O Le A Le Molimau Manino?

Saunia e Elyse Alexandria Holmes

Atonu e malosi atu lau molimau nai lo le mea e te iloaina.

O loo e nofo i se sauniga molimau. A o e vaavaai atu i tagata o le faapotopotoga o tutu i luga ma tuu mai a latou molimau, e te lagonaina e pei foi e tatau ona e molimau atu. Ae o le a se mea e te saunoa atu ai? Ma o le a le mea e tupu pe afai e amata ona e tagi a o e i ai i luga iina? Ae ā pe afai e te le amata ona tagi? E mafai ona e amata tuufesili pe o i ai sau molimau. Pe atonu e te le o mautonu po o le a lau molimau. O nisi nei o taiala e fesoasoani ai ia te oe ia iloa ai le mea e ta’ua o se molimau ma le mea e le o se molimau.

O Se Molimau O se Tautinoga, Malamalama, po o se Talitonuga i se Upumoni

O le “molimau manino” (Alema 4:19) e amata i se talitonuga manino. O lau molimau o se tautinoga faaleagaga lea o mea ua e talitonu i ai pe ua e iloa e moni (tagai i le MF&F 80:4). Pe a e faasoaina atu lau molimau, o vaega sili ona manino ma mamana o le a o mai mai upu e pei o le iloa, talitonu, ma le molimau. Afai e mafai ona e fai atu ma le faamaoni, “Ou te iloa e moni le Tusi a Mamona,” e mafai ona e mauaina le mana e suia ai olaga ma valaaulia ai le Agaga e pa’i atu i isi.

Mafaufau o loo i ai sau atigi pusa lapoa ua faatumulia i fasipaso ua fatuina mo na o oe lava. E ala i le faaaogaina o le ata i le pito i luma o le pusa, ua e taumafai ai e tuufaatasi le paso. Pe a fetaui lelei ni vaega se lua o lau paso, e te iloaina e talafeagai i laua. E galueaiina foi ia molimau i se ala talitutusa faapena. A o e mauaina ni aafiaga faaleagaga, o le a amata ona tuufaatasia vaega eseese o lau molimau, ma o le a oo ina e talitonu pe iloa ni upumoni patino e uiga i le talalelei.

E tusa lava pe e te le iloaina i le taimi nei pe moni mea uma e uiga i le Ekalesia, ae o le a faamanuiaina lava oe e le Tama Faalelagi ma fesoasoani atu ia te oe e aoao, ae tau lava ina ia i ai sou manao amiotonu e iloa ma e taumafai faamaoni e aoao.

O Se Molimau E Patino

A o e galue i lau paso, e mafai ona fesoasoani atu lou aiga ma au uo ia te oe mai lea taimi i lea taimi e tuufaatasia. Ae i le iuga, o lau lava ia paso tulaga ese lena e atiae ma puipuia. E mafai ona e faalagolago i nisi taimi i le faatuatua a ou matua po o uo, ae a o faateleina ou aafiaga faaleagaga, e mafai lava e oe ona faatumauina lau lava molimau.

A o e tuputupu ae i le talalelei, e taua le atiaeina o sau lava ia molimau. E pei lava ona eseese auala e tuufaatasia ai e ni tagata se toalua se paso—atonu o le tasi tagata e tuufaatasia pito o vaega a o amata ona faatusatusa e le isi ia lanu—tatou te fausia taitoatasi se molimau e ala i talitonuga ma aafiaga i se faatulagaga tulaga ese ia i tatou lava.

Afai o e le mautonu i soo se mea, ia tatalo faamaoni mo se taitaiga ma le upumoni. E masani lava e le taliina mai tatalo i le auala tatou te ono faamoemoe i ai, o lea ia tatala ai pea ou fofoga ma lou loto mo ni tali.

O Se Molimau O Loo Faaauau Pea ona Tuputupu Ae

E pei lava ona le mafai ona e aveesea se paso ua uma ona fai mai le atigipusa e aunoa ma le faia o se galuega, e le mafai foi la ona e faamoemoe e oo atoa mai lau molimau i le taimi e tasi. E te aoaoina, o sia mea ma sia mea, le moni a’ia’i o le talalelei.

