Vakasama ni Lotu Vakamatavuvale

Na ilavelave oqo era tiko kina na veiitukutuku kei na itaviqaravi ka rawa me vakayagataki ena lotu vakamatavuvale. Oqo e vica na kena ivakaraitaki.

“Dau Nanumi Koya,” tabana e 20: Sa rawa mo dou veivosakitaka vakamatavuvale na ivakasala oqo nei Elder Christofferson ni “Sa rawa meda tekivu ena noda talaraka sobu na veika taucoko ni noda bula ka tuvalaka vou tale ena kedra veitarataravi donu ka me kena iusutu tiko na iVakabula.” Sa rawa me veivosakitaki eso na veivakalougatataki e vakamacalataka tiko o Elder Christofferson ni na dau yaco ni da “dau nanuma na iVakabula.”

“Kaukauwa ni iVolanikalou,” tabana e 52: Ni dou sa wilika oti vata na vosa oqo, sureti iratou na lewe ni matavuvale me ratou wasea na nodratou nanuma me baleta na kena wiliki na ivolanikalou kei na gole ki na semineri. Sureti iratou me ratou vola ena nodratou ivolaniveisiga na nodratou ivakadinadina me baleta na kaukauwa ni ivolanikalou. Vakayaloqaqataki iratou na luvemu me ratou vulica ka cavuqaqataka na ivolanikalou vakarautaki me kilai.

“O Jisu Karisito na Dautataro,” tabana 56: Ni dou sa wilika vata tiko na vosa oqo, sureti iratou na nomu matavuvale me ratou rogoca na bibi ni dua na dautataro. Tarogi iratou se na cava beka ena yaco kevaka me a sega beka ni vukei koya na tamata e dinau tu. Sa rawa talega me wiliki ka veivosakitaki na ivolanikalou e tukuni kina ni sa noda dautataro na iVakabula. E rawa me wiliki talega na 2 Nifai 2:27–28 kei na Alama 42:24–25.

“Sa Vakaisulu Tu Vakavinaka,” tabana e 70: Sa rawa mo sureti iratou na lewe ni matavuvale me ratou suluma e dua na isulusulu se vakatakarakarataka e dua na tamata. Mo qai solia yadua na gauna me ratou vakamacalataki iratou mai. Ni wiliki oti na italanoa, vakamacalataka ni se cava ga na noda dui ilesilesi, eda na luvena tikoga na Kalou.

Gauna Marautaki kei na iSema Tawamudu

Ena gauna ratou se lalai kina na luvequ, eratou taleitaka sara na qito ni oti na lotu vakamatavuvale. E dua na kena eratou dau taleitaka, o “Trunky na Elefaniti,” ka a vakayacani ena dua na sere, a vulica mai koronivuli o Jocelyn na luvei keirau yalewa. Ni keitou sa lagata oti na sere, sa Trunky sara oi au ka me ratou qai vodo e dakuqu na luvequ. Ena kaba e liu, o Jorge, na luvequ tagane yabaki rua; tarava, o Jocelyn, na luvequ yalewa yabaki va; ka tarava sara o Elizabeth, na watiqu. Ni ratou sa kaba toka e dakuqu, au qai dau vakavodoki iratou wavoki ena loma ni vale. Oqo e dua na gauna marautaki vei keitou.

Ni oti e vica na yabaki, rau sa waraka tiko kina na luvequ oqo na nodrau veikacivi ni kaulotu. Ena dua na lotu vakamatavuvale, rau a nanumi “Trunky na Elefaniti” kina. Keitou a lagata vata na sere, ia ni mai oti oqo e vuqa na yabaki, au sa baci elefaniti tale. E kaba e liu e dakuqu o luvequ tagane, tarava o luvequ yalewa, ka murimuri sara o tinadrau. Ni oti au sa mai dalasai tu ena vuloa, ka keitou veidredrevaki yani.

Na vakanananu ni gauna o ya e vakavuna me keitou vakavinavinaka kina ni ra sa vakavulica vei keda o ira na parofita na veika e baleta na lotu vakamatavuvale. Keitou sa vulica se cava sara beka na kena vakayacori tu ga vakarawarawa na neitou lotu vakamatavuvale, na ka bibi duadua ga o ya na neitou gauna ni marau vata kei na neitou matavuvale, na gauna e vaqaqacotaki kina na neitou isema tawamudu.

Víctor G. Chauca Rivera