O Se Musumusu o le Agalelei
“Ia alofa atu i e o fai outou mo latou fili, ia agalelei atu i e ita mai ia te outou” (Luka 6:27).
“O lea ua i ai iinei Tasone i le asō,” sa fai mai ai le tina o James, ma faasino atu i se tamaitiiti i le alasavali i talaane o le potu o le Peraimeri.
Sa melotagi ia James. Sa ofu e Tasone se ofuvae li ma se mitiafu tuai. Sa iloa e James e le mafai lava ona faataga o ia e lona tina ma lona tama e ofu se ofu faapena i le lotu, ae la te le faatagaina foi o ia e fai le tele o isi mea sa faia e Tasone.
O le vaiaso ua tea i le aoga, sa tuli ese ai Tasone mai le vasega i le taliupu i le faiaoga. Na te faalilia lava James i le auala e fai ai ona ofu, ma faaita o ia i le avea ai ma tamaitiiti aupito sili ona puupuu i le aoga.
“Ae faapefea pe a ia faataio atu ia Sister Win pe amata se vevesi?” Sa fesili atu ai James.
“Ou te mautinoa o le a lelei lava mea uma,” sa fai atu ai Tina. “E le i alu lava Tasone i se lotu, ma e masalo o loo popole o ia.”
Ina ua amata le vasega, sa fesili mai Sister Win pe o ai na aumai a latou tusitusiga paia. Sa sii le lima o James faatasi ai ma le toatele o le vasega, ae sa lulu mai le ulu o Tasone. Sa foliga ua maasiasi o ia, lea na faateia ai James. E masani lava ona faia e Tasone se tala malie pe a le faia lana meaaoga i le fale. Ae o le faatele lava ona mafaufau i ai o James, o le tele foi lena ona ia manatunatu pe faapeī le alu i se lotu fou mo le taimi muamua.
Sa tuu atu e Sister Win ana tusitusiga paia e faaaoga e Tasone. Ina ua oo atu le faasologa ia Tasone, e faitau se mau sa amata ona popole ia James. Ae faapefea pe a togi e Tasone ia tusitusiga paia i lalo pe musu foi e faitau?
Ae e le i faia lava e Tasone se mea o na mea. Sa ia sioa atu i upu i luga o le itulau ma faanunumi ona foliga. Ina ua mavae sina taimi, sa iloa e James e le lelei tele le faitau a Tasone. Sa le i iloaina muamua e James lenei mea i le aoga.
Sa faasipa atu le ulu o James i a Carson ma musumusu atu, “E moni.”
Sa faateia Tasone, ae sa ia ta’u le upu ma faaauau le faitauina o le fuaiupu. Pe a faigata ona ia ta’ua se upu, e fesoasoani i ai James. I le faaiuga o lana faitauga, sa tilotilo atu ai Tasone ia James ma luelue atu lona ulu.
Sa le mautinoa e James pe o le a ese ai mea i le aoga nai lo lenei. O le mea malie e le i popole i ai o ia. Sa ia lagonaina le fiafia aua ua iloa sa ia fesoasoani i se tamaitiiti sa masani lava ona faatiga atu ia te ia, ma e leai se tasi e mafai ona aveesea lena lagona.
O Le Ala Lena
E mafai ona e i ai i le matou au.
Ata katuni na saunia e Val Chadwick Bagley
Ata na tusia e Craig Stapley