Pe A oo Ina Le Aoga Fuafuaga Lelei
O le fuafua mo le lumanai e taua, aemaise lava mo le autalavou matutua. Ae o le a le mea e tupu pe afai e le aoga ni fuafuaga sa sili ona lelei le faataatiaga?
Sa le i pasi le suega a Jung Sung Eun o Korea e agavaa ai e avea ma se faiaoga. Sa le toe i ai se galuega a Tina Roper o Iuta, ISA, sa ia faamoemoe i ai e avea ma ana matata. Sa maua e Todd Schlensker o Ohaio, ISA, se faamautinoaga faaleagaga e faaipoipo ae sa ia vaaia le oo mai o le faamutaina o lana faamau. Sa faamutaina e Alessia Mazzolari (ua suia le igoa) o Italia le mea sa foliga mai o se mafutaga atoatoa.
E leai se tasi e fia saili atu i se “fuafuaga E.” Ae a faaletonu a tatou fuafuaga, e le tuulafoaia e le Tama Faalelagi Ana fanau. E tele lava auala lelei ia aoga ai le olaga. E i ai taimi, tatou te ono iloa ai ua tatou maua mai i faafitauli na suia ai a tatou fuafuaga se malamalamaaga ma se aafiaga manaomia (tagai i le MF&F 122:7) ma taitai atu ai i se mea lelei atu.
Faaleleia o Uiga Faaalia, Ae Le o Pepa o Faamatalaga o Agavaa Faalegaluega
Sa galue malosi ia Sung Eun ia ausia lana miti o le olaga atoa e fia avea ma se faiaoga. Sa ia faamatala mai, “Ona sa ou taumafai i taimi uma e fai le mea sili i mea uma ou te faia, e toetoe lava ou mauaina i taimi uma mea sa ou faamoemoe ma tatalo i ai.” Ae e le i tupu lena mea ina ua ia sue i le suega e agavaa ai o se faiaoga. “Ina ua ou le pasi,” na ia fai mai ai, “Sa ou lagonaina ua maumau uma au miti i le aso e tasi.”
E le i popole muamua Tina ina ua maua e le isi kamupani le kamupani sa ia faigaluega ai. Sa folafola atu e le faalapotopotoga fou se tulaga umi ia te ia, o lea na ia masii latalata atili ai i le mea e faigaluega ai ma ona faamoemoega maualuluga mo se galuega fou faafiafiaina. Ina ua faamalolo o ia e le kamupani i nai masina mulimuli ane, sa ia lagonaina le “leiloa, lē mautonu, faanoanoa, ma sina fefe.”
Nai lo le taulai atoa atu i le faaleleia o la pepa o faamatalaga o agavaa faalegaluega, sa iloa e Sung Eun ma Tina e mafai ona la taulai atu foi i le faaleleia o o laua uiga faaalia. Sa maua uma e nei tamaitai le mafanafana e ala mai i le suesueina o le talalelei ma le tatalo.
“O le Aposetolo o Paulo o se uo maoae sa fesoasoani ia te au ia onosai ma faaauau pea ona fetaia’i ma luitau,” sa fai mai ai ia Sung Eun. “Sa i ai ia te ia i taimi uma se uiga faaalia lelei ma le naunautai e faatalitali mo mea o finagalo ai le Atua mo ia, nai lo le faamoemoe mo lana lava ia taimi.
“Sa ou aoaoina se mea mai lana faataitaiga: o le vaitaimi o le faatalitali e le na o se faagasologa lea e tatau ona tatou oo i ai e maua ai le mea tatou te mananao i ai. Ae, o se faagasologa e avea ai i tatou ma tagata e finagalo lo tatou Tama Faalelagi e avea ai e ala i suiga tatou te faia.”
Sa iloa e Tina o le suiga sa sili ona ia manaomia o se suiga i manatu po o vaaiga. “Sa faateia lava au i le iloaina sa ou fuatiaina lou lava ia taua i manatu faalelalolagi o le taua faaletagata,” sa ia manatua ai. “Sa ou lagonaina lo’u taua ona o la’u galuega ma le tulaga faalegaluega, ia na aveesea. O lea la ua ou iloa nei lo’u taua faaletagata lava ia i upumoni e faavavau e faapea, o au o se afafine o lo’u Tama Faalelagi ma e i ai o’u gafatia faalelagi. O nei upumoni e le mafai lava ona aveesea.”
Sa tautino uma e Tina ma Sung Eun e faapea e ui e le faafiafiaina i taimi uma le faaleleia o uiga faaalia, ae e suamalie ia fua o le tuputupu ae o le tagata lava ia. Sa fai mai ia Sung Eun, “O le tausaga talu ona le pasi la’u suega e agavaa ai o se faiaoga, sa le na o le vaitaimi sili ona tiga ma faavaivailoto lea, ae o se taimi foi sa sili ona taua. Sa ou oo ina mafai ona malamalama moni i faigata o isi tagata ma maua se manao e fesoasoani ia i latou faatasi ma se faamoemoega tonu ma le popole.”
