Me Yacova ni da Qai Sota Tale
iSala Vakavotona, iSala ni Qaqa
Vei au na isala wavakavotona sa yaco me ivakatakarakara ni Nona kila tu na iVakabula na noda mosi kece e sega tu ni rairai—kei na Nona rawata me vakabula.
Okosita ena Vanua Tabu. E buwawa ena katakata ni sigalevu na icaca kei Kapenaumi. E dua na vanua vakasakiti me da tu kina, erau a vakasosa voli na neitou dauveivakasarasarataki kei na dua na sikada, ka tekivu me ciri yawa na noqu vakasama.
E vakasauri na noqu kida mai ena nona dusia e dua na vunikau ka vakaruguti keitou tu na dauveivakasarasarataki ka kaya, “Era dau vakatoka me vuni ‘isala wavakavotona.’” Au raica cake na veitabana ka so bi tu ena drauna. Sa evei na votona? Au dolele yani ka dreta mai vakavoleka e dua na tabana lailai.
Oya, ena maliwa ni drauna totoka, au raica kina na votona. Era lalai ka drokadroka, ka momoto sara vakaca ka vaka na noqu idovi ni kakana na kena babalavu, era na sega ni laurai rawa ke vica na fute na vanua eda tu yani kina. Ia kevaka e dua e tara na veitabana so bi tu ena drauna oya ena vakila dina na kena mosi.
Au vakasamataka na levu ni droini au sa raica oti me baleta na iVakabula ni tucake tu e matadra na mataveilewai dauveivakalialiai, ka vakaicurcuru balavu lokaloka qai daramaka tu e dua na isala tali ena wavakavotona madu. E votu vakasauri vei au ni o koya na bobula se sotia e cakava na isala oya ena vinaka cake beka vua me talia mai na veitabana e se drokadroka tu me vaka ena vunikau oqo—ka sega mai na veitabana madu ka wadokau. E rawa ni da kila, ni naki ni isala oya sega walega me vakavuna na mosi ia me vakavuna na cudru ka veivakalialiai.
Ena vuravura makawa na isala tali ena draunikau se tobe wavoki—vakavuqa ena lareli drokadroka ka boi vinaka—e vakavuqa ni dau soli vei ira na qaqa ena veisisivi se ena ivalu. Na drau ni lareli tobe wavoki e vakatakarakataki kina na tui kei na iliuliu. De rairai na isala ca so bi ena draunikau drokadroka ka tabalaki sobu ki na vacu ni matana na iVakabula e ivakananumi veidabui ni itovo makawa ni veidokai oya. Oqo na vakasama walega, e sega ni ka vakaivunau. Ia vei au, na noqu raica vakaoqori e vakavotuya mamaca mai e dua na vakasama ni Veisorovaki: na iVakabula sa kila vakavinaka tu na noda rarawa, ka sa rawa Vua me vakabulai keda.
Na icurucuru balavu ka vakadarami Vua sa ivakatakarakara ni turaga. E tabonaka na bobota kei na imawe ni veivakanakuitataki ka se qai sotava mai. Ena sala vata ga, na isala draunikau vakavotona ena vaka na nona isalusalu e dua na qaqa ia me vunia tu na mosi e vakavurea.
E vuqa vei keda eda colata tu na mosi sega ni rairai. E vakavuvulitaka na serenilotu ni “lomaqu sa tu kina veika e tawa kilai” (“Turaga Meu na Muri Kemuni,” Serenilotu, naba 129). Ia na iVakabula e raica. Sa kila vakavinaka tu o Koya na yaluma ni tamata yadua. A bula ena nona gauna taucoko ni veiqaravi ka vakanamata tiko ki na Veisorovaki kei na Vakaturi Cake tale. Ia o ira e a vakavulica ka vakalougatataka ka vakabula era a sega ni kila. O ira sara mada ga na Nona tisaipeli era a sega ga ni kila.
Na iVakabula e raibaleta na “icurucuru balavu” kei na “isala” ka tabonaka na noda rarawa mai vei ira na tani. Ni sa sotava oti “na mosi kei na veivakararawataki kei na veitemaki ena kena veimataqali kecega,” Sa sinai tu ko Koya ena loloma veivueti ka kila na ivakarau me taqomaki keda kina ni da sa biuta na noda icolacola e Yavana (raica na Alama 7:11–12). E nona na ilumu ka na rawa ni vakabula na mavoa titobu ka vunitaki tu. Kei na isala sa solia tu mai vei keda e nodra dina na qaqa.
Na iVunau mai na Ulunivanua, mai vei Carl Heinrich Bloch, vakayagataki ena veivakadonui ni National Historic Museum mai Frederiksborg e Hillerød, Denmark, me kakua ni lavetaki