Na Ka Eda Vakabauta

Sa Sorovaka o Jisu Karisito na Noda iValavala Ca

E dua vei ira na inaki eda mai tiko kina ena vuravura oqo o ya meda vulica na talairawarawa ki na ivakaro ni Kalou. Vakavo ga o Jisu Karisito, a bulataka e dua na bula savasava sara, ni ra sa ivalavala ca kece o ira era bula ena vuravura oqo (raica na Roma 3:23; 1 Joni 1:8). Na ivalavala ca o ya ni da voroka kina na ivakaro ni Kalou, ni ivalavala ca kecega sa tiko kina na kedra itotogi. Ni da ivalavala ca, sa tau kina na lewa meda sotava na kena itotogi (raica na Alama 42:16–22).

Sa qai yaco, na isau ni ivalavala ca kecega me tawasei na tamata mai vua na Kalou (raica na 1 Nifai 10:21). Sa qai ka rarawa dina na tawase oqo ni sa sega ni rawa meda vakavinakataka rawa vakai keda.

Ena kena gadrevi meda valuta rawa na tawase oqo, sa vakarautaka kina na Tamada Vakalomalagi e dua na sala vua na Luvena e Duabau Ga, o Jisu Karisito, me na vakataqara Vua na icolacola ni noda ivalavala ca, me sa qai rawa kina meda vakasavasavataki vakayalo ka duavata tale kei Koya. Oqo na ituvatuva ni loloma veivueti.

E vakavulica na iVakabula, “Raica koi au na Kalou, au sa vosota oti na veika oqo, mera bula kina ko ira sa veivutuni; ia kevaka era sa sega ni veivutuni, era na vakararawataki me vakataki au” (V&V 19:16–17).

Me tiki ni Nona Veisorovaki, a sotava na rarawa o Jisu ena vuku ni noda ivalavala ca ena Were o Kecisemani kei na kauveilatai e Kalivari. Ni da veivutunitaka na noda ivalavala ca, eda na kauta mai na kaukauwa ni Nona Veisorovaki ki na noda bula.

E kaya kina o Jisu Karisito ka a solibula me sorovaka na noda ivalavala ca:

“Dou lako mai vei au, koi kemudou vakaaduaga sa oca ka colata na icolacola bibi, ia kau na vakacegui kemudou.

“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.

“Ni sa rawarawa na noqu ivua, ka mamada na noqu icolacola” (Maciu 11:28–30).

Na Veisorovaki e vakarautaka talega na veivakalougatataki oqo:

1. Era na tucake tale mai na mate o ira era sucu ena vuravura oqo (raica na Alama 11:42–45).

2. Era na bula tawamudu vata kei na Kalou o ira kece na gonelalai era mate ni bera ni ra yacova na yabaki walu na yabaki ni kilai yalona (raica na Mosaia 3:16; 15:24–25; Moronai 8:8–12).

3. Na gugumatua meda yalo vakacegu tiko ena gauna ni veivakatovolei baleta ni sa mai vakataqara Vua o Jisu na noda rarawa kei na mate dauveitauvi (raica na Joni 14:27; Alama 7:11–12).

4. Na nodra saumi o ira na tamata ivalavala dodonu baleta na ivalavala ca ni bula oqo (raica na Vunautaka na Noqu Kosipeli [2004], 57).

Me baleta na ikuri ni ivakamacala, raica na iVakavuvuli Talei (2009), 59–66; kei na Tudei ena Vakabauta (2004), 14–20.

“Raica au sa lako mai me rawa na bula vei ira na kai vuravura, io meu vakabulai ira mai na nodra ivalavala ca.

“Ia, ko koya yadua sa veivutuni ka lako mai vei au me vaka e dua na gone lailai, au na vakabulai koya ni sa vakaoqo ko ira na lewe ni matanitu ni Kalou. Raica, sa i ira oqo kau sa solia kina na noqu bula ka taura lesu tale; io mo dou veivutuni oi kemudou kecega na kai vuravura ka lako mai vei au, mo dou bula kina” (3 Nifai 9:21–22).

“Sai Jisu Karisito, na Luvena Duabau na Kalou sai koya duaduaga e bula e vuravura oqo sa sega ni ivalavala ca rawa, ka sai koya duadua ga sa rawa me vakayacora na veisorovaki ena vuku ni kawa tamata” (Bible Dictionary, “Atonement”).

I Tamaqu, mai vei Simon Dewey; Rairai o Jisu e Amerika, mai vei John Scott © IRI; itaba vakadroini ni gone © Getty Images; na itaba vakadroini tale eso mai vei Christina Smith