Mesazhi i Presidencës së Parë
Premtime të Çmuara të Librit të Mormonit
Shumë vite më parë, qëndrova pranë shtratit të një ati të ri, që ishte duke dhënë shpirt. Bashkëshortja e tij e shqetësuar dhe dy fëmijët e tyre qëndronin pranë. Ai më mori dorën në dorën e tij dhe, me përgjërim, tha: “Peshkop, e di që po vdes. Më thuaj çfarë do të ndodhë me shpirtin tim, kur të vdes?”
U luta për udhëheqje qiellore dhe vura re në tavolinën pranë shtratit të tij, një kopje të kombinimit tresh. U zgjata për [të marrë] librin dhe shfletova faqet. Befas zbulova se, pa ndonjë përpjekje nga ana ime, kisha ndalur tek kapitulli i 40-të i Almës në Librin e Mormonit. I lexova atij këto fjalë:
“Vër re, mua m’u bë e ditur nga një engjëll që shpirtrat e të gjithë njerëzve, posa të largohen nga ky trup i vdekshëm, … çohen në shtëpi tek ai Perëndi që u dha atyre jetë.
Dhe … shpirtrat e atyre që janë të drejtë pranohen në një gjendje lumturie që quhet parajsë, një gjendje e pushimit, një gjendje e paqes, ku ata do të prehen nga të gjitha trazirat e tyre dhe nga të gjitha vuajtjet dhe brengat” (Alma 40:11–12).
Ndërsa vazhdova të lexoja mbi Ringjalljen, një ndriçim erdhi në fytyrën e të riut dhe një buzëqeshje hijeshoi buzët e tij. Ndërsa përfundova vizitën, i thashë mirupafshim kësaj familjeje të ëmbël.
I pashë herën tjetër gruan dhe fëmijët në funeral. Mendoj sërish për atë natë kur një burrë i ri u lut për të vërtetën dhe, nga Libri i Mormonit, dëgjoi përgjigjen për pyetjen e tij.
Nga Libri i Mormonit vijnë premtime të tjera të çmuara, përfshirë premtimet e paqes, lirisë dhe bekimet nëse ne “do t’i shërbej[m]ë vetëm Perëndisë së kësaj toke, që është Jezu Krishti” (Ethëri 2:12).
Nga faqet e tij vjen premtimi i “një gjendje[je] lumturie të pafund” për “[ata] që zbatojnë urdhërimet e Perëndisë. Pasi vini re, ata janë të bekuar në të gjitha gjërat, qoftë tokësore ashtu edhe shpirtërore” (Mosia 2:41).
Nga faqet e tij vjen premtimi për “gëzim[ të] paimagjinueshëm” për ata që bëhen “mjet[e] në duart e Perëndisë” për shpëtimin e bijve dhe bijave të Tij të çmuara (Alma 28:8; 29:9).
Nga faqet e tij vjen premtimi se Izraeli i shpërndarë do të mblidhet – një punë në të cilën jemi përfshirë me anë të përpjekjeve tona të mëdha misionare në mbarë botën (shih 3 Nefi 16; 21–22).
Nga faqet e tij vjen premtimi që, kur i lutemi Atit në emrin e shenjtë të Jezu Krishtit, familjet tona do të bekohen (shih 3 Nefi 18:21).
Nga një studim i faqeve të tij, vjen përmbushja e premtimit profetik se “do të vijë në jetën tuaj dhe në shtëpitë tuaja një masë e shtuar e Shpirtit të Zotit, një vendim i forcuar për të ecur në bindje ndaj urdhërimeve të Tij dhe një dëshmi më e fortë për realitetin e gjallë të Birit të Perëndisë”1.
Dhe nga faqet e Librit të Mormonit vjen premtimi i Moronit se, nëpërmjet lutjes, qëllimit të vërtetë dhe besimit në Krisht, ne mund të dimë të vërtetën e këtyre premtimeve “nëpërmjet fuqisë së Frymës së Shenjtë” (shih Moroni 10:4–5).
Bashkë me profetë të tjerë të ditëve të mëvonshme, unë dëshmoj për vërtetësinë e këtij “më të saktit prej cilitdo libër mbi tokë”2, madje Librit të Mormonit, një dëshmi tjetër e Jezu Krishtit. Mesazhi i tij përshkon tokën dhe i sjell lexuesit tek një dijeni e së vërtetës. Është dëshmia ime se Libri i Mormonit ndryshon jetën. Secili prej nesh e lexoftë dhe e rilexoftë atë. Dhe ne ndafshim me gëzim dëshmitë tona për premtimet e tij të çmuara me të gjithë fëmijët e Perëndisë.
Ilustrim me foto nga Christina Smith