O faataitaiga a Amona ma ona uso i le Tusi a Mamona sa faaali atu ai ia Tina le auala, na faaloaloa atu ai e le Alii lona faatuatua e fesoasoani ai na te ausia lona gafatia atoa. “O le fuafuaga a le Alii e mo sa Nifae ia faasaoina o latou uso sa Lamana, nai lo le faaaogaina o le pelu e foia ai le faafitauli,” sa ia faamalamalama mai ai. “Sa tuuina atu i atalii o Mosaea se galuega lea na manaomia ai se faatuatua sili atu, ae sa tuuina atu foi ia i latou se folafolaga e faapea, afai latou te tauavea o latou mafatiaga ma le onosai, o le a latou maua le manuia (tagai i le Alema 26:27). O le onosai o se tasi o o’u tofotofoga sili ona faigata ona ou te manao ia ou malamalama i la’u fuafuaga atoa—ae sa ou iloaina o le fuafuaga ma le taimi a le Tama Faalelagi mo i tatou e silisili lava lea i taimi uma.”
Tausiaina o Poloaiga e Tusa Lava Po o Le A
Sa feagai Todd ma se lumanai faamanuiaina ina ua foi mai lana misiona. A o auai ai i le aoga, sa ia feiloai ai i se tamaitai talavou lelei lava. Ina ua maea ni masina o faamasaniga ma se faamautinoaga faaleagaga, sa talosaga ai loa Todd e fia faaipoipo ia te ia ma sa ia taliaina. Sa la fuafuaina le la faaipoipoga i le faaiuga o le taumafanafana, ma sa la toe foi mai uma mai le aoga e tapenaina.
“E tolu vaiaso talu ina la faatofa i le aoga, ae ia faamutaina le ma faamauga,” O le faamatalaga lea a Todd. “Sa le i lava le malosi o le lotonutimomoia e faamatalaina ai o’u lagona. Sa matua tele fesili na le mafai ona taliina i lo’u mafaufau; sa leai ma se uiga. Sa ou mauaina se faamautinoaga i le maota o le Alii, a o lenei ua muta le ma mafutaga. E le i tofotofoina lava la’u molimau i se faigata faapenei.
“Paga lea, mo tausaga na sosoo ai ma le faamutaina o le ma mafutaga, sa le mafai ona aveesea ma lo’u mafaufau. Sa ou le iloa pe o le a faapefea ona ou toe faatuatuaina se lagona o le faamautinoaga. Sa ou faalagolago pea i le Alii ma taumafai i le mea sili ou te mafaia e tausi ai poloaiga,” sa ia faaauau ai. “Ua foliga mai ua leai se aoga o mea uma.”
Sa mafaufau foi ia Alessia sa talafeagai lava lana mafutaga ma se alii talavou patino. “Sa matua matagofie le ma tala, e ui sa i ai faigata masani e fetaia’i ma ulugalii uma, sa ma manatu o le a le muta lava le ma mafutaga,” sa ia manatua ai.
Ina ua malaga le uo tama a Alessia i le misiona, sa faigata le nofo valavala ai ae mo se mafuaaga e ese ai mai le mea sa faamoemoeina e Alessia. “Ina ua ia alu ese atu, sa amata ona ou iloa atili au lava ia. Sa ou iloa e tele mea i lo’u olaga e le o sa’o ma e tele taimi sa ou lafi ai i tua o nisi o manatu faavalevalea nai lo le faamaualaloina o au lava ia ma faafetaia’i le mea moni,” sa ia faamatala ai. “Sa ou ola i se ituaiga olaga o tala faafagogo, e pei ua lava le alofa faamamai e faasa’o ai mea uma lava, ma o le mafuaaga lea ua masani ai lava ona ou le iloaina ai mea e sili ona taua.”
Ae, sa faamoemoe pea ia Alessia i se toefaatasiga fiafia ma faaauau ai le mafutaga pe a maea le misiona a lana uo tama. Peitai, i le taimi na ia toe foi mai ai, e na o le faalua ona la tafafao faamasani mo sina taimi puupuu a e le i faamutaina le la mafutaga. “O se tasi o taimi aupito sili ona tiga ou te manatuaina,” sa fai mai ai Alessia.
I o laua lava aafiaga, sa mulimuli ane iloa e Todd ma Alessia e ui lava ua suia se mafutaga autu i o la olaga, ae e le mafai ona la lafoaia lo la usiusitai ma le tuuto atu i le Alii. Sa oo ina avea o Ia ma o la taula a o fesuiai mea uma ma le lē mautonu.
“Ou te le i mauaina uma ni tali pe aisea na ou maua ai se faamautinoaga e faaipoipo i se tasi, ae e le i tupu,” sa manatua ai e Todd. “Ae sa ou iloa e le i taua lena mea. O le mea na taua o le i ai pea lea o lo’u faatuatua ia Keriso, ma o le a ou faaaogaina lena faatuatua e faalagolago ai i soo se mea ua faapolopoloina e le Alii mo a’u.”
