Auaunaga i le Ekalesia
O Le Lesona o Loo i totonu o le Tagata A’oa’o
Pe a oo ina tatou faailoa atu le gafatia maoae o tagata a’oa’o taitoatasi, ua amata ona tatou vaai e pei ona silasila mai le Atua.
Ao ma i ai i se valaauga a le Ekalesia i Cusco, Peru, sa ma auai ai ma lo’u toalua i se vasega tuufaatasi a le Aualofa ma le au Perisitua Mekisateko. O le faiaoga i lena aso o le faiaoga a le vasega matutua o Mataupu Faavae o le Talalelei. Ona o ni faaletonu i le faagasologa o taimi i sauniga muamua e lua, o lea pe sa na o le 20 minute sa totoe mo ia e aoao atu ai mea sa ia saunia.
Sa ia amata i le fai atu i tagata uma o e na auai i le Ekalesia i le lua tausaga ua mavae e tutu i luga. E toalima tagata na tutu. Sa ia tusia i luga o le laupapa le numera 5 ona faapea mai lea, “Uso e ma tuafafine, e ese le matagofie o lo tatou faatasi ai ma nei tagata e toa 5 o e faatoa auai i le Ekalesia. Na pau le faafitauli ona o le lua tausaga ua mavae, sa tatou papatisoina ai le toa 16 o tagata fou na liliu mai i lenei uarota.”
Ona ia tusia lea o le numera 16 i autafa o le numera 5 ma fesili atu ma le naunautaiga tele, “Uso e ma tuafafine, o le a la le tatou mea o le a fai?”
Sa sii le lima o se tina ma fai mai, “E tatau ona tatou o e su’e i latou ma toe aumai.”
Na ioe le faiaoga ona ia tusia lea o le upu laveai i luga o le laupapa. “E 11 o tatou tagata fou e toe aumai,” na ia tali mai ai.
Ona ia faitauina lea o se saunoaga mai ia Peresitene Thomas S. Monson e uiga i le taua o le laveai. Sa ia faitau mai foi mai le Feagaiga Fou e uiga i le auala na saili ai e le Faaola le mamoe na le iloa (tagai i le Luka 15:6). Ona ia fesili mai lea, “O le a la le auala tatou te toe aumaia ai i latou?”
Na o ae i luga lima, ma sa ia tofia auauai tagata o le vasega. Sa tuu mai ni fautuaga a tagata o le vasega i le auala e mafai ai e i latou o se uarota faaleaiga po o tagata taitoatasi ona galulue faatasi e fesoasoani i tagata faatoa liliu mai e toe foi mai i le ekalesia. Ona fesili lea o le faiaoga, “Afai la o loo e savali atu i le alatele ma e vaai atu i se tamaloa e te iloa o se tasi o nei tagata faatoa liliu mai i le isi itu o le auala, o le a lau mea e fai?” Fai mai se tasi o tagata o le vasega, “Ou te kolosi i le isi itu ma faafeiloai ia te ia. Ou te tauina ia te ia o tatou manaoga ina ia toe foi mai ma lo tatou naunau e toe foi mai tatou te mafuta.”
Na ioe isi o le vasega ma ofo mai ni fautuaga faaopoopo patino i le auala e fesoasoani ai i nei tagata o le ekalesia. Sa i ai se naunautaiga i totonu o le potu, o se naunautaiga e faia le mea o loo manaomia ona fai e fesoasoani ai i nei tagata faatoa papatiso ina ia iloa lo latou auala e toe toaaga mai ai.
Sa ma o ese mai ma lo’u toalua mai lena lesona ma se naunautaiga faafouina ina ia ma faia se mea e fesoasoani ai i se tasi ia toe toaga mai i le Ekalesia. Ou te talitonu sa o ese foi tagata uma o le vasega ma lea ituaiga lagona. Mai lenei aafiaga, sa ou fesili ai ia te au lava ia: O le a se mea na matua faamanuiaina ai lenei lesona puupuu? Aisea na tuua ai e tagata uma le vasega ma se lagona matua musuia ina ia ola ai ma le atoatoa i le talalelei?
Ao tomanatu ai i nei fesili e lua, sa ou iloaina ni mataupu faavae e fa lea na avea ai lenei vasega ma se aafiaga faamanuiaina o le aoao atu ma le aoao mai:
-
O le liua o le sini lea.
-
O le alofa o le faamoemoega lea.
-
O le aoaoga faavae o le ki lea.
-
O le Agaga o le faiaoga lea.
