Sa Qai Vakarorogo
Au tukuna vei au. “O koya e dua na itokani makawa, e sega ni veigadivi oqo,” Na cava beka e vakasalataki au tiko kina na Yalotabu meu kakua ni tiko mai kea?
Niu tiko ena koliji, au a vakalougatataki meu laki vakatovotovo ena dua na siti vakayawa sara. E tiko voleka e kea e dua na noqu itokani makawa, e dina ni sega ni tautauvata na neirau vakabauta, e sega ni tarova na neirau veitokani na duidui oqo.
Ena imatai ni gauna au sotavi Madeline (sa veisau na yaca), keirau a cakacaka ruarua tiko vata kei na dua na goneyalewa ka dau ivakaraitaki cecere ni dua na Yalododonu Edaidai. Au nanuma na nona dau dusia na Yalotabu na duidui lalai vei ira na goneyalewa yadua, ka vakamacalataka na sala e rawa ni laki vakavotukana kina ena noda bula mai muri na veidigidigi lalai sara mada ga. Au dau nanuma tu na veivakauqeti vakayalo oqo ena veiyabaki.
Ia ni keirau qai mai sota tale ni sa oti e vica na yabaki, keirau nakita kei Madeline me keirau na sota ena dua na gauna. Ni yaco mai na yakavi ko ya, e vakurabui ni vaka meu masa. Au vodo sitimanivanua ki na nona siti, ia niu voleka yani, e tukuna mai e dua na domo ena noqu vakasama kei na yaloqu, “E dodonu mo veigadivi ga kei ira na tamata e tautauvata na nomu ivakatagedegede.”
“E sega ni veigadivi oqo,” au vakasamataka. “Keirau mai sota ga kei na dua na itokani makawa.” E vakaruataka tale mai na Yalotabu na ivakasala ni qaqarauni, ka biliga tiko me yacova niu sa qai kila ni veigadivi dina oqo ka sa tekivu meu vakataroga na nona ivakatagedegede ena gauna oqo na noqu itokani kei na ivakarau ni nona bula. “E kila o koya niu YDE,” Au via vakadonui au. “E kila tu o koya na noqu ivakatagedegede, ka na sega ni dua na leqa.”
Au sa tekivu vakataroga se sa duidui vakalevu sara beka na neirau sala ena vuku ni “duidui lalai” au dau raica e liu. Au sa muria kina na vakasolokakana ni Yalotabu, kau qirita na noqu itokani meu vakadaroya. Au rerevaka deu na vakacudrui koya. E rawa vakacava meu vakamacalataka na veivakauqeti vakayalo vua e dua na itokani ka sega ni dau marautaka na cakacaka ni Yalo Tabu?
Au vakamacalataka niu sega ni logavinaka ena vuku ni dua na ka keirau sa nakita tiko me keirau cakava kau nuitaka ni sa na rawa kina e dua na iulubale vinaka meu kua kina ni lako yani kina veinaki oqo. A cudru o koya ka kaya me veisautaka na ituvatuva. Au vakacegu kau vakadonuya na veisau baleta niu nanuma, “e rairai na ituvatuva beka oya ka vakavuna tiko na nona vakasalataki au tiko mai na Yalotabu.” Ia e sega ga ni lako tani na lomaleqa.
Keirau marautaka ruarua na veika a yaco tiko ena bogi oya, ia ena veigauna eso, e kaya tiko mai na Yalotabu ni bibi na ivakasala taumada. Taumada a sega ni dua na ka me lomaleqataki, ia ni toso tiko na bogi sa qai matata cake tiko ga mai ni dina beka ni keirau a susu cake mai ena mataqali bula vata, sa duidui sara na vanua keirau dui goleva tiko. E sega ni tautauvata na neirau ivakatagedegede—ena veika lalai sara mada ga. Ni otataka na waini, au vakamacalataka vua niu na sega ni sauma na alakaolo. A doka na noqu gagadre ka sauma ga vakataki koya.
A tubu cake tikoga na noqu lomaleqa vakayalo ni toso tiko na bogi. Ni sa oti na ivakayakavi, au sa toka sara ga ena bati ni noqu idabedabe, ka vakarau meu lako, baleta niu kila ni sega ni dede sa na lako na iotioti ni sitimanivanua ka sa rui yawa na vanua au tiko mai kina meu vodo tekisi. Ni vakila na vu ni noqu lomaleqa, e kaya na noqu itokani ni rawa niu moce ena nona itikotiko. E sega ni biuti au meu tu taudua na Yalotabu, ni vakadeitaka na veika au sa kila rawa tiko: sa sega kina ni rawa niu tiko.
Niu laki talaci koya ki vale, au a segata vakaukauwa me kua ni lomaleqa na kequ irairai. “O dina ni o sega ni via tiko?” a taroga. Au dina. A sega ni cikecike se veivakacudrui, ia na Yalotabu e matata cake mai na domo ni kurukuru. E sega ni rawa niu calata na noqu sitimanivanua!
Au wawa me yacova niu kila ni sa curu vakavinaka ki loma, au qai laiva e dua na cici ena kena totolo duadua au rawata meu kakua ni bera ki na siteseni ni sitimanivanua. E sega ni rawa ni yali mai na noqu vakasama o Josefa mai Ijipita ena nona dro tani mai na veitemaki (raica na iVakatekivu 39:7–12).
Niu vakasamataka lesu na veika a yaco ena bogi ko ya, au vakila ruarua na rere kei na vakavinavinaka: rere ena vuku ni veika a rawa ni yaco kei na vakavinavinaka ena veitokani ni Yalotabu. A vosa na Yalotabu, ka dina ga ni a dodonu meu vakayacora e liu, au vakavinavinaka ni a qai rawa niu vakarorogo.
E matata ni ivakarau ni noqu raica na veika a yaco ena bogi ko ya a sega ni makare vinaka me vaka na Turaga. Me vaka e vola ko Aisea:
“Ni sa duatani na noqu vakanananu ka duatani na nomudou vakanananu, ka sa duatani na noqu ivalavala ka duatani na nomudou ivalavala, sa kaya ko Jiova.
“Me vaka na kena cecere cake na lomalagi ki vuravura, sa cecere cake vakakina na noqu ivalavala ki na nomudou ivalavala, kei na noqu vakanananu ki na nomudou vakanananu” (Aisea 55:8–9).
Eso na digidigi eda sotava ena noda bula e dau totolo ga na kena caka ka guileca yani. Eso tale na digidigi e yaco mai kei na lesoni ena vinaka me da kakua ni guilecava. Au vakavinavinaka meu kila ni ena gauna eda rogoca kina na veivakauqeti ni Yalo Tabu—ia ni da vakayacora ena gauna vata ga—ena rawa ni da tiko ga ena sala sa vakotora vei keda ko Jisu Karisito me da muria.
iVakaraitaki mai vei Jeff Ward