O Jisu Karisito Na Dautataro
Mai na “Na Dautataro,” Ensign, Me 1977, 54–56.
O Jisu Karisito, na noda Dautataro, sa sauma na isau e sega ni rawa vei keda me da sauma me rawa kina ni da lesu ka laki bula tale vata kei Tamada Vakalomalagi.
“Meu tukuna mada e dua na italanoa—e dua na vosa vakatautauvata.
“Ena dua na gauna a vinakata tiko vakalevu e dua na ka e dua na turaga. E rairai ni bibi cake sara mai na veika tale eso ena nona bula. Me rawa kina ni yaco nona gagadre, a cakava e dua na dinau levu.
Sa vakasalataki oti me baleta na dinau levu vakakoya vakauasivi me baleti koya e solia vua na dinau. Ia e vaka ni sa rui bibi vua me rawata sara ga ena gauna oqo na ka e vinakata. E vakadeitaka ni rawa me sauma ena dua na gauna e muri.
“A mani sainitaka e dua na konitaraki. Ena qai sauma lesu tale ena dua ga na gauna. A sega soti ni leqataka sara vakalevu, baleta na siga me saumi kina e se balavu sara. A sa rawata na ka e vinakata ena gauna oqo, ka ni oqori na ka e rairai bibi cake.
E dau tu ga ena nona vakasama o koya a solia vua na dinau, ka dau cakava eso na sausaumi lalai ena veigauna eso, ka nanuma voli ni na sega ni yaco mai na siga me na saumi kina vakaoti na dinau.
Lewa Dodonu se Loloma Veivueti?
“Ia me vaka ga e dau yaco e veigauna, sa yaco mai na siga, sa cava kina na gauna e veidinadinati taki. A sega ni saumi taucoko na dinau. A basika mai na nona dausoli dinau ka vakarota me saumi taucoko.
“Oqori sara ga na gauna sa qai kidava kina o koya ni nona dausoli dinau e sega walega ni tu vua na kaukauwa me taura na veika kece e taukena, ia e okati talega kina na kaukauwa me balati koya ki na valeniveivesu.
“Au sega ni sauma rawa vei iko baleta ni sega vei au na ka meu sauma lesu kina, a vakatusa.
“Io,” e kaya na dausoli dinau, “keitou sa na vakaukauwataka na konitaraki, taura nomu iyaya, o sa na qai curu ki na valeniveivesu. O a vakadonuya na ka oqori. A nomu digidigi. O a sainitaka na konitaraki, ia oqo e dodonu me sa vakaukauwataki.”
“E sega ni rawa mo tosoya na gauna se vosota na dinau?” a vakamamasu o koya e dinau. ‘Veivosakitaka eso na sala meu maroroya na veika au taukena ka sega ni curu ki valeniveivesu.Vakadeitaka mada ni o vakabauta na loloma cecere? E sega ni rawa beka mo vakaraitaka na loloma cecere?”
A sauma na dausoli dinau, “Na loloma veivueti e dau vakatabakidua e veigauna. Ena qaravi iko duadua ga. Kevaka au vakaraitaka na loloma cecere kivei iko, o sa na sega ni sauma vei au Sa ikoya na lewa dodonu au vinakata. O vakabauta li na lewa dodonu?”
“‘Au vakabauta na lewa dodonu ena noqu sainitaka na konitaraki,’ a kaya o koya e dinau.‘E a tiko kina ena noqu yasana, kau a nanuma ni na taqomaki au. Au a sega ni gadreva na loloma cecere ena gauna o ya, sega niu nanuma meu na gadreva.
“‘Sa ikoya na lewa dodonu e gadrevi mo sauma na dinau se vakararawataki ena itotogi,’ a sauma lesu o dausoli dinau.‘Sa ikoya oqori na lawa. O sa vakadonuya oti ka sa ikoya oqori na kena sala dodonu. E sega ni rawa ni veisaqasaqa na loloma cecere kei na lewa dodonu.
“Sa irau oqori: E dua e solia tiko na lewa dodonu, e dua tale e kerea tiko na loloma cecere. E sega ni rawa me vakacegu e dua vei rau vakavo ga ke dua vei rau me sauma e dua na isau bibi.
“‘Kevaka o sega ni vosota na dinau ena sega na loloma cecere,’ e vakamamasu o koya e dinau.
“‘Kevaka meu cakava, ena sega na lewa dodonu,” na kena isau.
“E kena irairai, ni lawa ruarua, e sega ni rawa me rau vakayacori vata. E rua tiko na inaki tawamudu ka rawa me rau veisaqasaqa vata kei na kena ka dua. E sega beka ni dua na sala baleta me rau vakacegui kina na lewa dodonu kei na loloma cecere?
