Mi Vida, Mi Historia

Ngaahi talanoa ʻo e tuí mo e ueʻi fakalaumālié mei he Kāingalotu ʻo ʻAmelika Latiná.

Ko hono vahevahe ʻe he Kāingalotu ʻi he ngaahi peesi ko ʻení ʻa ʻenau ngaahi talanoa fekauʻaki mo e tui ki he ongoongolelei ʻo Sīsū Kalaisí ʻi ha fakaʻaliʻali ʻa e Musiume Hisitōlia ʻo e Siasí. ʻOku nau fakafofongaʻi kotoa ʻa e Kāingalotu ʻe lauimiliona ʻi ʻAmelika Latiná.

Naʻe fakaʻaliʻali ha talanoa ʻe uofulu mā fā ʻi he Musiume Hisitōlia ʻo e Siasí ʻi Sōleki Siti, ʻi ʻIutaá, ʻo aʻu ki Sune 2011. ʻE kei lava pē ʻo fai hano mamataʻi ʻo e fakaʻaliʻalí he ʻInitanetí ʻi he lds.org/churchhistory/museum/exhibits/mividamihistoria.

Kāmani ʻEkivelaia Uti

Naʻe fāʻeleʻi mai ʻa Kāmani ki ha fāmili lotu ʻi Kuatemala Siti, ʻi Kuatemala. ʻI hono taʻu hivá, naʻe akoʻi ʻe he ongo faifekau fefine ʻa e Siasí ʻa e ongoongoleleí ki hono fāmilí. Naʻá ne fiefia he ʻalu ki he Palaimelí peá ne fakamatala ki ha faʻahinga fiefia foʻou naʻe maʻu ʻe hono fāmilí. Naʻe papitaiso homau fāmilí hili ha taʻu ʻe taha mei ai. ʻOkú ne pehē, “Ko ha taimi mātuʻaki fakaʻofoʻofa moʻoni ia.” ʻOkú ne manatu ki he ʻaʻahi ange ʻa Palesiteni Tēvita O. Makei (1873–1970) ki Kuatemala ʻi he 1954 peá ne akoʻi ʻa e tefitoʻi moʻoni ʻo e vahehongofulú ki he fānaú. Naʻe uiuiʻi ia ʻi hono taʻu 17 ke ngāue fakafaifekau ʻi he Misiona ʻAmelika Lotolotó pea naʻá ne houngaʻia ke vahevahe “ʻa e ʻamanaki lelei ki ha moʻui ʻe lelei ange pea mo e nofo fakataha ʻo taʻengatá.”

Meliame Pueta ʻĀmato

Ko ha tokotaha Palāsila ʻa Meliame. Naʻá ne fakafonu e ʻū meʻa fakapepá he taimi naʻe fie ʻalu ai ʻo ngāue fakafaifekaú. Hili pē mei ai ha uike ʻe fitu, naʻe fakataha mo hono fāmilí ʻi honau ʻapí peá ne lau ange ʻa e tohi uiuiʻi ke ne ngāue ʻi he Misiona ʻIutā Sōleki Siti Temipale Sikueá. ʻOkú ne pehē, “ʻI he taimi ne u lau ai e tohí, naʻe kaikaila fiefia ʻa hoku fāmilí ʻo hangē ko ʻenau fai ʻi he taimi ʻoku tataʻo ai e timi ʻakapulu fakafonua ʻa Palāsilá. Ne u fiefia foki mo au, pea naʻá ku ʻiloʻi kuo fekauʻi au ʻe he ʻEikí.”

Nalesoni Mousiki

Naʻe fetaulaki e ongomātuʻa ʻa Nalesoní mo e ongo faifekaú hili pē ha taimi siʻi mei hono fāʻeleʻi ia ʻi ʻAsanisioni, ʻi Palakuaí. Ko e manatu ʻeni ʻa Misa Mousiki ki aí, “Naʻe tangutu ʻeku tangataʻeikí ʻi he fakafaletoló ʻi ʻapi mo ʻene sio atu kia ʻEletā Hikipī mo ʻEletā Sionesoní ka naʻe ʻikai ke ne ʻiloʻi ko e ongo faifekau kinaua. Naʻá ne talaange ki hoku tuofefiné ke ʻomai ha sea ʻe ua he ʻ‘e liliu ʻe he ongo talavoú ni ʻa ʻetau moʻuí.’ ʻI he pasi ʻe he ongo ʻeletaá hona nimá he matapaá, naʻá ne fakaava mo pehē ange, ʻMo hū mai. Naʻa mau tatali atu kiate kimoua.’ Naʻe kau ʻeku tangataʻeikí mo e fāmilí kotoa ki he Siasí.”

