Mai na Buturara ni Kaulotu
Na iVakatakilakila ena Noqu Veivakalougatataki
Au a veiqaravi ena Tabana ni Kaulotu na Texas Houston South vakadaukaulotu vosa vaka-Sipeni. Ena dua na siga keirau a tukituki e katuba kei noqu itokani, ena neirau tovolea me keirau kunea eso me keirau vakavulica. Keirau yaco yani ki na dua na vale ka tu e dua na qara levu ena kena varada kau makawa.
A dolava na katuba e dua na kena marama qase cake ka sureti keirau yani ki loma. Au sega mada ni kila kevaka e kilai keirau kei na ka keirau cakava tiko, ia sa malumu dina nona itovo. Sa tekivu me keirau vakavulica vua na imatai ni lesoni, ka vaka me toso vinaka tiko na veika kece. Sega ni dede sa yaco mai na noqu gauna meu vakavuvulitaka na veika me baleti Josefa Simici kei na iMatai ni Raivotu. Au sarava na kena sa vakaraitaki mai ena irairai ni matana na nona sa veilecayaki. E kena irairai ni sega ni vakamuria tiko na veika au vinakata meu vakamacalataka vua.
Ni oti na kena tarogi e vica na taro me baleta na veika keitou sa vulica ka vakakina e vica sa taura rawa tiko o koya, au vakila ni sa vaka meu sosa mai ni sega tiko ni taura rawa o koya na vakasama ni iMatai ni Raivotu. Sa oti mai e dua na siga oca, ka iotioti ni ka ena vinakata e dua na daukaulotu ni dua me sega ni taura rawa tiko na ka e vinakata vakalevu duadua me ra vakadinata na tamata.
Ena tiki ni sekodi vata oqori sa tekivu me cudru mai kina na lomaqu, sa basika mai na noqu vakasama e dua na malanivosa lailai mai na noqu veivakalougatataki vakapeteriaki. Oqo e dua na iwasewase me baleta na noqu matavuvale mai muri kau vakasalataki kina meu dau vakavulica vei ira na luvequ mai muri na ivakavuvuli ni kosipeli. Niu vakasamataka toka na malanivosa ko ya, au kila ni tukuna tiko vei au na Yalo Tabu meu vakavulica na marama yalomalua oqo ena ivakarau vata ga au na vakavulica kina e dua na gone.
Sa tekivu meu vakavulici koya ena dua na ivakarau rawarawa ka basika kina na loloma. Au raitayaloyalotaki iratou na luvequ ni ratou dabe wavoki ena rumu ni gade ka raici au cake mai, na tamadratou, niu vakavulica vei iratou me baleta na Parofita o Josefa Simici. E vakurabui na noqu raica na veisau ni matana. Sa waqa cake na matana, ka serau mai. Na kena irairai veilecayaki sa tekivu me kune kina na nona taleitaka kei na vakatataro. Niu talanoataka na italanoa ni nodrau rairai na Tamada Vakalomalagi kei Jisu Karisito vei Josefa Simici, e tonawanawa na wainimatana ka drodrova sobu na baluna. E vakasinaiti na rumu ena Yalotabu, ka veisau na noqu sosa ki na reki levu.
Au na sega vakadua ni guilecava na gauna oqo. Oqo au sega ni rawa ni waraka na gauna meu na vakavulica kina na ivakavuvuli oqo vei iratou na luvequ ena dua na siga ka vakila tale na marau levu oya.
iVakaraitaki mai vei Brian Call