E Tawamudu na Veiyalayalati

Mai vei Marta Valencia Vásquez

Ni yaco mai ena lewa au sa tauca me tiki ni veiyalayalati au sa vakayacora kei na Tamaqu Vakalomalagi dau loloma, veitalia na ka e tukuna o vuravura.

Niu yabaki tini vakacaca, a solia na neitou peresitedi ni Goneyalewa vei keimami yadua na goneyalewa e yadua na iloloma: e dua na iyaloyalo ni valetabu. A vosa vei keimami me baleta na veiyalayalati kei na bulataki ni bula savasava. Sa qai vakauqeti keimami me keimami biuta e dua na takete me keimami lako ki na valetabu ena dua na siga.

Au a tugana ki yaloqu na nona ivakasala na marama oqo kau nanuma meu sa vakaliuca na noqu vakavakarau. E se bera ni dua na valetabu e Costa Rica ena gauna ko ya, ia au sa kila mai na noqu se qai papitaiso walega na cava na veiyalayalati, kau sa nanamaki kina meu cakava eso tale na ikuri ni veiyalayalati kei na Turaga.

E sega tale ni dua ena neitou matavuvale e lewena na Lotu ena gauna oya, o koya a sega kina ni vakavuvulitaki e neitou vale na kosipeli. Au sa mani lewa ga ni rawa niu vulica ga vakataki au na ivakatagedegede vakosipeli ka bulataka. E okati ena noqu vakavakarau na lakovi ni semineri, e dina ga ni dau vakayacori sara vakamataka lailai. E okati kina na sega ni veigadivi me yacova niu sa yabaki 16. Ka kena ibalebale na bulataki ni lawa ni bula savasava—e dua na ka e sega ni matau se ivakarau ni bula vei ira na noqu itaba, ia e dua na ka au kila ni rawa niu cakava baleta niu sa veiyalayalatitaka kei na Turaga meu vakayacora vakakina.

Na vulici ni ivolanikalou, ena semineri ka vakakina o au vakataki au, sa vaqaqacotaka na noqu yalayala meu bulataka e dua na bula savasava. Au nanuma na noqu a vakauqeti mai vei ira na 2,000 na cauravou yaloqaqa. Me vaka e tukuni ena Alama 53:20–21, o ira na cauravou oqo “era bulabula kece ka yaloqaqa, io era sa icegu bula ka kaukauwa vinaka tu; me kena ikuri, era sa vakayacora ena yalodina na veika kece sa nuitaki vei ira. … Era sa tamata dina sara ka yalomatua, era sa vakavulici me ra muria tikoga na vunau ni Kalou ka caka dodonu e matana.” O au talega au vinakata meu vakayacora ena yalodina na veika kece e nuitaki vei au, okati kina na noqu veiyalayalati ni papitaiso.

A yaco mai na ikuri ni kila ka me baleta na veiyalayalati ena gauna au kacivi kina meu laki veiqaravi ena Tabana ni Kaulotu na El Salvador San Salvador East. Niu ciqoma na noqu edaumeni ena valetabu, a votu mai ki na noqu vakasama na Vunau kei na Veiyalayalati 82:10: “Koi Au, na Turaga, au na vakayacora na noqu yalayala kevaka dou sa muria na noqu ivakaro; ia kevaka dou sa sega ni muria na noqu ivakaro, dou na sega ni rawata na ka sa yalataki.” Ena noqu gauna ni kaulotu, na vakasama oya ni veiyalayalati—me da cakava na noda itavi ka cakava na Turaga na Nona—sa dau vakauqeti au meu cakava na noqu vinaka duadua. Niu vakayacora vakakina, keirau a vakalougatataki ena neirau cakacaka kei na noqu itokani.