Lōpini Menitosa

Naʻe tupu masiva hake ʻa Lōpini ʻi ʻEkuatoa, ka naʻá ne fie maʻu ha moʻui naʻe toe lelei angé maʻana. Naʻe tuʻo taha ʻene lotu lolotonga ʻene ngāue houa ʻe 12 he ʻaho ʻi ha ngoueʻanga, pea naʻe tapa ha ʻuhila lolotonga ʻene lotú. Naʻe lau ʻeni ʻe Lōpini ko ha pōpoaki ʻa e ʻOtuá ʻoku ʻi ai ha talaʻofa ki heʻene moʻuí. “Naʻá ku ʻiloʻi ko e ngaahi ongo ne u maʻú naʻe mei he ʻOtuá ia,” ko ʻene manatu ia ki aí. Naʻá ne ʻiloʻi te ne lava ʻo liliu ʻene moʻuí ʻi he tuí. Naʻá ne ʻalu ʻo ngāue ʻi Kaiakili ʻi hono taʻu 16, pea naʻe papitaiso ia ai. Naʻe hokohoko atu pē hono ueʻi ia ʻe he Laumālié ʻo ne hū ai ki he ʻUnivēsiti Pilikihami ʻIongí ʻo fakakakato ʻa e fakaʻamu ʻa hono lotó ke akó.

ʻĒsula Pinitā Poloka

ʻOku manatu ʻa Sisitā Poloka ki heʻene fifili ki he ʻuhinga ʻo e moʻuí ʻi hono taʻu nimá. Naʻe akoʻi ʻe he kau faifekaú ʻa e ongoongoleleí kiate ia mo hono fāmilí ʻi Venesuela ʻi hono taʻu hongofulu tupú, pea naʻe papitaiso kinautolu. Naʻe uiuiʻi ia ʻi hono taʻu 16 ke hoko ko e palesiteni Palaimeli fakakoló, pea naʻá ne tui lahi. Hili haʻane ngāue ʻi he kotoa ʻo ʻene moʻuí, kuó ne ʻiloʻi ʻeni ta “ko e tuí ko ha fili ke fai.” Ko ʻene fakamatalá ʻeni, “ʻOku ou fili ke tuku ha feituʻu ʻi heʻeku moʻuí maʻá e Fakamoʻuí. Kuó u ʻiloʻi ko e Fakaleleí ko e ngāue fakaofo mo taʻesiokita taha ia kuo fai ʻi he ʻofa maʻá e faʻahinga kotoa ʻo e tangatá. Kuo hoko ʻa hoku Fakamoʻuí mo hoku Huhuʻí, ʻa e Tokotaha ʻokú Ne foaki ʻa e melinó, ko hoku kaumeʻa mamae tahá—ko ha kaumeʻa maʻu pē moʻoku.”

Linikoni Pita

Naʻe nofo ʻa Linikoni mo hono fāmilí ʻi Senitiako, ʻi Silei, ʻo aʻu ki hono taʻu 10 ʻa ia ne mālōlō ai ʻene faʻeé. Naʻá ne nofo leva mo hono mehikitangá mo e mali hono mehikitangá. ʻI he taʻu 18 ʻa Linikoní, naʻe haʻu ʻa ʻEletā Pātoni mo ʻEletā Penitilī ki he ʻapi ʻo e ongomātuʻá. Naʻe tali ʻe he mehikitanga mo e kuifefine ʻa Linikoní ʻa e ongoongoleleí kae fakamamaʻo pē ʻa Linikoni mei he ongo faifekaú. ʻI he pongipongi Sāpate ʻe taha, naʻe haʻu ai ʻene kuifefiné ki hono lokí, ko ha tokotaha ʻeni naʻe angavaivai maʻu pē, ʻo ne fusi e kafú mei hono mohengá pea talaange te nau ō mo ia ki he lotú. Naʻe ʻohovale ʻa Linikoni ʻi he ʻulungāanga ko ʻeni naʻe ʻikai maheni ai ʻi heʻene kuí, fakataha pē mo ʻene fakaʻapaʻapaʻi iá, ʻo ne tuʻu ai ki ʻolunga ʻo nau ō ki he lotú. Naʻá ne ongoʻi ha faʻahinga meʻa foʻou mo mālohi ʻi hono laumālié ʻi he ʻaho ko ʻení ʻo liliu ai ʻene moʻuí. Naʻe ʻikai fuoloa kuó ne hoko ko e taha ʻo e kau fuofua ului ki he Siasí ʻi Sileí.