“E tu na kena sala! Na lawa ni lewa dodonu e rawa me veivakacegui taucoko kei na loloma cecere e rawa me soli taucoko—ia e gadrevi me cakava e dua tani tale. Sa ikoya gona e yaco kina ena gauna oqo.
Nona Dautataro
“O koya e dinau e dua tiko na nona itokani. E lako mai me mai veivuke. E kilai koya vakavinaka e dinau. E nanuma ni sa rui yalowai o koya e dinau ni yalowai me vakaitavitaki koya ena dua na ituvaki dredre vakakoya. Ia, e vinakata me veivuke baleta ni lomani koya. A kalawa yani ena kedrau maliwa, qaravi koya a solia na dinau, ka tukuna na lomana: “Au na sauma na dinau kevaka o na vagalalataki koya e dinau mai na nona konitaraki me maroroya na nona iyau ka kua ni lako ki valeniveivesu.”
“Ena nona vakasamataka tiko o dausoli dinau na vakatutu, a tomana o dauveisorovaki, ‘O cikeva na lewa dodonu. E dina ni sega ni rawa me saumi iko lesu, au na cakava.Sa dodonu vinaka na ka sa caka vei iko ka sa sega tale ni dua na ka mo kerea. Ena sega ni dodonu.
“A sa qai vakadonuya o dausoli dinau.
Sa qai vuki kivei koya e dinau na dauveisorovaki. “Kevaka au sauma nomu dinau, e rawa mo ciqomi au meu nomu dausoli dinau?
“O io, io,” a tagi o koya e dinau. “O sa taqomaki au mai na valeniveivesu ka vakaraitaka na loloma kivei au.”
“Ia,” e kaya na turaga dausolisoli, “mo na sauma vei au na dinau kau na tuva na kena ivakarau. Ena dredre toka na vakamuri ni kena ivakarau, ia ena rawa. Au na vakarautaka e dua na sala. Ena sega ni gadrevi mo curu ki valeniveivesu. ”
“Sa mani vakakina ni sa saumi taucoko na ilavo vua na dausoli dinau. E mani qaravi sara vakadodonu. A sega ni voroki na konitaraki. “O koya e dinau, e qai, soli vua na loloma cecere. E vakayacori ruarua na lawa. Baleta ni a tiko e dua na dautataro, sa rawata kina na lewa dodonu na nona ivotavota dodonu ka vakamamautaki na loloma veivueti.
Noda Dautataro
O keda yadua eda bula tiko ena dua na mataqali dinau vakayalo, me na saumi. Ena dua na siga sa na sogo kina na akaude, ka vinakati me saumi vakaoti. Se vakacava ga na ivakarau ni noda raica ena gauna oqo, ni sa yaco mai na siga ko ya ka sa voleka mai na sogosogo, eda na veiraiyaki ena yalorarawa kei na vutugu me dua, se o cei ga, me vukei keda.
Ena lawa tawamudu, ena sega ni rawa ni vakadewataki na loloma veivueti vakavo kevaka e dua e sa lomasoli ka rawata me taura me nona na dinau ka sauma na kena isau ka tuva na ivakarau ni noda vueti.
Vakavo kevaka e dua na noda dautataro, vakavo kevaka e dua na noda itokani, sa dodonu me na lutuki keda na isau taucoko ni lewadodonu. Na isau taucoko ni ivalavala ca yadua, se vakacava na kena lailai se vakacava na kena titobu, ena tauri mai vei keda na kena levu taucoko.
Ia mo ni kila oqo: Na dina, na dina lagilagi, e tukuna ni tiko e dua na Dautataro vakaoqori. “Ni sa duabau ga na Kalou, ka duabau ga na dauveisorovaki, ena maliwa ni Kalou kei ira na tamata, io na tamata ko Jisu Karisito” (1 Timoci 2:5). Ena vukuna sa rawa kina me vakadewataki mai vei keda kece na loloma veivueti ka sega ni vakacudrui kina na lawa tawamudu ni lewa dodonu.
Na vakadewataki ni loloma veivueti e sega ni na yaco ga vakataki koya. Ena vakayacori ena noda veiyalayalati vata kei Koya. Ena yaco ena Nona ivakarau, na Nona ivakarau lomasoli, ka okati kina, ni dua na tikina yaga sara, na papitaiso ena tabadromuci me bokoci kina na ivalavala ca.
Eda na rawa ni taqomaki na kawatamata mai na lawa ni lewa dodonu, ena gauna vata ga oqori sa na vakadewai mai kina vei keda na veivakalougatataki veivueti ka veivakabulai ni loloma veivueti.
iVakaraitaki mai vei Dan Burr