Çfarë Mëson Libri i Mormonit mbi Dashurinë e Perëndisë

Nga Plaku Rasëll M. Nelson,

i Kuorumit të Dymbëdhjetë Apostujve

Disa nga shembujt më madhështorë të dashurisë së Zotit janë shënuar në Librin e Mormonit.

Shumica e të krishterëve janë njohur me tiparet e Jezu Krishtit siç tregohen në Bibël. Ata mahniten me dashurinë që Ai tregoi për të varfrin, të sëmurin dhe të munduarin. Ata që e konsiderojnë veten dishepujt e Tij, gjithashtu përpiqen fort të marrin shembullin e Tij dhe të ndjekin nxitjen e Apostullit të Tij të dashur: “Le ta duam njëri-tjetrin, sepse dashuria është nga Perëndia dhe kushdo që do, ka lindur nga Perëndia dhe e njeh Perëndinë. … Sepse Perëndia është dashuri” (1 Gjoni 4:7–8).

Ky koncept qartësohet nga Libri i Mormonit. Ai përshkruan se si lindet njeriu nga Perëndia dhe se si fiton njeriu fuqinë që të dojë ashtu si Ai do. Ai dallon tre parime thelbësore që sjellin fuqinë e dashurisë së Perëndisë në jetën tonë.

Së pari, Libri i Mormonit na mëson se, ushtrimi i besimit në Krisht dhe hyrja në një besëlidhje me Të për të mbajtur urdhërimet e Tij, është çelësi për të rilindur shpirtërisht. Njerëzve të Librit të Mormonit, të cilët e bënë një besëlidhje të tillë, Mbreti Beniamin u përmendi: “Dhe tani, për shkak të besëlidhjes që keni bërë, ju do të quheni fëmijët e Krishtit, bijtë e tij dhe bijat e tij; pasi vini re, në këtë ditë ai ju ka lindur juve shpirtërisht; meqë ju thoni se zemrat tuaja janë ndryshuar nëpërmjet besimit në emrin e tij; prandaj, ju keni lindur prej tij dhe jeni bërë bijtë e tij dhe bijat e tij” (Mosia 5:7).

Së dyti, Vetë Shpëtimtari jep mësim se fuqia për t’u bërë më tepër si Ai vjen nëpërmjet marrjes së ordinancave të ungjillit: “Tani, ky është urdhërimi: Pendohuni, të gjitha ju skajet e tokës dhe ejani tek unë dhe pagëzohuni në emrin tim, që të shenjtëroheni nëpërmjet marrjes së Frymës së Shenjtë, që të mund të qëndroni pa njollë para meje, në ditën e fundit” (3 Nefi 27:20).

Së treti, Ai na këshillon të ndjekim shembullin e Tij: “Çfarë lloj njerëzish duhet të jeni?” Pyet Ai në mënyrë retorike. Përgjigjja e Tij: “Në të vërtetë, unë ju them juve, madje siç jam unë” (3 Nefi 27:27). Vërtet, Ai dëshiron që ne të bëhemi më shumë si Ai.

Disa nga shembujt më madhështorë të dashurisë së Tij janë shënuar në Librin e Mormonit. Këta shembuj mund të zbatohen në jetën tonë ndërsa përpiqemi fort të bëhemi më shumë si Zoti.

Ishte dashuria e Tij për Lehin dhe familjen e Lehit – dhe dashuria e tyre për Të – që i solli ata në Amerikë, toka e tyre e premtuar, ku ata u begatuan.¹

Ishte dashuria e Perëndisë për ne që e nxiti Atë shekuj më parë që t’i urdhëronte profetët nefitë për të mbajtur një anal të shenjtë të popullit të tyre. Mësimet nga ai anal kanë të bëjnë me shpëtimin dhe ekzaltimin tonë. Këto mësime janë të disponueshme tani në Librin e Mormonit. Ky tekst i shenjtë qëndron si provë e prekshme e dashurisë së Perëndisë për të gjithë fëmijët e Tij në mbarë botën.²

Ishte dashuria e Krishtit për “delet e tjera” të Tij që e solli Atë te Bota e Re.³ Nga Libri i Mormonit mësojmë se, në Botën e Re pas vdekjes së Zotit në Botën e Vjetër, ndodhën fatkeqësi të mëdha natyrore dhe tre ditë errësire. Pastaj, Zoti i përlëvduar dhe i ringjallur, zbriti nga qielli dhe shërbeu mes njerëzve të Botës së Re.

“Unë jam drita dhe jeta e botës”, u tha Ai atyre, “dhe unë kam pirë nga ajo kupë e hidhur që Ati më dha dhe kam lartësuar Atin, duke marrë përsipër mëkatet e botës” (3 Nefi 11:11).

