“Na cava mada na vuna e tu ga kina na leqa ena noqu matavuvale e dina ga ni keitou dau lai lotu, lotu vakamatavuvale, ka tovolea me bulataka na kosipeli. Na cava soti tale e rawa meda cakava?”

Na bulataki ni kosipeli e kauta mai na veivakalougatataki ia e sega ni kena ibalebale ni o na sega ni sota kaya na dredre. Na veivakatovolei e rawa ni vaqaqacotaka na nomu vakabauta ena kena vakauqeti iko mo vakasaqara na nona veivuke na Tamada Vakalomalagi. Na wali ni leqa ena Nona veivuke ena vakavulica vei iko na ivakarau ni kena vakatauci na lewa dodonu.

Dou sa bau veitalanoataka mada vakamatavuvale na ituvaki oqo? Ena noda veitalanoa vata, ena rawa ni o kunea eso na vakasama ka na veivuke. Dou sa bau lolo vata ka masu vata vakamatavuvale me baleta e dua na iwali? O sa bau vakasaqaqara mada ena ivolanikalou kei na vosa ni koniferedi raraba? De vinaka mo dou cakava vakamatavuvale eso na veisau me vinaka cake kina na ituvaki oqori, se de vinaka mo dou toso tikoga, dou wawa ena yalovosota ka vakabauta tikoga ni na vaqaqacotaki kemudou na Turaga ena gauna ni veivakatovolei oqo (raica na Mosaia 24:15).

Kevaka era vakavuna ki na nomu matavuvale eso na tamata na yalorarawa, tovolea mo vosoti ira ka kakua ni beitaki ira. Ena sega beka ni walia vakatotolo na leqa na veivosoti, ena kauta mai na vakacegu ki yalomu ka vakarawarawataka na kena wali na leqa.

Sa bololaka tikoga na matavuvale na meca baleta na nodra igu sa ka bibi sara ki na Lotu kei na nomu itikotiko. Vosota tikoga. Lako tikoga ki Lotu, lotu vakamatavuvale, ka bulataka na kosipeli. Na talairawarawa ena rawa kina vei iko mo vakila na Yalo Tabu, ka sa bibi sara na Nona veituberi me kunei kina na isaunitaro o vakasaqara tiko. Na nomu tiko ena dua na matavuvale qaqaco vinaka, sa dua na takete bibi duadua e rawa ni nomu.

Vakayagataka na iDusidusi sa Soli Vei Keda

De rairai ena sega ni vaqaqacotaki e dua na matavuvale me yacova ni sa vakatovolei. E kalougata, ni da na sega ni gadreva me da sotava duadua na noda leqa; na Tamada Vakalomalagi e vinakata me da qaqa vakatamata yadua ka vakamatavuvale. Me vukei keda, sa vakarautaka tu o Koya na idusidusi, me vaka na ivolanikalou, e dua na parofita bula, na iliuliu ni Lotu tale eso, kei na Yalo Tabu. E rawa ni ra vukei keda me da kila ka vakayagataka na ivakavuvuli ni kosipeli ka na kauta mai vei keda kei na noda matavuvale na marau. Me kena ikuri, kakua ni guilecava mo tukuna vei rau na nomu itubutubu ni o taleitaki rau ka lomani rau. Au kila ni na vakarautaka na Turaga e dua na sala me duavata, vaqaqacotaki ka laveti cake kina na nomu matavuvale. Au kila ni sa lewa va-Kalou na matavuvale.

Jared L., yabaki 18, Mindanao, Filipaini

Vuli mai na Veika Dredre o Sotava

Veitalia na levu ni nomu tovolea, ena dau tu ga na veika dredre. Na veivakatovolei oqori me vukei keda me da tubu. Ena vakatau ga ena nomu sotava na veidredre oqori. Na kena ki sai koya mo vuli mai kina. Tu suka vakalailai ka raica se cava sara e yaco vakavolivoliti iko tiko. Masulaka na veivakatovolei o sotava tiko ka vakabauta ni na vukei iko na Turaga mo lako sivita. E rawa ni ra yaco me vaqaqacotaki iko, ka mo qai veivaqaqacotaki vei ira na tani.