O Le Liua o le Sini Lea
Nai lo le taumafai e “‘sasaa ia faamatalaga’ i totonu o mafaufau o tagata o le vasega,” e pei ona lapataia ai i tatou e Peresitene Monson e aua nei faia, ae sa taumafai lenei faiaoga “e uunaia tagata taitoatasi ia mafaufau, ia lagona, ona faia lea o se mea e uiga i le ola ai i mataupu faavae o le talalelei.”1
I se faapuupuuga, o le sini a lenei faiaoga o le fesoasoani lea i tagata o le vasega e fai se mea semanu latou te le faia pe ana latou le auai i le vasega. Ma o lena mea na fai sa faamoemoe e fesoasoani ai i tagata taitoatasi ina ia avea o se soo moni o le Faaola.
O le sini o lenei ituaiga o aoaoga o le liua. O le upu liua o lona uiga o le liliu atu lea i se auala fou, ina ia opogi mai se taiala fou. O le liua e—avea o se soo moni—e le o se aafiaga se tasi ae o se faagasologa i le olaga atoa.2 I lenei vasega, o le faia e tagata o le vasega na faamoemoe e fesoasoani e le gata i tagata o le vasega ae faapea foi i tagata faatoa liliu mai o loo latou taumafai e faatoaga mai. Soo se taimi lava tatou te ola ai ma le atoatoa i se mataupu faavae o le talalelei, e faamanuiaina se isi tagata a lē o le tuusao atu pe ala atu i se isi auala. Mo lenei mafuaaga, ua tulaga ese ai le aoao mai ma le aoao atu o le talalelei. Nai lo le taitaiina atu i le na o le mauaina o le malamalama, o le aoaoina o le talalelei e taitai atu ai i le liua patino.
O Le Alofa o le Faamoemoega Lea
Ao ou i ai i le vasega i Peru, sa ou lagona le alofa o le faiaoga mo i latou na auai faapea foi mo i latou faatoa liliu mai lea na ia valaauliaina tagata o le vasega e faamalolosi mai. Na foliga mai ua faatumulia le potu i le alofa—mai le faiaoga i tagata a’oa’o, mai tagata a’oa’o i le faiaoga, mai le tasi tagata aoga i le isi, ma mai tagata a’oa’o i tagata faatoa liliu mai.
O le alofa e fesoasoani ia i tatou o ni faiaoga ina ia aoao atu faapei ona aoao atu le Faaola pe ana o i ai o Ia i totonu o o tatou potuaoga. Ioe, “o le alofa e uunaia i tatou ina ia tatou saunia ma eseese auala tatou te aoao atu ai.”3
Afai o le faamoemoega o le faiaoga o le aoao atu o mataupu o le lesona, o le a taulai atu le faiaoga i anotusi nai lo manaoga o tagata aooga taitoatasi. Sa le’i lagonaina e le faiaoga Peru le manaomia o le aoao atu o mea uma. Sa na o lona manao e uunaia tagata o le vasega e aapa atu i o latou uso ma tuagane/tuafafine i le alofa. O le alofa mo le Alii ma le alofa mo isi ua fausia ai se uunaiga musuia. O le alofa o le faamoemoega lea. Afai o le alofa lo tatou faamoemoega, o le a faamalosia i tatou e le Alii e ausia Ona faamoemoega ina ia fesoasoani i Lana fanau. O le a Ia musuia i tatou i mea e manaomia e i tatou o ni faiaoga ona fai atu ai, ma pe faapefea ona tatou fai atu ai.
O Le Aoaoga Faavae o le Ki Lea
E le’i faitau le faiaoga Peru mai le tusi lesona ao ia aoao atu. Ou te mautinoa na ia faaaogaina le tusi lesona po o ni lauga o le konafesi e saunia ai mo le vasega, ae ina ua ia aoao atu, sa ia aoao atu mai tusitusiga paia. Sa ia toe faamatalaina le tala o le mamoe na le iloa ma toe faitauina le mau lenei: “Pe a liua mai oe, ona e faamalosi ai lea i ou uso” (Luka 22:32). Sa ia faasoaina atu le valaaulia a Peresitene Monson i tagata uma o le Ekalesia ina ia laveai i latou o e ua le iloa lo latou ala. O aoaoga faavae i le ogatotonu o lenei lesona o le faatuatua ma le alofa. Sa manaomia e tagata o le vasega le lava o le faatuatua e galulue ai, ma sa latou manaomia le galulue ona o le alofa.