Pastaj, Ai u dha një nga përvojat më të afërta që ndokush mund të kishte me Të. Ai i ftoi të ndienin plagën në anën e Tij dhe gjurmët e gozhdëve në duart e këmbët e Tij, që ata ta dinin me siguri se Ai është “Perëndia i Izraelit dhe Perëndia i tërë tokës dhe se [ishte vrarë] për mëkatet e botës” (3 Nefi 11:14).

Jezusi u dha pastaj dishepujve të Tij autoritetin për të pagëzuar, për të dhënë dhuratën e Frymës së Shenjtë dhe për të administruar sakramentin. Ai u dha atyre fuqinë për të krijuar Kishën e Tij mes tyre, udhëhequr nga dymbëdhjetë dishepuj.

Ai u dha atyre disa nga mësimet themelore që u kishte dhënë dishepujve të Tij në Botën e Vjetër. Ai shëroi të sëmurët e tyre. Ai u gjunjëzua dhe iu lut Atit me fjalë kaq të fuqishme e të shenjta, saqë nuk mund të shkruheshin. Kaq e fuqishme qe lutja e Tij, saqë ata që e dëgjuan Atë u pushtuan nga gëzimi. I pushtuar nga dashuria e Tij për ta dhe nga besimi i tyre tek Ai, Jezusi Vetë qau. Ai profetizoi për punën e Perëndisë në shekujt që do të çojnë tek mbërritja e premtuar e Ardhjes së Tij të Dytë.⁴

Pastaj Ai u kërkoi të sillnin fëmijët e tyre tek Ai.

“Dhe ai i mori fëmijët e tyre të vegjël, një nga një, dhe i bekoi dhe iu lut Atit për ta.

Dhe pasi e bëri këtë gjë, ai qau përsëri;

Dhe i foli turmës dhe u tha atyre: Vini re të vegjlit tuaj.

Dhe si u kthyen të shikonin, ata hodhën sytë drejt qiellit dhe panë qiejt të hapen; dhe panë engjëj që po zbritnin nga qielli sikur të ishin në mes të një zjarri; dhe ata zbritën dhe rrethuan të vegjlit e tyre, … dhe engjëjt u shërbyen atyre” (3 Nefi 17:21–24).

E tillë është dëlirësia dhe fuqia e dashurisë së Perëndisë, siç zbulohet në Librin e Mormonit.

Në këto ditë të mëvonshme, ne që kemi privilegjin të kemi Librin e Mormonit, të jemi anëtarë të Kishës së Zotit, të kemi ungjillin e Tij dhe të mbajmë urdhërimet e Tij, dimë diçka për dashurinë e pafund të Perëndisë. Ne dimë se si ta bëjmë tonën dashurinë e Tij. Kur bëhemi dishepujt e Tij të vërtetë, fitojmë fuqinë të duam ashtu si Ai do. Kur i mbajmë urdhërimet e Tij, ne bëhemi më shumë si Ai. Ne zgjerojmë qarkun tonë personal të dashurisë duke iu drejtuar njerëzve të çdo kombi, fisi dhe gjuhe.

Me mirënjohje të thellë për jetën e Tij shembullore, ne mund ta bëjmë standardin tonë këtë shkrim të shenjtë: “Lutiuni Atit me gjithë fuqinë e zemrës suaj, që të mbusheni me këtë dashuri që ai ua jep të gjithë atyre që janë pasues të vërtetë të Birit të tij Jezu Krisht; që ju të mund të bëheni bijtë [dhe bijat] e Perëndisë; që kur ai të shfaqet, ne të jemi si ai, pasi ne do ta shohim atë ashtu sikurse është” (Moroni 7:48).⁵

Shënime

1. Shih 1 Nefi 17:35–44; Mosia 7:20; Alma 9:9–11; 3 Nefi 5:20–22.

2. Shih faqja e titullit e Librit të Mormonit; 1 Nefi 13:35–41; 2 Nefi 33:4; Mosia 1:2–7; Mormoni 8:13–41.

3. Shih Gjoni 10:16; 3 Nefi 15:11–24.

4. Shih 3 Nefi 11–14; 18–20.

5. Krahaso 1 Gjoni 3:1–3.

Një Profet Dëshmon

“Libri i Mormonit ka dalë në dritë nëpërmjet dhuratës dhe fuqisë së Perëndisë. Ai flet si një zë nga pluhuri në dëshmi për Birin e Perëndisë. Ai flet për lindjen e Tij, shërbesën e Tij, Kryqëzimin e Ringjalljen e Tij dhe për shfaqjen e Tij tek të drejtët në tokën Begati në kontinentin Amerikan.

