Faafiafia i le Au Maimoa
O lo’u olaga sa na o se taga e fai pe ana ou le filifili e suia matafaioi.
Mo au lava ia o se talavou, o le aoga sa na o se faatinoina o se mea faafoliga. E te silafia, o le a le ala e fai atu ai le tagata leaga i ata tifaga se laina atoatoa, ma le atamai ma foliga mai ai e matua aulelei i ana sitaili i le faagasologa? Sa ou naunau ia mafai ona ou faia lena mea. Sa ou taumafai e pulea le lau e pei lava o tagata sili ona leaga. Sa ou faafoliga e maualalo ou tulaga o le amio mama ona sa ou manao e faafiafia au uo i le aoga. Sa ou fiafia i le leo o talieega pe a ou faaaogaina gagana le talafeagai po o ni tausuaga e uiga i tagata.
Sa ou manao e tapuai mai uma le aumaimoa ia te au. O lea sa ou mafaufau ai i se auala e avea ai ma se tagata e faafiafiaina tagata. Sa oo ina avea au ma se tagata fai mea malie soo i lau vasega o le paiolo, sa mafai ona talitonu lau au volipolo o au o se tagata pati tele, ma faaleagaina ai lo’u tauleleia o se tamatai talavou taumamaina ma uiga mama. Sa ou manatu, “Ou te le manao e mafaufau au uo o au o se tagata amiotonu!”
E talu ai e le i faapea na ou solia ni agasala matuia lea sa mafaufau tagata na ou faia, sa ou taumafai ai ma le naunau e faatalitonu au lava ia, e lelei lava le i ai o se uiga faaalia malō vale. Sa ou sese! Sa oo le faatinoga o le ata moni o lo’u olaga i se vaega na le toe mafai ai ona ou matamata ia te au lava ia. O le faateleina lava o lo’u lauiloa, o le faaitiitia foi lena o lo’u fiafia i le tagata lea sa ou faatinoa.
O se tasi aso, sa talanoa ai ni au uo se toalua i se tamaitai afeleti tausaafia ma faauo e igoa ia Jennifer, o lē sa le maasiasi e tu atu mo ona talitonuga. Sa faapea mai se tasi o au uo, le tamaitai sili ona lalelei, lauiloa, ma atamai i le vasega fitu, “e ese ai lava ia Jennifer. Maimau pe ana lava lou lototele e talitonu ai i lau lotu e pei o ia. Ua na o ia lava le tagata ou te iloa o loo ola i lona olaga faapena. Sa ou maofa.
“E faapefea ona ia faia se tala faapena e aunoa ma le ta’ua o au? Na ou mafaufau ai. “I mea uma lava, e i ai i lau ekalesia ia tulaga faatonuina maualuluga!” Sa ou ita aua na te le i manatu o au o se faataitaiga lelei. Ona faafuasei lea, sa ou lagonaina o loo ou nofo i le laina pito i luma o se faletifaga o loo faaalia ai lou olaga o le ata autu.
Sa ou mafaufau i faataitaiga leaga sa ou faia i au uo. O le a le ituaiga o tamaitiiti e matamata mai ia te au ma mafaufau, “Maimau pe ana ou lototele ma tulaga ese e pei o ia”? Sa ou le fiafia moni lava i le ituaiga o tagata ua ou oo i ai.
O le suia o lo’u tagata ma le tauleleia sa avea o se faagasologa umi, ma o loo ou taumafai pea e tapuni lo’u gutu nai lo le faasalalau atu o tala faatiga e faafiafia ai tagata. Ae sa ou iloaina e mafai ona ou faaataina au uo e aunoa ma le faatiga i lagona o se isi tagata, ma mafai ona ou tuua le potu i se taimi e fai ai se tala tausua masoa e aunoa ma le faalumaina. E leai ma se tasi e ao ona avea ma se “tagata leaga” ina ia tele ai ni ana uo. Sa ou suia ou uiga ma amioga ona o le maua o le filemu i mea ua ou talitonu i ai, e sili atu ona lelei nai lo le taumafai e faalafi le tagata moni e i ai au.
Ata na tusia e Scott Greer