O le faatumauina o se molimau malosi e manaomia ai se taumafaiga tumau. A o e faaauau pea ona galue e faateleina lou malamalama o le talalelei, o le a faamanuiaina oe e le Agaga Paia i au taumafaiga ma o le a faaauau ona tuputupu ae ai lau molimau.

Vaaia O Le Ata Tele

“O i latou o e saili ma le filiga ia iloa Keriso, e iu lava ina latou iloa o Ia. O le a latou mauaina patino se ata faalelagi o le Matai, e ui o le tele o taimi e oo mai ai i se tulaga o se paso—e tasi se vaega i le taimi e tasi. O ia vaega taitasi atonu e le faigofie ona iloaina pe a na o ia lava; atonu e le manino foi pe o le a lona faiā i le [ata] atoa. O fasimea taitasi e fesoasoani ia manino atili ai la tatou vaai i le ata tele. Mulimuli ane, afai e lava ia fasimea e tuufaatasi, ona tatou iloa ai lea o le matagofie naua o le ata atoa. Ma o le toe tepa i o tatou aafiaga, tatou te iloa ai, e moni lava sa faatasi mai le Faaola ma i tatou—e le o le taimi lava e tasi ae i se auala filemu, mālū, na toetoe lava a le iloaina.”

Peresitene Dieter F. Uchtdorf, Fesoasoani Lua i le Au Peresitene Sili, “Faatalitali i le Auala i Tamaseko,” Liahona, Me 2011, 70.

O faamatalaga nei a le autalavou e uiga i le molimau manino

“O nisi taimi o molimau silisili o molimau ia e sili ona faatamaitiiti. O molimau silisili e moni pe a e molimau atu o loo soifua Iesu Keriso, o loo soifua lo tatou Tama Faalelagi, ma e alofa o Ia ia te i tatou.”—Matias C., Atenitina

“Ou te talitonu e taua le i ai o se molimau manino aua e mafai ona e faaaogaina lena molimau e aumai ai isi i le talalelei.”—Quaid H., Ausetalia

“O se molimau o se taula sili ona tele lea e te mauaina. Pe o le a lava le mea e tupu i ou talaane, a i ai sau molimau malosi, o le a mafai ona e feagai ma ni faafitauli i se uiga faaalia lelei atu.”—Zane V., Kalefonia, ISA

“Ou te manatu o se molimau manino o se mea e ao ona e mauaina e oe lava ia ma ua e talitonu moni lava i ai, ma a e faasoaina atu lau molimau, e mafai ona e pa’i atu ai i isi ma mafai ai foi ona faamalosia a latou molimau.”—Zamagomane M., Aferika i Saute

Pe tatau ia te au … ?

Afai sa e fesiligia oe lava ia i nei fesili, o nisi nei o tali.

Pe tatau ia te au ona faasoa atu se tala po o se aafiaga pe a tuu atu lau molimau?

E masani lava ona faasoa atu e tagata ni tala po o ni aafiaga patino pe a latou tuuina atu a latou molimau, ma e mafai ona avea nei mea ma ala sili e faamatala ai se molimau o tuputupu ae. Ae o se tala e le o se molimau lea. O se tala puupuu ma fitoitonu e mafai ona fesoasoani ia te oe e faamanino se manatu, ae ia mautinoa e faaaofia ai ma le faapefea ona faalautele e lena tala lau molimau ma le o le a le upumoni po o ni upumoni o le talalelei sa e aoaoina mai lena aafiaga. O se molimau o se mea lea ua e iloa e uiga i le talalelei, e le o nofoaga na e malaga i ai po o mea sa e faia.

Sa aoao mai Elder David A. Bednar o le Korama a Aposetolo e Toasefululua: “O se molimau o se mea tatou te iloa e moni i o tatou mafaufau ma i o tatou loto e ala i le molimau a le Agaga Paia (tagai i le MF&F 8:2). Pe a tatou tautino atu ia upumoni nai lo le apoapoai atu, lapatai, pe na ona faasoa atu o ni aafiaga fiafia, ua tatou valaauliaina le Agaga Paia e faamautu mai le moni o a tatou upu.”¹

Ia faapena foi ona e faaeteete i aafiaga e te faasoaina atu. O nisi e matua patino lava mo oe ia po o isi, e aofia ai ni tala e uiga i agasala, salamo, ma ni aafiaga paia faaleagaga. O tala faapenei e le tatau ona faasoaina atu i se potopotoga lautele sei vagana ai ua uunaia oe e faasoa atu. Pe a e lagonaina le uunaiga, ia faalauaitele, ma taulai atu i le mea sa e aoaoina mai le aafiaga nai lo auiliiliga maoti o mea sa tutupu.

