli ka sureti ira na tamata me ra mai ciqoma na cakacaka tabu vakalotu ka vakayacora na kena veiyalayalati. Vakacokotaki ni Yalododonu—e oka kina na veimaroroi, veivakabulabulataki, kei na veivakavulici—ni sai koya na cakacaka ni nodra sureti mai na tamata me ra mai doka na cakacaka vakalotu kei na veiyalayalati. Na nodra vakabulai o ira na mate ena cakacaka ni tuvakawa kei na valetabu sa madigi tiko me ciqomi kina na cakacaka vakalotu ka vakayacori na veiyalayalati vei ira era sa mate.

E kaya o Elder Holland vakararaba ni veisau oqo ena ivoladusidusi eda na kila kina vakavinaka ni nodra mai lewena tiko na matabose ni tabanalevu o ira na iliuliu ni kuoramu kei na mataisoqosoqo e sega walega me ra na mai veivosakitaki ira ga na nodra lewe ni kuoramu kei na mataisoqosoqo, ia sa tiko na nodra ilesilesi me baleta na nodra bula vakayalo na lewenilotu kece sara.

A veivuke o Elder Cook ena kena vakamatatataki na sala e veivukei kina na veisau eso ni lawatu ena iVoladusidusi 2 ki na cakacaka ni veivakabulai.

A vakamatatataka na bibi ni nodratou veivuke tiko o bisopi kei na matabose ni tabanalevu me baleta na gagadre ni bula raraba ena gauna oqo ka ni sa mai bokoci toka na bose ni welefea. E vakamacalataka na kena sa toso cake na nodra itavi na iliuliu ni Matabete i Melikiseteki me ra vakasalataki ira na lewe ni kuoramu. A vakamatatataka talega na veisau sa mai vakadonui vei ira na tama era se sega ni taucoko na nodra bula kilikili ni valetabu me ra sa na vakaitavi ena cakacaka vakalotu kei na veivakalougatataki ni nodra lewe ni matavuvale ena ituvaki eso.

“Eda sega ni caka bisinisi tiko ni cicivaki ni dua na parokaramu se liutaki tiko ni dua na isoqosoqo,” e kaya o Elder Bednar. “E gadrevi oqori, ia e sega ni veirauti. Oqo na cakacaka ni veivakabulai. Kei na gauna eda tekivu vakasamataka kina na cakacaka vakalotu kei na veiyalayalati, era na qai taroga vakadodonu mai o ira na iliuliu ni matabete, na cava beka na cakacaka vakalotu sa gadrevi dina ena bula ni tamata oqo se matavuvale oqo, kei na sala cava e rawa ni keimami veivuke kina ena kena vakarautaki?”

Marama ena Matabose

E vakaraitaka kina vakabibi o Elder Scott ni so na vanua, era guilecava kina na iliuliu me ra okati ira na marama ena gauna ni veivosaki. “Ena gauna era rawa ni vakauqeti kina na [marama] me ra vakaitavi ena galala ena matabose ni tabanalevu, e dau veivukei ka veivakauqeti vakayalo na nodra nanuma,” a kaya.

Sa rawa vei ira na iliuliu me ra vakauqeta na vakaitavi ena nodra dau cavuta na yacadra na marama ka dau vakavinavinakataka na nodra vakasama kei na vakatutu, e vakamacalataka o Elder Scott.

“Ena yaco mai e dua na veivakalougatataki soli wale ki na nodra itikotiko na iliuliu ni matabete” era vakamuria na idusidusi oqo o ya ni “sa rawa vei ira na turaga oqo me ra vakavinavinakataka cake vakalevu na nodra itavi na watidra ena nodra itikotiko,” a tomana.

A vakavulica o koya na bibi ni lomavata ena kedra maliwa na lewe ni matabose. Ni laurai ni sa tiko na yalo vakaoqo, sa rawa vua e dua na iliuliu me vakaraitaka ka kaciva e dua na veitokoni ena laveliga. Ena so na gauna ena duidui na vakasama, me ra qai vakasaqara na ivakasala na iliuliu mai vei ira yadua na lewe ni matabose ni tabanalevu, vakavinavinakataka na veinanuma sa mai wasei, vakayacora e dua na vakatulewa, ka kerei ira na lewe ni matabose me ra duavata mai ena kena tokoni na lewa sa tau. E vakamatatataka o Elder Scott na bibi ni kena maroroi na veika e veivosakitaki ena matabose ni tabanalevu.

Lewa sa Namaki Tiko

A tinia na veituberi oqo o Elder Nelson ena nona vakamacalataka e tolu na inuinui: ni veika rawarawa ena solia na gauna kei na nodra ivurevure na lewenilotu me na vakayagataki ena kena vinaka duadua e levu cake, ka na tubu cake na kaukauwa ni matabete vei ira yadua na lewe ni matabete me ra na vakalougatataki ira kina na tamata yadua kei na matavuvale yadua ena Lotu, ka me ra na vakila vakalevu cake kina na lewenilotu yadua na yalodina kei na cakacaka vakatisaipeli.

