Mai na Veiyasai Vuravura

Na Lotu sa Ciqoma Tiko na Kerecuru ki na iKa Ciwa ni Veisisivi Droni ni Vuravura

Sa na biuta tiko na Church History Museum na fomu ni kerecuru me baleta na iKa Ciwa ni Veisisivi Droini e Vuravura ena komupiuta ena ika 4 ni Epereli, 2011. Na kerecuru ki na veisisivi oqo e dodonu me na vakau yani ena komupiuta se ena posi ni bera na ika 7 ni Okotova, 2011. Na itoko ni veisisivi oqo na “Tukuna Yani na Nona Cakacaka e Veivakurabuitaki” (V&V 65:4). Me baleta na ikuri ni ivakamacala Vakavalagi se mo raica na droini digitaki eso mai na veisisivi sa oti, raica ena lds.org/churchhistory/museum/competition.

Era sa Mai Matanataki Oqo na iTalanoa Mai na Veiyalayalati Vou

Me veitokoni ki na lewenivuli ni Veiyalayalati Vou 2011, era sa mai dramataki vakatamata na vidio ni ivola ni iTalanoa mai na Veiyalayalati Vou ena kena vakayagataki e dua na gacagaca e vakatokai na paraleki (parallax). Era sa vakarautaki tu na 65 na vidio oqo ena Vakavalagi ka rogoci talega ena MP3 na vidio yadua oqo ena vosa e 11ena LDS.org. Na vidio paraleki oqo ena vakarautaki ena veivosa yadua ena loma ni 2011. Raica na vidio oqo ena scripturestories.lds.org ka digitaka na New Testament Stories.

Era Yalodinataka na iTavi Vua na Kalou na Cauravou e Bangalore

Era a soqoni vata yani e sivia na 30 na cauravou mai na Tikina o Bangalore e Idia ki na veidelana mai Kanakapura me ra laki vulica kina na parokaramu vou ni iTavi Vua na Kalou ka vulica na lesoni vakayalo mai na itaviqaravi vakayago era bolei kina. Era a vakayagataka na cauravou oqo e dua na dali kei na idre me ra takosova rawa kina e dua na tobu. Era a cici ena mataka lailai, cabeta e dua na ulunivanua, ka vulica na tukuci sobu ena dali. A tini na itaviqaravi oqo ena dua na soqoni ni soli ivakadinadina.

Sarava ka rogoca na kena vakamatanataki na italanoa totoka mai na Veiyalayalati Vou ena kena dui roka talei kei na ivakamacala ena scripturestories.lds.org.