Ko Hono Tataki Koe ki ʻApí
Mei ha lea ʻi he konifelenisi lahi ʻo ʻEpeleli 2010.
ʻOku finangalo ʻetau Tamai Hēvani ʻofá ke toe foki ange ki ʻapi kiate Ia ʻa ʻEne fānau fakalaumālie kotoa pē. Naʻá Ne fekauʻi mai Hono ʻAlo ko Sīsū Kalaisí ke tofa ha hala ʻoku malú. Naʻá Ne toe tuku foki ha kau faifakahinohino mo ha kau faifakahaofi moʻui ke tokoniʻi ʻEne fānaú ʻi he halá. ʻOku hoko ʻa e mātuʻá, ngaahi tuongaʻané mo e tuofāfiné, kuí, mehikitangá, mo e faʻē-tangatá ko ha kau faifakahinohino mo ha kau faifakahaofi moʻui ivi mālohi.
ʻOku tokoni foki mo kinautolu ʻoku ngāue he Palaimelí ʻi hono tataki ʻo e fānaú. ʻI he kei talavou ange ʻa ha fefine ʻe taha, naʻá ne kau ʻi he poate lahi ʻa e Palaimelí ʻo tokoni ʻi hono faʻu ʻo e moto ʻa e FKT. Naʻá ne faiako ʻi he Palaimeli hono uōtí ʻo aʻu ki he mei hoko hono taʻu 90. Naʻe lava pē ke ongoʻi ʻe he fānau īkí ʻene ʻofa ʻiate kinautolú. Kae mahulu angé ʻa ʻenau ako ke ongoʻi mo ʻiloʻi ʻa e Laumālie Māʻoniʻoní koeʻuhí pē ko ʻene faʻifaʻitakiʻangá.
ʻI he hoʻatā ʻe taha naʻe ʻave ai ʻe hoku uaifí ʻema tamasiʻi lahi tahá ki he ʻapi ʻo ha fefine naʻá ne akoʻi ia he laukongá. Naʻe fie maʻu ke u foki mai mei he ngāué ʻo ʻomi ia ki ʻapi.
Naʻe tuku vave ʻene kalasí mei he taimi ne mau ʻamanaki ki aí. Naʻá ne loto falala pē ʻokú ne ʻiloʻi ʻa e hala ki ʻapí. Ko ia naʻá ne kamata ke lue lalo. Hili haʻane lue he meimei kilomita ʻe taha, naʻe kamata ke fakapoʻuli. Naʻá ne kei fuʻu mamaʻo mei ʻapi.
Naʻe nenefu ʻene sio ki he maama ʻo e ngaahi kā naʻe lele fakalaka hake aí ʻi heʻene tangí. Naʻá ne ʻiloʻi ʻokú ne fie maʻu tokoni. Ko ia naʻá ne mavahe mei he halá peá ne maʻu ha feituʻu ke ne tūʻulutui ai.
Naʻá ne fanongo ʻi he ʻuluʻakaú ki ha leʻo naʻe haʻu fakahangatonu kiate ia. Ko ha ongomeʻa naʻa na fanongo mai ki heʻene tangí. Naʻá na pehē ange, “ ʻE lava ke ma tokoni atu?” Naʻá ne talaange ʻokú ne hē pea ʻoku fie ʻalu ki ʻapi. Naʻá na ʻeke ange pe ʻokú ne ʻiloʻi e fika telefoni hono ʻapí mo e tuʻasilá. Naʻe ʻikai. Naʻá na ʻave ia ki hona ʻapí ʻa ia naʻe ofi mai pē ai. Naʻá na ʻilo homau hingoa fakafāmilí ʻi ha tohi telefoni.
ʻI heʻeku maʻu e telefoní, ne u lele ke fakahaofi ia, mo e loto houngaʻia naʻe ʻi ai ha kakai angaʻofa naʻe nofo atu ʻi he hala ki hono ʻapí. Pea ne u houngaʻia maʻu pē ne akoʻi ia ke lotu ʻi he loto tui ʻe ʻi ai e tokoni ʻi he taimi ʻe hē aí.
ʻOku ou fakamoʻoni ʻoku ʻofa ʻa e ʻEikí ʻiate kimoutolu mo e fānau kotoa pē ʻa e ʻOtuá. ʻI hoʻomou muimui ki he fakahinohino fakalaumālie ʻi he Siasi moʻoni ko ʻeni ʻo Sīsū Kalaisí, ʻe lava ke mou aʻu lelei ki hotau ʻapi mo e Tamai Hēvaní mo e Fakamoʻuí.
Tā fakatātaaʻi ʻe Jennifer Tolman; faitā ʻa Robert Casey