Afai e aoao atu ma le manino ma le tuuto ia aoaoga faavae o le talalelei toefuataiina a Iesu Keriso, o le a faamalolosia uma e le Alii tagata a’oa’o ma le faiaoga. O le tele o fautuaga e ofoina mai e tagata o le vasega e aapa atu ai i o latou uso ma tuafafine o e ua le toaaga mai, o le atili lagonaina foi lea e tagata uma o le latalata atu i le Faaola, o lē na aapa soo atu i isi i le taimi o Lana galuega i le lalolagi. O le aoaoga faavae o le ki lea i le tulaga manuia o le aoao mai ma le aoao atu o le talalelei. E tatalaina loto. E tatalaina mafaufau. E tatalaina le ala mo le Agaga o le Atua e uunaia ma aoao ai tagata uma o loo auai.
O Le Agaga o le Faiaoga Lea
E iloa e faiaoga maoae o le talalelei e le o i latou moni o ni faiaoga. E aoao atu ma aoao mai le talalelei e ala i le Agaga. A aunoa ma le Agaga, e le mafai e le aoao atu o upumoni o le talalelei ona taitaiina atu ai i le aoao mai (tagai i le MF&F 42:14). O le tele lava o le tuuina atu e le faiaoga o valaaulia musuia e galulue ai, o le tele foi lea o le i ai o le Agaga i le taimi o le lesona. Sa tuuina atu e le faiaoga Peru se valaaulia musuia. Ao tali mai la tagata o le vasega ma ni fautuaga, sa faateleina le lagonaina o le Agaga ma sa faamalolosia tagata uma.
E le’i taumafai le faiaoga ina ia aoao atu le lesona. Nai lo lena, sa ia taumafai e faaaliali a’e le lesona ua leva ona i ai i tagata o le vasega. O le valaauliaina o tagata o le vasega e ala i le mana o le Agaga, na fesoasoani ai le faiaoga i tagata ina ia iloa o latou manaoga ma galulue—ma aapa atu i o latou uso ma tuafafine i le alofa. Ao fefaasoaai manatu o tagata o le vasega, na uunaia e le tasi le isi aua sa latou faalagolago atu faatasi i le Agaga.
Ao tatou taumafai e ola i le talalelei e ala i le fesoasoani ia i latou o e siomia i tatou, o le a uunaia i tatou e le Alii i mea e ao ona tatou faia. O lea afai o i tatou o ni faiaoga ma e tatou te mananao ina ia i ai moni lava le Agaga i o tatou potuaoga, e na o le manaomia lava o le valaaulia o tagata o le vasega e ola ai ma le atoatoa i se mataupu faavae o le talalelei. Pe a tatou tautino atu e ola atoatoa i se mataupu faavae o le talalelei, ua tatou latalata atili atu i le Atua ma o le a latalata atili mai le Atua ia i tatou (tagai i le MF&F 88:63).
O Le Gafatia o Tagata A’oa’o Taitoatasi
Tatou te le o aoao mai ma aoao atu le talalelei mo na o le faamoemoega ia maua le malamalama. Tatou te aoao mai ma aoao atu le talalelei ia maua le faaeaga. O le aoao mai ma le aoao atu o le talalelei e le o faatatau i le aoaoina o mea moni; e faatatau lea i le aoaoina o le avea ai ma soo. E manaomia ona tatou manatua, e tusa lava pe o tatou aoao atu a tatou lava fanau i le fale po o tagata o le uarota po o le paranesi i le potuaoga, o lesona o loo tatou aoaoina atu ua leva ona silafia e tagata a’oa’o. O la tatou matafaioi o ni matua po o ni faiaoga o le fesoasoani lea i tagata a’oa’o ia latou iloaina i totonu o o latou lava loto ma mafaufau le lesona.
Pe a tatou faailoa atu le gafatia maoae o tagata a’oa’o taitoatasi, ua amata ona tatou vaavaai e pei ona silasila mai le Atua. Ona mafai lea ona tatou ta’u atu mea e finagalo o Ia tatou te ta’u atu ma faia le mea e finagalo ai o Ia tatou te faia. Ao tatou tulimatai atu i lenei ala o le aoao mai ma le aoao atu, o le liua o la tatou sini lea, o le alofa o lo tatou faamoemoega lea, o le aoaoga faavae o le ki lea, ma o le Agaga o le faiaoga lea. Ao tatou aoao mai ma aoao atu i lenei lava ala, o le a faamanuia e le Alii le tagata a’oa’o ma le faiaoga “o le a faapea ona mafai ona faagaeetia ai o tagata uma” (MF&F 88:122).
Ata na pueina e Hyun-Gyu Lee; Vai Ola, saunia e Simon Dewey
Ata na SAUNIA e Craig Dimond MA Matthew Reier