Manatua ʻo ha Ngaahi Moʻui Maʻongoʻonga
Mele Filitingi Sāmita
Naʻe nofo pē ʻa e fefine Siasi moʻui faivelenga ko ʻeni ko Mele Filitingi Sāmitá mo ha kiʻi fānau naʻe kei iiki lolotonga ʻa e ʻi he Fale Fakapōpula Lipetií hono husepānití ʻi he faʻahitaʻu momoko ʻo e 1838–39. Ne ʻohofi hono ʻapí ʻe ha kau fakatanga, pea naʻe siʻi meimei mate ai ʻene tamasiʻí. Naʻe hoko ʻa Mele ko ha uitou ʻi he taimi naʻe fakapoongi ai hono husepāniti ko Hailamé ʻi he Fale Fakapōpula ko Kātesí he ʻaho 27 ʻo Sune 1844. Ne fuesia fakataha ʻe Mele mo ʻEma Sāmita ha ngaahi faingataʻa lahi mo hona ongo husepānití, ʻa Hailame mo Siosefa Sāmita. ʻOku lau ʻa Mele he ʻahó ni ko e taha ʻo e kau tahaʻi paionia toʻa ʻo e Siasí ʻi he kamataʻangá.
Naʻe mali ʻa Mele mo Hailame Sāmita ʻi he ʻaho 24 ʻo Tīsema 1837. Naʻe mate fāʻele ʻa Selusa, ko e ʻuluaki uaifi ʻo Hailamé, pea tauhi pē ʻe Mele ʻa e kiʻi fānau ʻa Hailamé ʻo hangē pē haʻane fānau tonú. Ne ʻi ai foki mo ha fānau ʻe ua ʻa Hailame mo Mele, kau ai ʻa Siosefa F. Sāmita, naʻe hoko kimui ange ko e Palesiteni hono ono ʻo e Siasí.
ʻI he taimi naʻe mavahe ai e Kāingalotú mei Nāvū ki he Teleʻa Sōlekí hili hono fakapoongi ʻo Siosefa mo Hailamé, naʻe fakapapauʻi ʻe Mele te ne kau he fonongá. Naʻe vahe ia mo hono fāmilí ki ha kulupu fononga ʻe taha, pea naʻe fakahā ange ʻe he takí ʻoku ʻikai totonu ke ne feinga ke kau he fononga faingataʻá ni he te ne hoko ko ha fakakavenga ki he niʻihi kehé. Naʻe tali ange ʻe Mele, “Te u ʻuluaki aʻu au ki he teleʻá ʻiate kimoutolu pea he ʻikai foki te u kole tokoni atu.”1 Naʻe faingataʻa moʻoni e fonongá, ka naʻá ne tūʻuta mo hono fāmilí ki Sōleki ʻi he ʻaho 23 ʻo Sepitemá, 1848, ko ha ʻaho ia ʻe taha ki muʻa pea toki aʻu atu ʻa e taki fononga naʻe fakaveiveiua he teu fononga ʻa Melé.
Naʻe kei ngāue faivelenga pē ʻa Mele Filitingi Sāmita ʻo aʻu ki he ngataʻanga ʻo ʻene moʻuí. Naʻa mo ʻene masivá, naʻá ne totongi vahehongofulu pē. ʻI hano fokotuʻu ange ʻe ha taha naʻe ʻikai totonu ke ne foaki ha vahe hongofulu ʻe taha ʻo e pateta naʻá ne tō he taʻu ko iá, naʻá ne taliange, “ ʻOku totonu ke ke mā ʻi he lea ʻokú ke faí. Meʻa ní te ke taʻofi ʻa e tāpuakí meiate au? … ʻOku ou totongi ʻeku vahehongofulú, ʻo ʻikai koeʻuhi pē ko ha fono ia ʻa e ʻOtuá, ka koeʻuhí ʻoku ou ʻamanaki atu ke maʻu ai ha tāpuaki.”2 Naʻá ne fokotuʻu ha faama ʻi he Teleʻa Sōlekí pea akoʻi ʻa e ongoongoleleí ki heʻene fānaú. Ne toki pehē ʻe Palesiteni Siosefa F. Sāmita ki mui, “Naʻá ne ʻosi akoʻi au ʻi he [fakaʻapaʻapá], mo e [ʻulungāanga leleí], mo e moʻoní, mo e [angatonu ki he] puleʻanga ʻo e ʻOtuá, pea naʻe ʻikai ngata pē ʻi heʻene akoʻi au ʻaki ʻa e [akonakí] ka ʻi he [faʻifaʻitakiʻanga] foki.”3
Taupotu ki ʻolungá: Ko e kolosi ʻa Mele Filitingi Sāmita ʻi he ngaahi potu tokaleleí. ʻI ʻolungá: Ko Siosefa F. Sāmita mo e kau mēmipa ʻo e fāmilí ʻi he ʻapi ʻo Mele Filitingi Sāmita ʻi Sōleki Sití, ʻi he 1910 nai.