Pe tatau ona ou faailoa atu ni faafetai po o ni alofa i lau molimau?

E ui e talafeagai le faailoa atu o le alofa po o se faafetai pe a tuu atu sau molimau, ae o nei lagona e le o se molimau. E taulai atu ia molimau i mea ua e aoaoina faaleagaga e uiga i le talalelei. O le faailoaga o le alofa ma le lotofaafetai e le tatau ona suitulaga i se molimau.

Na saunoa Elder M. Russell Ballard o le Korama a Aposetolo e Toasefululua, “[Ou te] popole ona o le tele o molimau a o tatou tagata o loo tumau lava i le ‘Ou te faafetai’ ma le ‘Ou te alofa,’ ma e toalaiti o loo mafai ona fai atu ma se lotomaualalo ae e manino ma le faamaoni, ‘Ou te iloa.’”²

Pe tatau ona ou tagi pe faailoa atu ni lagona ina ia maua ai se molimau moni?

E toatele lava tagata e fetagisi pe faaalia ia lagona pe a latou molimau atu pe lagona foi le malosi o le Agaga, ae e le o tagata uma e i ai ia aafiaga o lagona pe a ia lagonaina le Agaga. E te le tau faailoa atu lagona faapena i le ala lava e tasi e pei ona faaalia ai e isi pe a e molimau atu.

Sa saunoa Peresitene Howard W. Hunter (1907–95): “Ou te popole lava pe a foliga mai o lagona malolosi po o le maligi fua o loimata ua fesootai ma le mafutaga a le Agaga. E mautinoa lava e mafai ona aumai e le Agaga o le Alii ni lagona malolosi, e aofia ai loimata, ae o lena faailoaga i fafo e ao ona le fenumiai ma le mafutaga a le Agaga lava ia.”³

Afai ou te le o mautinoa pe i ai sa’u molimau, pe tatau ona ou taumafai e faasoa atu?

E faigofie lava le lagonaina e le o lava le malosi o lau molimau po o aoga foi pe a faasoa atu, ae a o e faasoa atu lau molimau, o le a e iloa ai le tele o se molimau o ia te oe! Aua nei e fefe e faasoa atu lau molimau. O le a e iloa ai o le tele ona e faasoa atu o lau molimau, o le tele foi lena o lona tuputupu ae.

Na saunoa mai Peresitene Boyd K. Packer, Peresitene o le Korama a Aposetolo e Toasefululua:

E le o se mea e le masani ai le faapea mai o se faifeautalai, “E mafai faapefea ona ou tuuina atu se molimau sei vagana ua ou mauaina? E mafai faapefea ona ou molimau atu o loo soifua le Atua, o Iesu o le Keriso, ma e moni le talalelei? Afai e le o i ai sa’u molimau faapena, pe le o le faamaoni ea lena?

“E, pe ana mafai ona ou aoao atu ia te outou lenei mataupu faavae e tasi: o se molimau e mafai ona maua i le tuuina atu! E i ai se vaega o lau sailiga mo le malamalama faaleagaga, o loo i ai lena ‘laasaga tele o le faatuatua,’ e pei ona taua ai e le au faitofa manino. O le taimi lea e te oo atu ai i le faatausiusiuga o le malamalama ma laa atu i le pogisa ma e iloa ai o loo malamalama foi le ala i luma atu mo na o se laa se tasi pe lua foi.”⁴

Faamatalaga

1. David A. Bednar, “Ia Matua Maelega ma Mafaufau i le Aiga,” Liahona, Nov. 2009, 20.

2. M. Russell Ballard, “Molimau Mama Atoatoa,” Liahona, Nov. 2004, 41.

3. Howard W. Hunter, i le Talai La’u Talalelei: O Se Taiala i le Galuega Faafaifeautalai (2004), 99.

4. Boyd K. Packer, “O Le Sailiga mo le Malamalama Faaleagaga,” Liahona, Ian. 2007, 16.

Ata o le paso na tusia e Eric P. Johnsen; ata na pue e Welden C. Andersen

Molimau