O Le Taua o Faamanuiaga o le Perisitua
Mai se saunoaga i le konafesi aoao ia Aperila 1987.
O se faamanuiaga faaleperisitua o le tuuina atu lea o le pule i mea faaleagaga.
I se faamanuiaga faaleperisitua e faagaoioi ai e se auauna a le Alii le perisitua, e pei ona uunaia ai e le Agaga Paia, e valaauina ai mana o le lagi mo le manuia o le tagata o loo faamanuiaina. O ia faamanuiaga e pei ona tuuina mai e e o umiaina le Perisitua Mekisateko, lea e i ai ki o faamanuiaga uma faaleagaga o le Ekalesia (tagai i le MF&F 107:18, 67).
Faataitaiga o Faamanuiaga Faaleperisitua
E tele ituaiga o faamanuiaga faaleperisitua. A o o’u tuuina atu ni faamanuiaga eseese, faamolemole ia manatua o faamanuiaga faaleperisitua o loo avanoa mo i latou uma e manaomiaina, ae e faatoa tuuina atu pe a talosagaina.
O faamanuiaga mo le faamaloloina o lē ua gasegase e faia i le faauuina i le suauu, e pei ona faatonuina ai e tusitusiga paia (tagai i le Iakopo 5:14–15; Mareko 6:13; MF&F 24:13–14; 42:43–48; 66:9). O faamanuiaga faapeteriaka e tuuina atu e se peteriaka ua faauuina.
E mafai e tagata e mananao i se taiala i se faaiuga taua ona mauaina se faamanuiaga faaleperisitua. E mafai e tagata o e e manaomia se mana faaleagaga faaopoopo e faatoilalo ai se luitau faaletagata lava ia ona mauaina se faamanuiaga. E masani lava ona talosagaina ia faamanuiaga faaleperisitua mai tamā a o le i tuua e fanau le aiga mo ni faamoemoega eseese, e pei o aoga, auaunaga i le militeli, po o se malaga umi.
O faamanuiaga e tuuina atu i tulaga e pei ona ou faatoa faamatalaina atu, o nisi taimi e ta’ua ai o faamanuiaga o faamafanafanaga po o fautuaga. E masani lava ona tuuina atu e tama po o tane po o isi toeaina i le aiga. E mafai ona faamaumauina ma tausia i faamaumauga faaleaiga, mo taiala faaleagaga patino a le tagata ua faamanuiaina.
O faamanauiaga faaleperisitua e tuuina atu foi i se fesootaiga ma se faauuga o le perisitua, po o se vaetofiaina o se alii po o se tamaitai mo se valaauga i le Ekalesia. Atonu o tulaga e sili ona tupu soo nei mo faamanuiaga faaleperisitua.
O le toatele o i tatou e talosagaina se faamanuiaga faaleperisitua pe a tatou sauni e faatino se tiutetauave fou i a tatou galuega. Sa ou mauaina sea faamanuiaga i le tele o tausaga ua mavae, ma sa ou lagonaina vave ai se faamafanafanaga ma se taiala faifai umi.
O Le Taua o Faamanuiaga Faaleperisitua
O le a le taua o se faamanuiaga faaleperisitua? Mafaufau i se alii talavou o loo sauniuni e tuua le aiga ina ia sailia sona manuia i le lalolagi. Afai e tuu atu e lona tama ia te ia se tapasa, Atonu na te faaaogaina lenei meafaigaluega faalelalolagi e fesoasoani ai ia te ia e sailia ai lona ala. Afai e tuu atu e lona tama ia te ia se tupe, e mafai ona ia faaaogaina na te mauaina ai le pule i mea faalelalolagi. O se faamanuiaga faaleperisitua o le tuuina atu lea o le pule i mea faaleagaga. E ui e le mafai ona tagofia pe fuaina lona mamafa, ae e matua taua tele i le fesoasoani ai lea ia i tatou e faatoilaloina faafitauli i luga o le ala i le ola e faavavau.
E matua paia lava le tiutetauave mo se tasi o umiaina le Perisitua Mekisateko e tautala ai mo le Alii a o tuuina atu se faamanuiaga faaleperisitua. E pei ona tauina mai e le Alii ia i tatou i faaaliga o onapo nei, “[O] la’u upu … o le a faataunuuina uma lava, pe i lo’u lava leo po o i le leo o a’u auauna, ua tutusa lava” (MF&F 1:38). Afai e tautala se auauna a le Alii a o uunaia ai e le Agaga Paia, o ana upu “o le finagalo lea o le Alii, … o le mafaufau lea o le Alii, … o le afioga lea a le Alii, … [ma] le siufofoga lea o le Alii” (MF&F 68:4).
Ae afai o upu o se faamanuiaga ua faailoa mai ai na o manaoga ma manatu o lē o umiaina le perisitua, e le o musuiaina e le Agaga Paia, o lona uiga o loo faalagolago le faamanuiaga pe o faailoa ai le finagalo o le Alii.
E mafai e e agavaa o umiaina le Perisitua Mekisateko ona tuuina atu ia faamanuiaga i a latou fanau. Ua tusia i tusitusiga paia le tele o na faamanuiaga, e aofia ai faamanuiaga o Atamu (tagai i le MF&F 107:53–57), o Isaako (tagai i le Kenese 27:28–29, 39–40; 28:3–4; Eperu 11:20), Iakopo (tagai i le Kenese 48:9–22; 49; Eperu 11:21), ma Liae (tagai i le 2 Nifae 1:28–32; 4).
