ʻOku taʻofi ʻe he Siasí ʻa e ʻū keimi vitiō kotoa pē pe ko e ʻū keimi pē ʻoku lahi ai e tāmaté?

ʻOku lahi e ngaahi keimi vitiō maʻá, nau siviʻi ai ʻetau fakakaukaú, mo fakafiefia, pea ʻe lava pē ke fai ha ʻū keimi ʻoku kau ki ai ha tokolahi ke hoko ko ha ʻekitivitī fakasōsiale fakafiefia. ʻOku ʻikai fakafepakiʻi ʻe he Siasí ʻa e ʻū keimi vitioó, ka ʻoku naʻinaʻi atu ki he toʻu tupú ke nau fakapotopoto ʻi hono fili ʻo e ʻū keimí pea mo e lahi ʻo e taimi ʻoku nau fakaʻaongaʻi ki aí. Kuo ʻosi fekau ke tau fakaʻaongaʻi fakapotopoto hotau taimí (vakai, T&F 60:13). ʻOku ʻikai pehē ko ʻene maʻa pē mo fakafiefia ha faʻahinga meʻa pea ʻoku mahuʻinga leva ke fai ʻa e meʻa ko iá.

Naʻe fakamatala ʻa ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē: “Ko e taha ʻo e ngaahi founga ʻoku fakavaivaiʻi ʻaki ʻe Sētane … ho ivi fakalaumālié ko hono fakaʻaiʻai koe ke ke fakamoleki ha konga lahi ho taimí ki hono fai ʻo e ngaahi meʻa ko ia ʻoku ʻikai fuʻu mahuʻingá. Ko ʻeku laú ki he ngaahi meʻa hangē ko e nofo ʻo laulau houa he sio televīsone pe vitioó, vaʻinga keimi vitiō ʻi he pō kotoa pē, [pe] hū holo he ʻInitanetí” (“Be Strong in the Lord,” Ensign, July 2004, 13).

ʻOku sai pē hano fakamoleki ha konga ho taimí ki he vaʻinga he ngaahi keimi vitiō ʻoku fenāpasi mo e ngaahi tuʻunga moʻui ʻoku hā ʻi he Ki Hono Fakamālohia ʻo e Toʻu Tupú. Ka ke fie tuku hifo muʻa e keimí pe tāmateʻi ʻa e komipiutá ka ke hoko atu ki ha meʻa kehe. ʻOua naʻá ke tuku ke hanga ʻe he keimi vitioó ʻo taʻofi koe mei hono fai ʻo e ngaahi ʻekitivitī ʻaongá, hangē ko e fakamālohisinó, ako ki he ongoongoleleí, fai ʻo e ngāue fakaako mei ʻapí, pe ko hao taimi pē ke ke feohi ai mo ho fāmilí.