Sa iloa e Alessia o le tuuto atoa atu o ia lava i le Alii o le a aumaia ai lona malosi na te manaomiaina. “Sa ou malamalama ua oo mai le taimi mo a’u e filifili ai le ituaiga o tagata ou te fia manao e avea ai,” sa ia fai mai ai. “Pe o le a faaauau pea ona ou ola faaafaafa i le olaga, pe o le a ou amata ea i le ala o le avea ai ma soo moni o Keriso? Sa ou fia manao e iloa tele o Ia, alofa moni ia te Ia, ma taumafai e avea o se tagata lelei atu e ala i le usiusitai i Ana poloaiga uma—e le na o fafo ae ia faapena foi i lo’u loto faatasi ai ma le moni o le faamaoni.”
Atiina Ae o le Faamoemoe i le Lumanai ma le Faatuatua ia Keriso
Ina ua uma ona fetaia’i ma mea faalavefau sa le i faamoemoeina, sa tauivi uma talavou matutua nei e toafa e saili le lototele e ola ai i le taimi nei ma toe fuafua ai mo le lumanai. Ae sa latou maua ai sa tuputupu ae lo latou faatuatua i le Alii.
Sa manatua e Sung Eun ina ua le pasi lana suega, o le faataitaiina o mea sa oo ina faigata. Ae na maua ai se mea taua: “Sa ou iloaina o le toilalo moni lava o le nofonofo ai i mea ua tuanai ma fai ni taumafaiga iti e tau faaleleia ai mea. Sa ou filifili nai lo le faaauau ai pea ona faanoanoa, e tatau ona ou liua lenei taimi faigata i se avanoa e aoao ai. O lo’u tomai e malamalama ai i le olaga i se tulaga lautele sa faalauteleina ma faalolotoina, ma sa ou aoao ai o le mutaaga o se tasi mea e aumaia ai lava le amataga o se isi mea.” Sa ia toe sue ma pasi le suega ma ua avea nei o ia ma “se faiaoga fiafia o le e olioli e faaalu le taimi ma tamaiti aoga i aso taitasi.”
Sa filifili Tina e faatuatua o loo i ai se mea o faatalitali mo ia, e ui lava sa faigata ona fetaia’i ma se lumanai le mautonu. “Sa ou filifili e toe ulufale i le aoga, ma o iina sa ou suesue ai i matata tau faatufugaga ma tekinolosi, o se vaega sa ou manao ia ou auai ai ae sa ou le mauaina ni tomai manaomia,” sa ia faamalamalama mai ai. “Ua ou sauni e amata se isi sailiga, se mea e sili atu ona lelei, e faafetai ai i le atamai o lo’u Tama Faalelagi.”
Sa faaauau ona taumafai ia Todd e tafao faamasani mo le ono tausaga ma galue e atiae le faatuatua i le Alii. E oo lava i taimi sa ia feiloai ai ma tamaitai sa ia matua faamemelo i ai, ae sa ao ona ia finau malosi e taofia ona masalosaloga mai le tuanai mai le faatamaiaina o ona faamoemoega mo le lumanai. “O le sailia o le naunautaiga ia le toilalo ai i o’u masalosaloga o tausaga e ono sa le faigaofie,” sa ia fai mai ai. “Ae sa ou tumau i le taumafai e faamaonia atu ia te au lava ia sa ou faatuatuaina moni lava le Alii ma Ana uunaiga, e ui sa ou ita ia te Ia muamua.” O se mafutaga fou na iu lava ina taitai atu i se faaipoipoga i le malumalu.
“E masani lava ona ou tomanatu, pe aisea e faamanuia ai au e le Alii i se tagata e sili e pei o lo’u toalua, pe a tauivi mo se taimi umi e faatuatuaina atoa ia lagona o le Agaga,” o le tala lea a Todd. “O se molimau lea ia te au o loo faatalitali le Alii e faamanuia i tatou, ae e faia lava i Lana taimi.”
E ala i le toe tuuto atu o ia lava i le Alii, sa atiae ai e Alessia se molimau loloto ma le patino. “Sa oo ina moni le ata o le faaolataga ia te au, ma oo ai ina fusia ma loloto atili a’u feagaiga. Sa le i toe avea le Togiola a Keriso ma se manatu taumatemate, po o se mea na ou faitau i ai, atonu sa matua manino lava. Sa tupu se suiga o le loto i totonu, ma sa ia te au se molimau mautinoa.” O le asō, sa ia fai mai ai, ua ia lagonaina o ia o se tagata fou.
E tusa lava pe o a itu e agai i ai le malaga o le olaga, o le taunuuga mulimuli lava o le ola e faavavau, o le nofoaga lea ua fuafuaina e le Tama Faalelagi mo Ana fanau (tagai i le Mose 1:39). Atonu ua iloa e nisi o le “fuafuaga E” sa na o se ala e faataunuu ai Lana “fuafuaga A”.
Ata na tusia e Neil Webb