Kaukauwa ni iVolanikalou
Ni rau solia e rua na gone yabaki tini vakacaca mai Tahiti e dua na gauna ki na ivolanikalou, a veisau na nodrau bula.
A sega dina ni via vulica o Rooma na ivolanikalou. O Vaitiare a sega dina ni via lako ki na semineri. E sega ni dodonu me rau lako. Ia ni rau digitaka me rau lako a veisau na nodrau bula.
Baleta na Cava?
Na cava beka me digitaka kina e dua na gone yabaki tinivakacaca me vakayagataka e rua na auwa ena veibogi ni Lotulevu me rau vulica tiko kei tinana na ivolanikalou? E na rairai vakatataro tale beka ga vakaoqo o Rooma Terooatea mai Taiti ena dua na yabaki sa oti.
Ena gauna oqo sa na vakataroga beka se cava na vuna me digitaka kina e dua na gone yabaki tinivakacaca me kakua.
Ena tolu na yabaki ni semineri, e sega dina ni dau vakarorogo sara o Rooma ni lesia mai na qasenivuli na ivolanikalou me wiliki mai me baleta na lesoni ka tarava. “Au dau sega ni vinakata meu wilika,” e kaya o koya. “Era a sega ni rika mai vei au na ivolanikalou.”
Ia e dau vakataroga se cava era dau vakayagataka kina na ivolanikalou o ira na iliuliu ni Lotu ena nona tabanalevu kei na iteki ena nodra vosa kei na lesoni. A dau vakaraici ira na nona iliuliu. A raica na kena rawarawa vei nona peresitedi ni iteki me cavuta na vosa mai na ivolanikalou.
Ia ena gauna e wasei ira kina na gone vuli semineri na iTeki na Faaa Tahiti me baleta na veisisivi ivolanikalou ena loma taucoko ni iotioti ni nona yabaki ni vuli semineri, a nanuma o Rooma me sa solia mada ki na ivolanikalou e dua na gauna.
Oqori na gauna a tekivu kina na vuli e veimacawa vata kei tinana. Ena veibogi taucoko ni Lotulevu erau na vuli vata me baleta na veisisivi ni kalasi ena siga ka tarava, me vulica na vanua e tiko kina na veitikina bibi ka cavuqaqataka e vuqa vei ira.
Oqori na gauna sa tekivu veisau kina na veika eso vei Rooma. Na nona vuli ivolanikalou e vaqaqacotaka na kena isema vei tinana. Sa tekivu me raica na ivakatautauvata ni veika e vakavuvulitaka na ivolanikalou kei na veika e yaco tiko e vuravura ena gauna oqo. Ni masulaka na veika e wilika tiko, a qai kila ni sa mai vua na Kalou.
A vukei koya talega me liutaka na nona timi ki na qaqa ena veisisivi ivolanikalou ni iteki.
A raica o Rooma ena veivakalougatataki e ciqoma e dua na lesoni a vulica ena gauna e vuli tiko kina. “Ena Mosaia 2:24 e vakavuvulitaka kina na Tui o Penijamini ni ena gauna eda digitaka kina me da cakava na veika e kerea na Turaga, eda na vakalougatataki ena gauna vata ga,” e kaya ko Rooma. E dua na veivakalougatataki cecere duadua e sa ciqoma sai koya “ni oti na nona vulica na ivolanikalou ena yabaki oqo, au sa kila ni dina na iVola i Momani.”
Kua ni Tukuna Vei Au na ka Meu Cakava
Ena itekivu ni yabaki vakavuli, e se sega mada ga ni lewena na Lotu o Vaitiare Pito. E rawa vakacava vua e dua na lewenilotu vou ka se bera vakadua ni bau lakova na semineri me vukea me qaqa na nona timi me qaqa ena veisisivi ivolanikalou ni iteki na Faaa?
“Au a sega ni leqataka ni sega ni levu vei au na kila,” e kaya o koya. “Au vulica e vuqa vei ira na tikina oqo ena nodra lesoni na daukaulotu.”
E vuqa vei ira na matavuvale nei Vaitiare era qai lewena na Lotu ni sa oti na nona mate vakasauri na tamana ka qai kauti rau mai na daukaulotu ki nodratou vale na iliuliu ni daukaulotu. Erau a tukuna me baleta na duavata vakamatavuvale kei na noda tikovata me tawamudu. “A kauta dina mai na veisau ki na neitou matavuvale,” e kaya o koya.
Ia e sega ni veisautaka na nona itovo ni dau bula ga vakataki koya na yabaki 17 oqo. “Niu papitaiso oti, era kaya vei au na tamata kece meu lako ki na semineri,” e kaya o koya. “Au sega ni dau taleitaka me tukuni vei au na ka meu kitaka, a taura e dua na gauna meu qai lako.”
Sa qai yaco na gauna e qai nanuma kina me sa lako ka raica ni taleitaka. A lesi me lewena na timi vata ni ivolanikalou e tiko kina o Rooma.
Taumada a sega ni saga me wilika na ivolanikalou e lesi mai. Ia ni sa qai lomana me kitaka, e sega ni dede sa vakila na levu ni veivakalougatataki.
“Sa veivuke sara vakalevu na ivolanikalou,” e kaya o koya. “Au sa vulica e vuqa sara na ka mai na ivolanikalou,” okati kina na bibi ni masu ka vakakina ni na sauma na Tamada Vakalomalagi na masu oqori.
A vulica talega ni ena gauna e lewa kina me cakava e dua na ka, me vaka na lako ki na semineri se wili ivolanikalou, e rawarawa cake kina na nona maroroya na yalayala mai na nona cakava baleta ni dodonu me cakava se ni “kena ivakarau” me caka.
Oqo ni sa cava na yabaki vakavuli, e vakavinavinaka o Vaitiare ni a digitaka me lakova na semineri ka vulica na ivolanikalou: “Au kila ena noda wilika na ivolanikalou, eda na vakalougatataki.”
Ni lako o Rooma Terooatea (e ra) kei iratou na lewe ni nona kalasi ni semineri ki Moorea (imawi) me ratou laki vakatovolea na nodratou kila na ivolanikalou, a sega ni dua na ka na veika e qai basika kina—sa qaqa rawa tu o Rooma.
Ena gauna ga e lewa kina o Vaitiare Pito mai Taiti me vulica na ivolanikalou, sa tekivu me raica na veivakalougatataki.
iTaba mai vei Adam C. Olson, vakavo ga kevaka sa vakamacalataki; e cake: itaba © iStock; itaba ni senikau © iStock