I faaaliga o onapo nei, ua poloaiina ai matua o e ua avea ma tagata o le Ekalesia ina ia aumai a latou fanau “i luma o le ekalesia,” lea e i ai ia toeaina e “faaee o latou lima i luga o i latou i le suafa o Iesu Keriso, ma faamanuia i latou i lona suafa” (MF&F 20:70). O le mea lenei e aumai ai e matua ia pepe i se sauniga faamanatuga, lea e i ai se toeaina—e masani lava o le tama—e tuu atu ia i latou se igoa ma se faamanuiaga.
O faamanuiaga faaleperisitua e le faatapulaaina i na faamanuiaga e tautalagia a o faaee lima i luga o le ao o se tagata. O nisi taimi e faaleoina ai faamanuiaga i vaega o tagata. Sa faamanuiaina e le perofeta o Mose le fanauga uma a Isaraelu a o le i oo i lona maliu (tagai i le Teuteronome 33:1). Sa “faaleoina e [Iosefa Samita] se faamanuiaga i luga o tuafafine” sa galulue i le Malumalu o Katelani. Sa ia faamanuiaina foi le “faapotopotoga.”1
E faaleoina foi faamanuiaga faaleperisitua i nofoaga. E faamanuiaina ma faapaiaina ia atunuu mo le talaiina o le talalelei. E faapaiaina ia malumalu ma fale tapuai i le Alii e ala i se faamanuiaga faaleperisitua. E mafai ona faamanuiaina isi fale pe a faaaogaina i le galuega a le Alii. “E mafai e tagata o le Ekalesia ona faapaia o latou fale e avea ma nofoaga paia e mafai ona afio ai le Agaga Paia.”2 E mafai e faifeautalai ma isi o umiaina le perisitua ona tuua se faamanuiaga i aiga na taliaina i latou (tagai i le Alema 10:7–11; MF&F 75:19). Alii talavou, i se taimi e le o toe mamao atonu o le a talosagaina ai outou e tuu atu se faamanuiaga faapena. Ou te faamoemoe o loo outou sauniaina outou lava ia faaleagaga.
O Aafiaga ma Faamanuiaga Faale-Perisitua
O le a ou ta’ua nisi o faataitaiga o faamanuiaga faaleperisitua.
Pe tusa o se selau tausaga ua tuanai, sa agavaa ai ia Sara Young Vance e avea ma se faatosaga. A o le i amata ona auauna o ia i tamaitai o Arisona, sa faamanuiaina o ia e se taitai perisitua ina ia ona “faia pea i taimi uma na o mea sao ma mea e sili ona lelei mo le manuia o ana gasegase.” I le gasologa o se vaitau e 45 tausaga, sa faafanauina ai e Sara pe tusa ma le 1,500 o pepe e aunoa ma se maliu o se tina po o se tamaitiiti. “O soo se taimi lava ou te oo ai i se faafitauli faigata,” sa ia ta’ua, “e i ai lava se mea e foliga mai e musuia a’u ma ou iloa ai lava le mea sa’o e fai.”3
I le 1864, na valaauina ai ia Iosefa A. Young i se misiona faapitoa e faatautaia ni pisinisi faale-Ekalesia i Sasae. Sa faamanuiaina o ia e lona tama, o Polika Iaga ina ia alu atu ma toe foi mai ma le saogalemu. Ina ua ia toe foi mai, sa aafia o ia i se faalavelave matuia ma se nofoaafi. “Sa matuai faatamaia uma le nofoaafi,” sa ia lipotia ai, “na aofia ai ma le taavale sa ou i ai e oo i le nofoa sa ou nofo ai, [ae] sa aunoa a’u ma se maosia.”4
A o ou tautala atu i faamanuiaga faaleperisitua, e solo mai le tele o manatuaga: Ou te manatua o’u atalii ma afafine e talosaga mai i ni faamanuiaga e fesoasoani ai ia i latou i taimi sili ona popolevale o aafiaga o o latou olaga. Ou te olioli lava pe a ou mafaufau i folafolaga musuia ma le faatuatua ua faamalosia lea e oo mai pe a faataunuuina [na folafolaga]. Ou te lagona le mitamita i le faatuatua o se tupulaga fou pe a ou mafaufau i se atalii, o popole i se suega faalegaluega ma ua le mafai ona aapa atu i lona tama ona ua mamao ese, ma saili atu i se faamanuiaga faaleperisitua mai se tagata e sili ona faigofie ona maua ai o umiaina le perisitua i lona aiga, le toalua o lona tuafafine. Ou te manatua se tagata fou talavou faatoa liliu mai i le Ekalesia sa sailia se faamanuiaga e fesoasoani ai ia te ia e suia le mamanu faafanoina o lona lava ia olaga. Sa ia mauaina se faamanuiaga e le masani ai ma sa ou maofa ai i lou faalogoina o upu sa ou tautala ai.
Aua nei faatuai e talosagaina se faamanuiaga faaleperisitua pe a e manaomia se mana faaleagaga.
Ata na tusia e Keith Larson