Ko e hā ʻoku fie maʻu ai ke tau puli kakato ki lalo ʻi he vaí ʻi he taimi ʻoku papitaiso ai kitautolú?

Mahalo pē kuó ke ʻi ha ouau papitaiso naʻe fie maʻu ke fakahoko tuʻo ua ai e ouaú ki he tokotaha naʻe papitaisó he naʻe ʻikai ke ne puli kotoa ki lalo ʻi he vaí ʻi he fuofua taimí. ʻOku mahuʻinga ke fakahoko pau mo totonu ʻa e papitaisó he ko ha ouau fakamoʻui ia.

Ko e papitaisó ko ha fakataipe. ʻOkú ne “fakataipe ʻa e pekiá, tanú, mo e toetuʻú, pea ʻe toki lava pē ke fakahoko ʻi he fakauku” (Bible Dictionary, “Baptism”). ʻOku fakafofongaʻi ʻe he puli hifo ʻi he vaí ʻa e pekia mo hono telio ʻo Sīsū Kalaisí, ka ʻokú ne toe fakafofongaʻi pē foki ʻa e mate fakanatula ʻa hotau sinó (vakai, Loma 6:3–6). ʻOku fakataipe ʻe he toe ʻalu hake mei he vaí ʻa e Toetuʻu ʻa Sīsū Kalaisí pea ʻokú ne fakafofongaʻi ʻe ia ʻa e toe fanauʻi foʻou ʻo hoko ko ʻEne kau ākonga ʻi he fuakavá. ʻOku tokanga ʻa e ongo fakamoʻoni ʻokú na tuʻu ʻi he veʻe vai faiʻanga papitaisó ke fakapapauʻi ʻoku puli kotoa ki lalo ʻa e tokotaha ʻoku papitaisó ʻi he vaí, ko e fakataipe ʻo e toe fanauʻi foʻou kakato.

ʻI he taimi ʻoku papitaiso ai kitautolú, ʻoku tau muimui ai ʻi he sīpinga naʻe tā ʻe he Fakamoʻuí, ʻa ia naʻe papitaiso ʻi he fakauku ʻi he vaitafe Soataní (vakai, Mātiu 3:13–17). ʻOku finangalo e Tamai Hēvaní ke fakamaʻa ʻa ʻEne fānaú takitaha mei heʻenau ngaahi angahalá ke nau lava ʻo toe nofo fakataha mo Ia. Ko e konga mahuʻinga ia ʻo ʻEne palani fakalangí ke tau papitaiso ʻi he fakauku, ʻo hangē ko e papitaiso ʻo Kalaisí.