Është një gjë e prekshme që mund të trajtohet, që mund të lexohet, që mund të provohet. Ai mbart brenda kapakëve të tij një premtim për origjinën e tij hyjnore. Miliona njerëz e kanë vënë atë në provë dhe kanë gjetur se është një anal i vërtetë dhe i shenjtë.”

Presidenti Gordon B. Hinkli (1910–2008), “The Great Things Which God Has Revealed”, Liahona, maj 2005, f. 81–82.

Të Njohësh Është të Njohësh Dashurinë

Jam një anëtare e re e Kishës së Jezu Krishtit të Shenjtorëve të Ditëve të Mëvonshme dhe për mua Libri i Mormonit nuk është thjesht një libër. Është një provë e fortë se Ati Qiellor na do. Është provë se shenjtorët e hershëm na donin dhe dëshironin që ne të vinim në shtëpi. Është provë se plani i Perëndisë i lumturisë ekziston dhe është i përkryer.

Të dish se ky libër është i vërtetë është të dish se Ati Qiellor dhe Biri i Tij jetojnë. Është të dish se jeta është e bukur dhe e përjetshme. Është të dish se, për aq kohë sa vazhdon të përpiqesh të jesh më e mira e mundshme dhe të pendohesh kur bie, gjithmonë do të marrësh falje. Është të dish kuptimin e vërtetë të familjes. Është të dish se nuk do ta humbasësh kurrë një njeri të dashur, kur ai ose ajo pret për ty. Është të njohësh bekimet e Atit Qiellor. Është të njohësh ngushëllimin se, çfarëdo stuhie të të vijë në jetë, ti mund ta përballësh atë, pasi është për përfitimin tënd. Është të dish se Fryma e Shenjtë është shoqëruesi yt i përhershëm. Në thelb, është të njohësh dashurinë në të gjitha shprehjet e saj.

Ema Adesania, Irlandë

Dallimi i Fuqisë së Dashurisë së Tij

Kur u bashkova me Kishën gjatë vitit tim të parë në universitet, u ndjeva mirë për ndryshimet që po bëja në mënyrën time të jetesës dhe pashë se sa shumë e përmirësoi ungjilli jetën time. Megjithatë, shpejt ndjeva se e kaluara ime po pengonte çfarëdo përparimi që mund të bëja. Si mundej të më përdorte mua Ati Qiellor për të ndihmuar në ndërtimin e mbretërisë së Tij kur kisha bërë kaq zgjedhje të dobëta?

Pastaj një ditë hapa Librin tim të Mormonit tek faqja e fundit fare. Lexova fjalët e ndarjes së Moronit: “Po, ejani te Krishti dhe përsosuni në të … dhe në qoftë se do t’i mohoni vetes çdo ligësi dhe ta doni Perëndinë me gjithë fuqinë, mendjen dhe forcën tuaj, atëherë hiri i tij mjafton për ju, se me anë të hirit të tij ju mund të bëheni të përsosur në Krisht; dhe në qoftë se për hir të Perëndisë ju jeni bërë të përsosur në Krisht, ju nuk mund të mohoni në asnjë mënyrë pushtetin e Perëndisë” (Moroni 10:32). I vështrova ngultas ato fjalë. Ndjeva Shpirtin të më thoshte se ishin të vërteta. Kuptova se po kufizoja fuqinë e Perëndisë duke hamendësuar se Ai nuk mund të më përdorte në ndonjë mënyrë që e shihte të përshtatshme.

Vendosa se, që atëherë e tutje, nuk do të “moho[ja] … pushtetin e Perëndisë”, por do ta pranoja të shkuarën time dhe do ta prisja me padurim të ardhmen time. Sa më shumë përqendrohesha tek e ardhmja ime në vend të së shkuarës dhe i mirëbesoja hirit shenjtërues të Jezu Krishtit, aq më shumë ndieja dashurinë e Shpëtimtarit për mua dhe aq më i lumtur isha me veten.

Kristi Petei, Uashington, SHBA

Vetë Shpëtimtari jep mësim se fuqia për t’u bërë më tepër si Ai vjen nëpërmjet marrjes së ordinancave të ungjillit.

Pastaj Ai u kërkoi të sillnin fëmijët e tyre tek Ai. “Dhe ai i mori fëmijët e tyre të vegjël, një nga një, dhe i bekoi dhe iu lut Atit për ta.”

Shfaqja e Krishtit në Hemisferën Perëndimore, nga Arnold Friberg © 1995 IRI

Alma duke Pagëzuar në Ujërat e Mormonit, nga Arnold Friberg

Jezu Krishti Viziton Amerikat, nga John Scott