Savali a le Au Peresitene Sili
Ia I Ai Pea Lava i le Ogatotonu
O le tele lava o kalena i le lalolagi, o Iulai e faailoga ai le ogatotonu o le tausaga. E ui o le amataga ma le faaiuga o mea e faamanatuina ma manatuaina, a o le ogatotonu o mea e masani lava ona le amanaiaina.
O amataga, o taimi ia mo le faia o tonu mautu, mo le fatufatuina o fuafuaga, mo le osooso ae o le malosi. O faaiuga, o taimi mo le taufaaiuiuga ma e ono aofia ai lagona o le atoatoa po o le toilalo. Ae o le faatasi ai ma se vaaiga talafeagai, ma mafaufau ai o loo tatou i ai lava i le ogatotonu o mea, o le a fesoasoani lea ia i tatou e le gata i lo tatou malamalama atili ai i le olaga ae faapea foi le ola ai i se tulaga e sili atu ona ‘anoa.
O Le Ogatotonu o Galuega Faafaifeautalai
Pe a ou talanoa atu i o tatou faifeautalai talavou, e masani lava ona ou ta’u atu ia i latou o loo latou i ai i le ogatototonu o a latou misiona. E tusa lava pe faatoa taunuu mai ananafi pe o le a toe foi i le aiga a taeao, ou te talosagaina lava i latou e mafaufau o loo latou i ai pea i le ogatotonu.
Atonu e lagona e faifeautalai fou le le lava o lo latou iloa e avea ai ma se tagata mataalia, ma o lea ua faatuai ai lo latou tautatala atu po o le galulue ma le mautinoa ma le lototele. E ono lagona e faifeautalai ua lava le tomai ma ua lamalama faaiu a latou misiona le faanoanoa ona o le a lata ona uma a latou misiona, pe atonu foi o le a latou faifaiaga ao manatunatu i mea o le a latou faia pe a uma a latou misiona.
Po o a lava tulaga ma po o fea foi o loo latou auauna atu ai, o le mea moni lava o loo totoina i aso uma e faifeautalai a le Alii ia fatu laau e le mafaitauina o tala e lelei. O le mafaufau ia i latou lava o loo i ai pea i le ogatotonu o a latou misiona o le a uunaia ma faamalolosia ai nei sui faamaoni o le Alii. E faapei lava ona i ai i faifeautalai faamisiona, e faapena foi i tatou uma.
Tatou Te I Ai Pea Lava i le Ogatotonu
O lenei suiga o le vaaiga e sili atu nai lo se faavaleaina o le mafaufau. O loo i ai se upumoni musuia e i tua atu o le manatu faapea tatou te i ai pea lava i le ogatotonu. Afai tatou te vaai i lo tatou nofoaga i se faafanua, e faaosoosoina i tatou e faapea mai o loo tatou i ai i le amataga. Peitai a tatou matuai vaai toto’a i ai, soo se mea lava o tatou i ai ua na o se ogatotonu lava o se nofoaga e sili atu le tele.
E faapei ona i ai i le vanimonimo, e faapena foi le taimi. Atonu tatou te lagona faapea o loo tatou i ai i le amataga po o le faaiuga o o tatou olaga, peitai a tatou vaai i le mea o tatou i ai, i luma mai o se faatulagaga o le faavavau—a oo ina tatou iloa na i ai lava o tatou agaga mo se taimi i tala atu o lo tatou malosi e fuaina ai ma, ona o le ositaulaga atoatoa ma le Togiola a Iesu Keriso, o le a mafai ai ona ola pea o tatou agaga mo le faavavau atoa—e mafai ona tatou iloa o loo tatou i ai moni lava i le ogatotonu.
Talu ai nei lava sa uunaia ai au e toe fai le maa faamanatu o le tuugamau o o’u matua. Sa agaleaga le taimi i le tuugamau, ma sa ou lagona o le a sili atu le talafeagai o se maa faamanatu fou mo o laua olaga o faataitaiga. Ina ua ou vaai i aso fanau ma aso na maliliu ai i luga o le maa faamanatu sa faafesootai i se tamai vase masani lē taua, sa faafuasei ona faatumulia lo’u mafaufau ma lo’u loto i le tele o manatuaga taua ona o lenei faailoga laitiiti o le olaga atoa. Na atagia mai i nei manatuaga taua taitasi se taimi ogatotonu o olaga o o’u matua faapea foi ma le ogatotonu o lo’u olaga.
Po o le a lava lo tatou matutua, po o fea foi lo tatou nofoaga, pe a tutupu mea i o tatou olaga, tatou te i ai pea lava i le ogatotonu. Ma le isi mea, o le a tatou i ai pea lava e faavavau i le ogatotonu.
O Le Faamoemoe o le I Ai i le Ogatotonu
Ioe, o le a i ai i o tatou olaga atoa ia taimi amata ma taimi faaiu, peitai ua na o ni faailoga ia o le ogatotonu maoae o o tatou olaga e faavavau. E tusa lava pe o tatou i ai i le amataga po o le faaiuga, pe tatou te talavou pe matutua, e mafai ona faaaoga i tatou e le Alii mo Ona faamoemoega pe afai tatou te faataatia ese soo se manatu e faatapulaa ai lo tatou agavaa ina ia auauna atu ma faatagaina Lona finagalo e faafuaitinoina o tatou olaga.
Fai mai le fai Salamo, “O le aso lenei ua faia e le Alii; e [tatau] ona olioli ma fiafia i ai” (Salamo 118:24). Ua toe faamanatu mai ia i tatou e Amoleka e faapea “o le olaga lenei o le taimi lea mo tagata e saunia ai e feiloai ma le Atua; ioe, faauta o le aso o le olaga lenei o le aso lea mo tagata e fai ai a latou galuega” (Alema 34:32; ua faaopoopo le faamamafa). Ma ua faaupuina e se fatusolo, “O le faavavau—e fatuina i Taimi Nei.”1
O le i ai pea lava i le ogatotonu o lona uiga e lei maea le taaloga, e lei uma le faamoemoe, o le toilalo e le o le taunuuga lea. Aua tusa lava po o fea o tatou i ai po o a foi o tatou tulaga, o loo i ai pea lava i o tatou luma ia amataga ma faaiuga e faavavau.
Tatou te i ai pea lava i le ogatotonu.
Aoaoina Atu o Lenei Savali
Mafaufau e talanoa ma le aiga i le auala e mafai ona latou “i ai pea lava i le ogatotonu,” e tusa lava pe o latou amataina pe o faaiuina se mea. Faamalosiau ia i latou e fai le mea sili latou te mafaia i a latou gaoioiga o i ai nei, aua le nofoai i mea ua tuanai pe faatalitali mo le isi gaoioiga po o galuega faatino. Atonu e te fia fautuaina i latou e filifili se mea se tasi e mafai ona latou faia faatasi o se aiga e faatino ai lenei aoaoga ma faatulaga se aso latou te faamoemoe e ausia ai le latou sini.
Atapue © Shutterstock
O LE SELESELEGA A LE ALII, SAUNIA E Marilee B. Campbell; ata na saunia e Bryan Beach