Molimau a Tomasi
“O A’u, le Alii, e tuuina atu ia te outou se molimau o le moni o nei poloaiga ua taatitia i o outou luma” (MF&F 67:4).
O le afiafi faaleaiga, ma ua tofu tagata uma ma se vaega e fai. Sa taitai ia Tina. Sa fai e Tama le lesona. Sa fai e le fanau ia tatalo, musika, ma le gaoioiga—sei vagana ai Tomasi. O le vaiaso lenei ua oo ai le faasologa ia Tomasi e tuu mai ai lana molimau, ma sa tau lagona lona ma.
Sa faasoa muamua mai foi e Tomasi lana molimau, ae ua leva tele, ma sa le mafai ona ia manatuaina mea sa ao ona ia tau mai. Ina ua uma la le pese amata ma le tatalo, sa faanunumi foliga o Tomasi.
“O lou avanoa,” sa faamanatu atu ai e Tina ia te ia.
Sa tilotilo atu Tomasi i fafo i le faamalama i la latou laau lanulauava, ma momoo i se auala na te tau mai ai ia te ia le mea e fai.
Sa nofo i lalo Tama i talaane o Tomasi ma fesili atu ia te ia po o le a le mea ua sese.
“Ou te le iloa po o le a lena mea o le molimau,” sa fai atu lemu ai ia Tomasi.
“Ia e mafai ona ou fesoasoani ia te oe,” o le tala lea a Tama. “O le tauina mai lea ia i tatou o nisi o mea e te iloa e moni po o mea ua e talitonu i ai. E mafai ona e talanoa e uiga i le auala e te fiafia ai e faitau ia tusitusiga paia. E fesoasoani lava lena mea ia te oe e lagona ai le Agaga.”
Ae sa le i lagonaina e Tomasi ua ia saunia. Sa tilotilo atu uma tagata ia te ia, ma faatalitali mo ia e fai se mea. Sa lulu lona ulu. “Ou te le mafaia. Ou te le iloa po o le a lena mea.”
Sa pōpō e Tama le lima o Tomasi. “E le afaina. E mafai ona e faia i se isi taimi.”
Mulimuli ane i lena afiafi sa saofai ai Tomasi i le moega ma uu lana Tusi a Mamona. E sao lava Tama—o le faitauina o tusitusiga paia sa ia maua ai pea lagona lelei atu. Sa ia taumafai e faitau se mataupu i le aso, ae sa amata ona uumi ia mataupu. Sa ia susue ana tusitusiga paia i le 1 Nifae 17.
“O se mataupu umi lena!” Sa musumusu ia Tomasi. Sa fai sina ana tatalo i le Tama Faalelagi ma ole atu mo se fesoasoani. Ona ia maofa lea i le vave o le gasologa o le taimi.
Ao le i tapeina e Tomasi lana moli, sa sau i totonu Tama e faamanuia le po.
“E te mate maia, Tama?”
“O le a, sole?”
“Ou te le i faitauina au tusitusiga paia i le vaiaso atoa ona ua fai si uumi o mataupu. Ae o le po nei sa ou manao ai, o lea sa ou tatalo ai, ma sa fesoasoani mai le Tama Faalelagi. Sa ou faitaua le mataupu atoa, ma sa pei e na o le lima minute. O le tatalo o se mea lelei.”
“Tomasi, e te iloaina le mea lena faatoa e fai mai ai?” Sa fesili atu ai Tama ma ataata. “Ua e faasoa mai lau molimau!”
“E mo’i?” sa fesili atu ai Tomasi. “O le a le uiga o lau tala?”
“Ina ua e talanoa mai e uiga i le tatalo ma le auala na fesoasoani ai ia te oe—o se molimau lena i le tatalo.”
Sa matala le gutu o Tomasi i le ofo tele. Sa ia mafaufau i taimi uma sa aoao ai o ia e tagata e uiga i le molimau. Na ia iloaina sa ia faasoa atu se molimau!
Sa matua fiafia Tomasi ma na pei e ata. Sa ia fusi ia Tama.
“Oka, ua ou faia!” Sa fai atu ai Tomasi. “Tama, e mafai ona ou tuuina atu lau molimau i le vaiaso fou i le afiafi faaleaiga? Ou te iloa e le o so’u avanoa, ae ou te fia talanoa e uiga i le tatalo.”
“Ou te iloa o se manatu sili lena,” sa fai atu ai Tama.
Ina ua tuua e Tama le potu, sa mafaufau Tomasi e uiga i mea uma sa tutupu i lena aso. Sa ia faafetai mo aiga, tusitusiga paia, tatalo, ma le tele o isi mea. I le taimi nei, ua matua sili ona ia faafetai mo se molimau. Sa ia iloa le auala e faasoa atu ai ma lona uiga.
Ata na tusia e Matt Smith