Lui mo Kāla Henanitesi

Naʻe fetaulaki ʻa Lui mo Kāla ʻi Honitulasí ʻi heʻena kei taʻu hongofulu tupú. Naʻá na kamata teiti pea taimi siʻi pē naʻá na mali. Naʻe ʻikai ke Siasi ʻa Lui, ka naʻá ne fakaʻofoʻofaʻia ʻi he ongomātuʻa ʻa Kālá, heʻena “fefakaʻapaʻapaʻaki mo feʻofoʻofaní, pea naʻá ne ngaohi au ke u fie ako ʻa hona ngaahi tuʻunga ʻulungāanga mahuʻingá.” Taimi nounou pē mei ai naʻe papitaiso ʻa Lui, pea naʻe sila ʻa Kāla mo Lui ʻi he Temipale Kuatemala Kuatemala Sití. ʻI heʻena kei taʻu 30 siʻí pē, naʻe hoko e maumau ʻi hona vá, pea naʻe ʻalu ʻa Kāla ia mei hona ʻapí mo fehuʻia pe naʻe hala nai ʻena mali kei siʻí. Naʻe ʻaukai ʻa Lui mo lotu ʻo kole ki he ʻOtuá ke “fakafoki mai muʻa ʻa Kāla ki ʻapi, pea naʻá Ne fai ia. Naʻá Ne fai ia.” ʻI he ʻaho ní, ʻoku toe mālohi ange ʻaupito ʻa ʻena nofo malí.

Nāomi Kasimani ti ʻApilia

Naʻe fāʻeleʻi ʻa Nāomi ʻi ʻĀsenitina ʻa ia naʻe kau ai hono fāmilí ki he Siasí. Naʻa nau hiki ki he ʻIunaiteti Siteití ʻi hono taʻu hongofulu tupú. Neongo naʻe fiefia ʻi heʻene hoko ko e tokotaha ʻAmeliká, ka ʻokú ne fiefia taha pē ʻi he lava ke ne aʻusia e ʻulungāanga fakafonua ʻo ʻĀsenitiná. “Ko e kakai loto māfana ʻaupito ʻo ʻAmelika Latiná. ʻOku nau tali koe he taimi pē ko iá; ʻoku nau fakakaumeʻa kiate koe; ʻoku nau fakafeohi atu kiate koe. ʻOku nau saiʻia ke fakataha mo e fāmilí pea mo e ngaahi kaungāmeʻá, mo kai lelei. Ko ha meʻa fakaʻofoʻofa ia, pea he ʻikai te u fetongi ʻaki ha faʻahinga meʻa ʻeku aʻusia ʻa e ʻulungāanga fakafonuá.”

ʻŌmā Kanali

Naʻe ʻoange ʻe he faʻē ʻa ʻŌmaá hono fakamalú ki ha ongo sisitā ʻa e Siasí ʻi ʻUlukuai ʻi he 1948. Naʻe hoko ai ʻene kamata talanoa mo e ongo faifekaú, pea naʻe papitaiso kimui ai e tuofefine lahi ʻo ʻŌmaá. Naʻe fāʻeleʻi ʻa ʻŌmā ʻi he 1948, pea ko e fuofua pēpē ia ke tāpuakiʻi ʻi he Misiona ʻUlukuaí ʻa ia naʻe fakaava ʻi he 1947. Naʻe papitaiso ʻa ʻŌmā mo ʻene ongo mātuʻá ʻi he taimi naʻe taʻu valu aí. Hili pē ha ngaahi taʻu siʻi mei he mali ʻa ʻŌmā mo hono ʻofaʻangá, naʻá na hiki ki he ʻIunaiteti Siteití. Naʻe ʻosi ngāue pē ʻa ʻŌmā ʻi he fakamafola leá, ko ia naʻe fakangāueʻi ia ʻe he Siasí ʻi he 1973 ʻo ne hoko ko ha tokotaha liliu lea ʻi he lea faka-Sipeiní ʻi he konifelenisi lahí.

ʻŪ taá naʻe fai ʻe Mark J. Davis, Craig Dimond, Kent Miles, mo Craig J. Law