Au a kaulotu ena vuqa na yabaki sa oti, ia au sa dau kunea tiko ga na kaukauwa ena noqu rokova tiko na noqu veiyalayalati. Au sa vakalougatataki kina me tekivu mai na gauna oya ena noqu veiqaravi me vitu na yabaki ena Valetabu na San José Costa Rica. Na noqu veiqaravi vakaliganicakacaka ena valetabu sa dau solia vei au na madigi ena veigauna eso meu nanuma na veiyalayalati au sa cakava. Au sa dau sotava talega na veivakananumi vata oqori ena noqu veiqaravi ena isoqosoqo ni Goneyalewa, kau sa dau tovolea kina meu vakavulica na bibi ni veiyalayalati me vaka ga era a vakavulica vei au na noqu iliuliu

E sega ni dau rawarawa na noda rokova na noda veiyalayalati. Taura mada vaqo, eso na tamata era raica na lawa ni bula savasava (se, ena so na gauna, na itovo vakalotu raraba) ni sa madra. E kalougata, niu sega ni dau yavalati mai vei ira era sega ni duavata kei na noqu vakabauta se mai na balavu ni gauna. Au dau raica lesu na veika au a vakila ena noqu gauna ni goneyalewa ena nona vakayaloqaqataki keimami na neimami iliuliu me keimami vakavakarau ka bula me baleta na veiyalayalati ni valetabu. Na lewa au a vakatauca ena gauna ko ya sai koya au muria tiko me yacova mai nikua.

E rawa niu tudei ena noqu lewa baleta ni lewa oqori au sega ni a vakatauca ga vakataki au, me baleti au. Ia, na lewa au a cakava e tiki ni veiyalayalati kei na Tamada Vakalomalagi dauloloma. Veitalia na ka ena tukuna ko vuravura. Au sa yalataka vua na Turaga niu na talairawarawa ki na nona ivakaro. E ka ni veidokai. Na veiyalayalati au cakava ena gauna ni papitaiso kei na veiyalayalati au cakava ena valetabu era se vakabau sara tu ga ena gauna oqo me vaka ena siga au a cakava kina. Na veiyalayalati kei na Kalou e tawamudu.

Na bula ena ivakarau e kerea vei keda na Kalou me da bula kina e sega ni dau rawarawa tu ga, ia au vakadinadinataka ni rawa. Eda na rawata na yalodei kei na kaukauwa ena noda bulataka na noda veiyalayalati, ka rawa ni da vakadeitaka ni na sega ni biuti keda duadua tu na Tamada Vakalomalagi. Ni to vata tiko kei keda o Koya, eda na rawa ni cakava na ka kecega (raica na Moronai 7:33).

Me iSakisaki ni iSausauvou

“E dua ga na noqu taro: Ko ni na muri ira beka na parofita dina ka bula se sega? E sega tale ni dredre cake. Na ivakatagedegede ni Lotu me baleta na bula savasava sa tuvalaki tu vakamatata ena ivolalailai ni ‘Me iSakisaki ni iTabagone,’ ko ni se kila vinaka sara tu ga, e dina ga ni vuqa vei kemuni o ni sa sega tale ni tiko ena Cauravou kei na Goneyalewa. Kevaka o digitaka mo wilika e dua na ka e tu kina na veika e veisaqasaqa kei na ivakatagedegede ni bula savasava ena Lotu, o sa biuti iko tiko kei na nomu yalomatua ena dela ni nodra ivakasala na parofita ni Kalou—e dua na ivalavala ka sega dina kina na yalomatua. Ena gauna ga era sa nanuma kina na tamata ni levu cake na ka era kila mai vua na Kalou se na nona vosa, se ni sega ni baleti ira na ivakasala e soli mai, era sa kalawa yani ki na dua na delana titidara ka vuqa sara na tamata era sa sikalutu oti kina. E ka ni vakabauta—na vakabauta dina, sega ni cala ka sega ni veivukiyaki—me ciqoma ka segata me bulataka na ivakasala vakaparofita kevaka sara mada ga o sega ni kila taucoko vakavinaka. Na vakabauta rawarawa vakaoqori e tu kina na kaukauwa me tuberi iko ka taqomaki iko ena veidredre kece o sotava ena nomu bula.”

Elder M. Russell Ballard ena Kuoramu ni iApositolo Le Tinikarua, “When Shall These Things Be?” ena Brigham Young University 1995–96 Speeches (1996), 189.

Na veiyalayalati au cakava ena papitaiso kei na veiyalayalati au cakava ena valetabu era se vakabau tiko oqo me vaka ena siga au a cakava kina.

iVakaraitaki mai vei Scott Greer