Makenzie C., yabaki 18, Chihuahua, Mexico

Wilika na iVakaro ni Matavuvale

Ena yaco ga mai na leqa kevaka eda masu se sega. E sega ni keda itotogi ia me da qaqaco cake kina. Na leqa eda sotava ena noda bula ena basika kina na madigi vei keda vakamatavuvale me da cakacaka vata. Ni keitou lako sivita rawa vakamatavuvale na dredre, na leqa vakailavo, kei na neitou tovolea tikoga me keitou dau tiko vata ena so na gauna, sa yaco me keitou veivolekati vakataki keitou ka vakakina vei Tamada Vakalomalagi. E dua na ka keitou dau cakava ena veigauna dredre sai koya na wilivola “Na Matavuvale: Ai Vakaro ki Vuravura Raraba.” E vakananuma vei keda na ivau tabu eda wasea vata kei kena bibi me da rokova na noda veiyalayalati.

Anna G., yabaki 15, Georgia, Amerika

Vakabauta Tiko na Turaga

Na ka e dau vukei au niu vakataroga se cava e sotava tiko kina na leqa na noqu matavuvale, ena gauna sara mada ga keitou sa cakava tiko kina na veika kece keitou rawata, na italanoa kei Jope kei na levu ni ka a sota kaya. Na Jope 19:25–26 e vaqo: “Niu kila sa bula tiko na noqu iVakabula, ena tu talega e vuravura ena siga mai muri: ia ni sa rusa sara na kuliqu oqo, kau na kunea ga na Kalou ena yagoqu.” A sotava o Jope eso na bolebole dredre sara, ia e kila tikoga ni bula tiko na nona iVakabula! Ni sa rawa vei keda me da vakanananu ka bula me vakataki Jope, au kila ni na rawa vei keda me da raibaleta na noda leqa ka raica ni tiko e dua na noda iVakabula, o koya e laveti keda tiko ena veivakatovolei oqo.

Megan B., yabaki 17, Utah, Amerika

Sotava na Leqa ena Vakanuinui

Na leqa ena vakaukauwataki keda kevaka e sotavi vakadodonu. Na ka o na gadreva mo cakava mo sotava na leqa ena vakanuinui kei na yaloqaqa. O sa na solia tiko beka na nomu vinaka duadua ena nomu lako tiko ki lotu ka tovolea tiko mo bulataka na kosipeli, sa dodonu mo vakadinadinataka ni leqa o sotava tiko e na vakasavasavataki iko ka vakavinakataki iko cake mai muri. Tovolea talega mo kila e dua na ka o sega ni a cakava vakavinaka ka sasaga mo vakadodonutaka. Tovolea vakawasoma mo dau vukei ira na tani, ena mamada cake na nomu leqa. Me kena ilutua dau taro ivakasala e veigauna vua na Turaga. Masulaka na nomu leqa ka kerei Tamada Vakalomalagi me tuberi iko.

Raymond A., yabaki 18, Accra, Ghana

Vosota ki na iVakataotioti

Na matavuvale e itakele ni nona ituvatuva na Dauveibuli, o koya ena segata kina na meca ena nona igu taucoko me tarovi keda mai na noda bula vata me vaka e dua na matavuvale mamarau ka dau vakanamata ki na kosipeli. Eda kila ni sega ni rawa ni da namaka me rawarawa na bula se ni da sa lako ga ki lotu ka dau lotu vakamatavuvale, sa na sega na veivakatovolei ena noda bula. Ni sa voravora na toso, wilika na nomu ivolanikalou, masu, ka veitalanoa vakamatavuvale.

Elder Dudley, yabaki 21, Tabana ni Kaulotu na Indonesia Jakarta

Ciqoma na Nona Lewa na Tamada Vakalomalagi

Au vakabauta ni dua na sala e vakatovolei keda kina na Tamada Vakalomalagi sai koya na leqa eda sotava. Me da kakua sara ni guilecava ni o Koya na Tamada ia ni vakakina sa dau lomani keda vakalevu sara o Koya ka dau vinakata ga na ka e vinaka duadua me baleti keda. Au kila ni sala duadua ga me da lako sivita kina na leqa sai koya na noda toso tikoga ka cakava na lomai Tamada.

José C., yabaki 18, Ancash, Peru