ʻOku totonu foki ke hoko ʻa e Laumālie Māʻoniʻoní ko hotau takaua maʻu ai pē, ka ʻoku ʻikai te u ʻilo pe ʻoku ou ongoʻi maʻu pē ʻa e Laumālié. ʻOku ʻi ai nai ha meʻa ʻoku fehālaaki ʻiate au?

Kapau ʻokú ke moʻui taau kae ʻikai te ke ongoʻi e Laumālié ʻi he taimi kotoa pē, mahalo pē ʻokú ke kei ako ke ʻiloʻi pea ngāue ʻo fakatatau ki he fakahinohino ʻa e Fakafiemālié. Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē, “ʻOku aʻu pē ki heʻetau feinga ko ia ke faivelenga mo talangofuá, ʻoku ʻi ai ha ngaahi taimi ia ʻoku ʻikai ke tau faʻa mateuteu ai ke fakatokangaʻi ʻi heʻetau moʻuí ʻa e fakahinohino, fakapapau mo e nonga ʻo e Laumālié” (“Ke ʻIate Kitautolu Maʻu Ai Pē ʻa Hono Laumālié,” Liahona, Mē 2006, 28).

Kapau ʻoku ʻikai te ke ʻiloʻi pe ʻoku ʻiate koe ʻa e Laumālie Māʻoniʻoní, kiʻi fakalongolongo hifo ʻi ha momeniti ʻo fakafanongo. Te ke ala ongoʻi e ivi tākiekina ʻo e Laumālié ko ha ongo vaivai, nonga mo e ʻilo fakapapau. Feinga ke ke ʻiloʻi ʻa e kihiʻi leʻo siʻí ʻi he taimi ʻokú ke fai ai e ngaahi meʻa ʻoku nau fakaafeʻi mai ʻa e Laumālié, hangē ko e lotú, ako folofolá, pe ʻalu ki he houalotu sākalamēnití. ʻI hoʻo ngāue ʻo fakatatau ki he ngaahi ueʻi ʻa e Laumālié peá ke ako ke ke fakafanongo ki he Laumālié, ʻe lelei ange ai ʻa hoʻo malava ko ia ke ʻiloʻi ʻa e ngaahi ongo leʻosiʻi mo vaivai ko iá.

Kuo pau ke ke moʻui taau ke ʻiate koe ʻa e Laumālié (vakai, Mōsaia 2:36). Kapau ʻoku ʻikai te ke ongoʻi ʻa e ivi ʻo e laumālié ʻi hoʻo moʻuí, mahalo ko ha fakatokanga ʻeni ʻoku fie maʻu ke ke fakatomala pea toe vakavakaiʻi e ngaahi meʻa ʻoku muʻomuʻa mo mahuʻinga kiate koé. Te ke lava ʻo fakaafeʻi mai ʻa e Laumālié ki hoʻo moʻuí ʻaki haʻo fakatomala moʻoni, lotu, ako folofola, mo ha toe ngaahi ʻekitivitī fakatupulaki kehe pē.