Digidigi nei Niya
A qito tiko e mata ni nodra tou vale o Niya ena nona kacivi koya yani ki loma na nona nei. “Niya, e rawa ni o lako mada ki na sitoa ka volia mai eso na kareti me ivakayakavi?” e kerea na nona nei.
“Io!” e sauma yani ena marau ko Niya. E dau taleitaka na lako ki na sitoa, ka dau taleitaka me vukei nona nei.
A taura ko Niya na ilavo e solia vua na nona nei ka taubale sobu yani e gaunisala ki na sitoa e voleka vei iratou.
“Au vinakata meu volia eso na kareti me ivakayakavi,” e kaya ko Niya vua na itaukei ni sitoa.
E biuta na itaukei ni sitoa na kareti ena kato nei Niya ka tukuna vua na kena isau. A solia vua ko Niya na ilavo.
“Oqo na nomu veisau,” e kaya na itaukei ni sitoa ni solia lesu yani vua eso na ilavo.
A vakavinavinaka vua ko Niya ka tekivu taubale yani ki vale. Ni taubale tiko, a raica na ilavo e solia mai vua na itaukei ni sitoa. “Sa rui sivia na veisau e solia mai ko koya,” e vakasamataka. “Io sa na noqu na ilavo oqo!”
Ia a qai tu vakadua o Niya. “Ena sega ni marautaki au na Tamada Vakalomalagi kevaka au maroroya na ilavo oqo,” e vakasamataka. “Meu dau dina ena noqu vosa kei na ivalavala.”
A vuki lesu ko Niya ka lesu ki na sitoa. “Sa rui sivia na ilavo o vakasuka mai vei au,” e tukuna vua na itaukei ni sitoa ni vakasuka vua na ilavo ka soli sivia mai.
E taura na itaukei na sitoa na ilavo. “O iko e dua na goneyalewa vinaka,” e kaya. Qai biuta eso na apolo ena dua na taga ka solia vei Niya. “Vinaka vakalevu na yalo dina. Yalovinaka kauta na apolo oqo ka laki kania vata kei iratou na nomu matavuvale.”
E raragi na yaloi Niya ka mamarau ena nona taubale lesu ki vale. E kila ni marau na Tamada Vakalomalagi ena nona digitaka me dina.
iVakaraitaki mai vei Louise Parker