Ko e Misiona ʻo e Moʻui ʻa ha Faʻē ʻOfa

Fai ʻe Peiholani Kauvaka

ʻI heʻeku tupu hake ʻi Tongá, naʻe faʻa tokoni ʻeku faʻeé ʻi he faiako seminelí. Mei hoku taʻu 5 ʻo aʻu ki hoku taʻu 10, naʻá ne faʻa fafangu au kimuʻa he taimi seminelí peá ne taki au ki he fale naʻe fai ai e kalasí. Neongo naʻe ʻikai ke aʻu ki he kuata mailé (km ʻe 0.4) ʻa e lue ki aí ʻo fou atu ʻi he kiʻi hala he lalo kuavá, ka naʻá ne fehuʻi mai, “ʻOkú ke ʻilifia?” peá u tali fakatoʻa ange pē, “ʻIkai.”

Pea te ne pehē mai, “ʻE ʻi ai e ʻaho kuo pau ke ke loto toʻa ai mo tauhi ki hoʻo Tamai Hēvaní. Kuó Ne foaki mai ʻa e meʻa kotoa pē maʻatautolu, naʻa mo ha palani ke tau toe lava ʻo foki hake ai ʻo nofo mo Ia. ʻE ʻi ai e ʻaho te ke ʻalu ai ʻo ngāue fakafaifekau peá ke tauhi kiate Ia ʻaki ho lotó, iví, ʻatamaí, mo ho mālohí kotoa. Kuo pau ke ke kamata teuteu he taimí ni ke ke hoko ko ha faifekau lelei.”

Naʻe faifai pea hiki homau fāmilí ki ʻOnateleō, ʻi Kalefōnia, ʻAmelika. Naʻe ʻikai maheni ʻeku faʻeé mo e fonuá, ʻikai ke ne lava ʻo lea ʻaki e lea fakafonuá pea foʻou e meʻa kotoa kiate ia. Hangē ko hano tānaki mai ʻe ha motuʻa moa ʻa hono ʻuhikí, naʻe pehē ʻene fakatahaʻi kotoa mai kimautolu fānaú peá ne tūʻulutui ʻo kole ki he Tamai Hēvaní ke ʻoua muʻa naʻa hē ha taha ʻo e fānau kuó Ne foaki mai maʻaná mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakaʻaongaʻi ʻe heʻeku ongomātuʻá ʻa e lotu fakafāmilí, lau folofola fakaʻahó, ʻaukai fakafāmilí, efiafi fakafāmili ʻi ʻapi fakauiké, mo e ngaahi fakatahaʻanga ʻa e Siasí ke maʻu mei ai e tokoni ʻa e Tamai Hēvaní ʻi hono fakamālohia homau fāmilí.

Naʻe fakalotolahiʻi kimautolu ʻe heʻemau ongomātuʻá ke mau ʻulungāanga fakafaifekau ʻi heʻemau kei īkí pē. Naʻa mau sote hina maʻu pē ki he lotú pea kosi homau ʻulú hangē ha kau faifekaú. Naʻá ku tāpuakiʻi e sākalamēnití ʻi heʻeku hoko ko e taulaʻeikí, pea naʻe teuteuʻi mo tufa ʻe hoku ngaahi tokoua īkí e sākalamēnití ʻi heʻenau hoko ko e kau akonaki mo e kau tīkoní. Naʻe lava pē ke u vakai atu ki hono siofi kimautolu ʻe heʻeku faʻeé mo e tamaí ke fakapapauʻi naʻa mau fai homau ngaahi fatongiá ʻi he faivelenga kakato.

Kimuʻa peá u ʻalu ʻo ngāue fakafaifekaú, naʻe pehē mai ʻeku faʻeé, “Fai ʻe koe hoʻo tafaʻakí, pea te u fai ʻe au haʻakú. Te u lotu mo ʻaukai maʻau ke ke maʻu ha kakai ke akoʻi.” Naʻe hokohoko atu ʻene ʻaukai mo lotua ʻene fānau tangata ʻe toko faá lolotonga ʻenau ngāue fakafaifekaú. Naʻa mau ngāue faivelenga kotoa pea mau foki ki ʻapi ʻi he lāngilangi.

Lolotonga ʻeku talanoa fakaʻosi mo ʻeku faʻeé pea toki mālōloó, naʻá ne pehē mai, “ʻE Peiholani, kuó u akoʻi kiate koe ʻa e meʻa kotoa pē ʻoku ou ʻilo ʻoku mahuʻinga taha ʻi he moʻuí ni pea mo e moʻui ka hoko maí. ʻA ia ko ʻeni, ʻoku moʻoni ʻa e ongoongolelei ʻo Sīsū Kalaisí. Ko e taʻataʻa fakalelei ʻo Sīsū Kalaisí ʻa e fakamoʻui ki ho laumālié. Tauhi ʻa e ngaahi fuakava kuó ke fai mo e ʻEikí ʻi he temipalé. Fai ʻeni, pea ʻe toe fakataha hotau fāmilí. ʻOku ou ʻiloʻi taʻe toe veiveiua koeʻuhi ʻoku moʻui ʻa e Tamai Hēvaní mo Sīsū Kalaisi.”

Naʻe langa ʻeku fakamoʻoní ʻi he ongoongoleleí, ʻi he foʻi lea kotoa pē naʻe lea ʻaki ʻe heʻeku faʻeé mo ʻeku tamaí. ʻOku ou ʻilo ʻe toe fakataha homau fāmilí ʻi ha ʻaho he kuo fakakakato ʻe heʻeku ongomātuʻá ʻena misioná ke akoʻi mai ʻa e ongoongoleleí pea tataki atu ʻa kimautolu ki he Fakamoʻuí.

ʻOlungá: Ko e tamai ʻa e tokotaha ʻoku ʻaʻana ʻa e fakamatalá, ko Mōsese, faʻeé ko Lavinia, mo hono ʻilamutu ʻi he kelekele ʻo e Temipale Losi ʻEniselesi Kalefōniá ʻi he 1999.

Taá ʻi he angalelei ʻa Peiholani Kauvaka