Ena iTukutuku

Tauyavutaka o Elder Perry na iSevu ni iTeki e Guam

A gole ki Guam o Elder L. Tom Perry ena Kuoramu ni iApositolo Le Tinikarua ena Tiseba 2010 me laki tauyavutaka na iTeki o Barrigada Guam, na isevu ni iteki ena vanua o Guam. E kea, a sikova talega kina o Elder Perry, ka a lewena tu na Mataivalu i Amerika ena gauna ni iKarua ni iValu Levu na Pacific War Museum kei na yanuyanu veiwekani o Saipan. E rauta ni 1,971 na lewe ni Lotu era tiko e Guam. Na vanua o Guam e wili tiko ki na iWasewase ni Vualiku kei Esia ena Lotu.

Era Qaravi Coka Dra na Vuniwai ni LDS e Papua New Guinea

Eso na vuniwai ni LDS mai Ositerelia era a laki qaravi ira na tauvi coka dra ena veikorokoro ena loma ni ra-ni-vualiku kei Papua New Guinea ena mua ni 2010.

Era a qarava rawa o iratou na vuniwai oqo e sivia na drau na tauvimate, ka vakabula rawa e dua na turaga sa voleka sara tu ga ni mate ni sa yaco yani ki valenibula ka vakakina o ira era sa dodonu me ra mate ena loma ni 24 na auwa ke ra a sega ni qaravi vakavuniwai.

Era kuitaki yani na tamata ena loma ni vanua kei na bavelo e wai me ra gole vei iratou na vuniwai. Erau kaya o David Williams mai Brisbane kei Anthony Mahler mai Cairns ni loma ga ni dua na siga ni nodratou yaco yani ki na koro o Sogere, eratou a qarava rawa kina e sivia na 200 na tauvi coka dra. Me baleta na veika kece sa mai yaco oqo, e kaya kina o Dr. Mahler, “Sa qai dua na noqu cakacaka [oqo] meu bau rawata vakavinaka sara ena noqu bula,” e dina ga ni levu sara na kena dredre ka bibi na cakacaka.

Me ikuri ni nodratou vakau yani na vuniwai oqo, a vakarautaka talega na Lotu na iyau ni veivuke, oka kina na iyaya ni veiqaravi vakavuniwai kei na gacagaca ni vakasavasavataki ni wai. A vakauta talega yani na Lotu e Port Moresby ena waqa na kakana kei na sovu ki na vanua e bibi kina na mate oqo, ka vakau yani ena waqa mai Port Moresby kei Brisbane na pakete ni vakasavasavataki ni yago. Rau gole talega yani ki Papua New Guinea e dua na veiwatini daukaulotu ka rau kenadau ni vakasavasavataki ni wai me rau laki veivuke ena cakacaka ni veivueti oqo.

Vakaraitaki ena DVD na iToko Ni Muavata ni 2011

Ena Janueri, sa tekivutaka kina na Lotu na kena veikauyaka yani na DVD ni iSakisaki ni iTabagone 2011, We Believe, ki na veitabanilotu ena Lotu e vuravura taucoko me vakayagataki me tokoni kina na itoko ni Muavata 2011.

Era vakaraitaki tiko ena DVD oqo na veivakasama eso me ra vukei kina na itabagone me ra vakayacora rawa na itoko, Yavu ni Vakabauta 1:13, me iusutu ni nodra bula. Ena vakaraitaki talega mai kina o Peresitedi Thomas S. Monson, o irau na peresitedi raraba ni Cauravou kei na Goneyalewa, na sere, nodra ivakadinadina na itabagone, kei na vuqa tale.

Ena vuqa sara tiko na nodra ivakadinadina na itabagone kei na veika era sotava e veivakauqeti.

Sa rawa me ra vakayagataki na sere, itukutuku, kei na ivakadinadina me vakabulabulataka na kalasi ni itabagone, soqoni, kei na itaviqaravi ena loma ni yabaki.

Na itukutuku kece oqo sa vakarautaki tu ena komupiuta mo ni lavetaka mai ena youth.lds.org.

Sa vakadewataki tale tu ga na DVD oqo ena vosa: Vaka-Jaina, Valagi, Varanise, Jamani, Itali, Japani, Korea, Potukali, Rusia, kei na Sipeni.