Era na Vakayagataka na Mataveivosaki ni Mataisoqosoqo na Valenivola Vou ni Veituberi

Ena gauna ni veituberi ni veiliutaki e vuravura raraba ni Feperueri 2011, era a vakaitavi ena dua na mataveivosaki o ira na peresitedi raraba ni veimataisoqosoqo ni Lotu ena nodra vakayagataka na ivakaraitaki eso mai na ivurevure vou ni veituberi ena komupiuta.

Na Valenivola ni Veituberi ni Veiliutaki sai koya e dua na itukuni cokovata ni ivakaraitaki dina ni nodra bula na iliuliu era veiqaravi tu e vuravura raraba ka ra matanataka tiko na ivakavuvuli e tiko ena iVoladusidusi 2. A caka na iyaloyalo oqo e Brazil, Igiladi, Guatemala, kei Korea, ka se vakadewataki tiko na vidio oqo ka na qai rawa ni laurai ena komupiuta me na qai vakayagataki ena mua ni 2011.

Ena nodratou vakayagataka na vidio oqo na peresitedi raraba ni veimataisoqosoqo, ena nodratou veidusimaki o Elders Robert D. Hales kei Neil L. Andersen ena Kuoramu ni iApositolo Le Tinikarua kei Elder Craig C. Christensen ena Vitusagavulu, eratou a veivosakitaka kina e tolu na ivakavuvuli bibi era tiko ena iVoladusidusi 2.

1. Vakavakarau Vakayalo

“E veivakurabuitaki na nona dau raica ka waraka tiko na Turaga na sala eso me vakalougatataki keda kina,” e vakamacalataka o Rosemary Wixom, na peresitedi raraba ni Lalai, ni oti na kena saravi na ivakaraitaki ni dua na iliuliu ni iSoqosoqo ni Veivukei mai na Ceva kei Korea ena nona kerea ka ciqoma kina na veivakauqeti vakayalo ena nona vakarautaka e dua na bose.

E kaya kina o Elder Andersen, ni veivosaki vata tiko kei Julie B. Beck, na peresitedi raraba ni iSoqosoqo ni Veivukei, kei Sisita Wixom, ni “Oqo e dua na cakacaka vakayalo; eda na sega ni rawata rawa ke sega kina na veivuke ni Turaga.” Era a veivosakitaka na lewe ni mataveivosaki oqo ni vakavakarau vakayalo ena rawa kina vei ira na iliuliu me ra raica vakatabakidua na tamata yadua, tuvanaki vakadodonu ni itaviqaravi, lesoni, kei na ilesilesi e vukea na nodra gagadre. “Sa vakavolivoliti keda tu na ivakatakila,” e vakadinadinataka oqo o Elder Andersen.

2. Vakaitavi ena Matabose

E dua na kedra italanoa dina na lewe ni matabose ni tabanalevu e Guatemala ena nodra a cakacaka vata era a sureta rawa kina e dua na matavuvale me ratou lesu tale mai ki na itaviqaravi taucoko ni Lotu sa mai solia kina na madigi vei Elder Christensen me liutaka e dua na veivosaki vata kei iratou taucoko na peresitedi e lima ni veimataisoqosoqo: Sisita Beck; Sisita Wixom; Russell T. Osguthorpe, peresitedi raraba ni Matawilivola ni Sigatabu; Elaine S. Dalton, peresitedi raraba ni Goneyalewa; kei David L. Beck, na peresitedi raraba ni Cauravou me baleta na cakacaka vata ena matabose.

Eratou a veivosakitaka ni nodra cakacaka vata na lewe ni matabose ena rawa me vukei ira na lewe ni tabanalevu me ra toro cake kina, ka rawa vei ira na lewe ni matabose gugumatua me ra vakamamadataka na icolacola nei bisopi, kei na sala me ra dau vakarorogo, veiwasei, ka vakasaqara kina na iliuliu kei na lewenilotu na lewa ni Turaga baleti ira na lewenilotu ena tabanalevu.

3. Veiqaravi vei Ira Tale Eso

Na iusutu ni ikatolu ni vidio e vakaraitaki kina e dua na cauravou e Igiladi ka sasaga voli me tudei tiko ena Lotu. A liutaka o Elder Hales na mataveivosaki ka oka tiko kina o Baraca Osguthorpe, Baraca Beck, kei Sisita Dalton, ka ratou raica rawa kina na kena bibi me ra cakacaka vata na iliuliu kei ira na itubutubu, ena gauna ni matabose ena Lotu, vata kei ira na itabagone.

“Kevaka mo ni vakayacora vakadodonu na veika ko ni sa mai raica nikua,” e tomana o Elder Hales, “veiwaseitaka vata [na ivakaraitaki ena vidio] ka veivosakitaka ka vakaraitaka vua na Turaga … ko ni na dusimaki ka vakasalataki ena sala mo ni veivuke ka vaqaqacotaka ka rawata na veika e gadrevi mo ni cakava ena nomuni veikacivi ka sa soli oti vei kemuni.”

Ena cakacaka ni veivakabulai, me ra na raica na iliuliu ni matabete na cakacaka vakalotu e tarava e gadreva e dua na tamata kei na sala me ra veivuke ena kena vakavakarau.

Era kaya na iliuliu ni Lotu ni dodonu me soli na veivakadonui vei ira na turaga kei na marama me ra dau vosa vakatautauvata ena galala me baleta na nodra nanuma ena gauna ni bose ni veiliutaki.

iTaba mai vei Craig Dimond