Ang Kaluwasan [Safety] ug Kalinaw sa Pagsunod sa mga Kasugoan
Ang mga sumbanan ug kamatuoran nga makaplagan diha sa Basahon ni Mormon klaro ug naghatag og instruksyon, yano ug bililhon. Kon kita magsugod sa pagkamatarung ugpagkamasulundon, kita matapos uban sa mga panalangin ug hingpit nga kalipay.
Niining atong panahon sa digital nga impormasyon, ang 24 ka oras nga pagkuha og mga balita ingon og daw dili mahitabo nga walay mga kapitulo nga may pamilyar nga mga istorya nga ipakita balik-balik. Ang mga tawo sa pamilyar nga plot kasagaran mosikat ug mailado pinaagi sa talagsaon kaayong mga talento isip mga artista, atleta, politiko, o negosyante. Daghang mga tuig sa pagpraktis o mapahinungurong serbisyo ug sakripisyo—mga himan alang sa ilang kalampusan sa piho nga kahanas o propesyon—magun-ob kon maapil diha sa usa ka eskandalo.
Ang katapusang eksena sa kanunay mao ang pinakaguol nga imahe sa mga artista nga luhaang mangayo og pasaylo ngadto sa huwes, shareholders, o mga constituent o sa pamilya, mga higala, o mga fan tungod sa ilang sayop. Ang resulta sa kasagaran adunay daghang wala planoha nga mga sangputanan—lakip ang kasubo, kaulaw, ug kaalautan—ngadto kanila, sa ilang mga minahal, ug sa ilang mga kaubanan.
Ang yano apan lawom og kahulugan nga mga pulong sa karaang propeta diha sa Basahon ni Mormon, si Alma, sa pag-awhag sa iyang anak nga lalaki magamit sa ika-21 nga siglo sama sa sobra na sa 2,000 na ka tuig ang milabay: “Ang pagkadautan dili mahitabo nga mahimo nga kalipay” (Alma 41:10).
Hapit sa tanang eskandalo karon, ang kahibalo ug pagkamasulundon sa mga kasugoan nga makita sa gipahiuli nga ebanghelyo paigo na unta aron mapugngan ang personal ug propesyonal nga kalisdanan.
Usa ka Pormula sa Kalipay
Usa ka pormula nga anaa sa ebanghelyo ni Jesukristo nagpakita sa dalan ngadto sa kalipay. Kini usa ka yano ug bililhong kamatuoran nga makita sa tibuok Basahon ni Mormon. Kini maayo kaayong pagkahulagway sa mga pagtulun-an ni propetang Lehi ngadto sa iyang anak nga mga lalaki sa dihang hapit na siya mamatay. Nagsulti ngadto sa iyang anak nga si Jacob, siya mitudlo, “Kay kini gikinahanglan gayud, nga adunay katugbang sa tanan nga mga butang” (2 Nephi 2:11). Dayon pipila ka bersikulo human ini siya midugang, “Ang mga tawo naingon, nga unta sila makabaton og hingpit nga kalipay” (2 Nephi 2:25).
Ang mga pagtulun-an ni Lehi niini nga wali ngadto kang Jacob yanong ma-summarize: Ang pagkamasulundon ug pagkamatarung makahatag og mga panalangin, nga makahatag og kalipay. Sa laing bahin, ang pagkamasinupakon ug pagkadautan makahatag og silot, nga makahatag og kaguol. Ang Manluluwas mao ang talagsaong Tigpataliwala sa tanang katawhan ug ang tigsuporta sa dalan sa kalipay ug kinabuhing dayon. Ang yawa mao ang naalaut nga amahan sa mga bakak ug ang tigsuporta sa dalan sa pagkabihag ug kamatayon.
Klaro, ang kaaway nakasabut nga kita dili mopili sa pagkabilanggo ug kamatayon, apan tungod kay siya naalaut sa kahangturan, siya usab nagtinguha sa kaalautan sa tanang katawhan (tan-awa sa 2 Nephi 2:27). Iya kining buhaton pinaagi sa pagtuis sa mga sangputanan sa sala ug pagkamasinupakon. Mao kini ang usa ka rason nganong gitawag siya nga amahan sa mga bakak.
Si Presidente Spencer W. Kimball (1895–1985) miingon: “Kamong tanan … nakaila ni Satanas, ang amahan sa mga bakak. Kamo nasayud kon unsaon niya nga ang kamaturoan mahimong usa ka bakak. Iyang adornohan ang dautan aron kini nindot, sayon ug gani maayo nga tan-awon.”1
Patuohon kita ni Satanas nga ang pormula sa kalipay magsugod uban sa kadautan ug sala. Kita gipasidan-an nga ang iyang mga tintasyon maayo kaayong nagtakuban nga siya gani usahay makita nga “usa ka anghel sa kahayag” (2 Nephi 9:9). Ang Ginoo naghulagway sa pagkapukan ug mga tumong ni Satanas:
“Busa, tungod kay si Satanas misukol batok kanako, ug nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya, ug usab, nga Ako kinahanglan nga mohatag ngadto kaniya sa akong kaugalingon nga gahum; pinaagi sa gahum sa akong Bugtong Anak, Ako nagsugo nga siya isalikway;
“Ug siya nahimo nga Satanas, oo, gani ang yawa, ang amahan sa tanan nga mga bakak, sa pag-ilad ug pagbuta sa mga tawo, ug pagdala kanila nga ulipon sa iyang pagbuot” (Moises 4:3–4).
Ang dalan sa kalipay nagsugod sa pagkamatarung pinaagi sa pagmasulundon sa mga sugo. Ang mga sugo gihatag kanato isip sagradong giya nga modirekta kanato palayo sa daghang mga kalamidad sa moralidad. Ang Ginoo mideklarar niini sa bag-o pa ang Pagpahiuli: “Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo” (D&P 1:17; emphasis gidugang).
Sunda ang mga Kasugoan
Ang ubang mga tawo nagtuo nga walay kapasikaran nga ang mga sugo mao ang sinugdanan sa dalan sa kalipay kaysa usa ka butang nga anaa diha sa dalan. Ang mosunod nga istorya gikan sa akong pagserbisyo isip presidente sa misyon sa Nagoya, Japan, mga pipila na ka tuig ang milabay naghulagway niini.
Ang akong asawa, si Lesa, ug ako nakaila og usa ka batan-ong babaye sa bag-o pa siyang moadto sa simbahan aron sa pagtambong og English class nga gitudlo sa mga misyonaryo. Siya mahigalaon, madasigon, ug nagkontrolar sa iyang kinabuhi, nga naglakip og maayong trabaho, dugay na nga boyfriend, ug iyang pamilya. Ang iyang pagpakig-uban sa mga misyonaryo ug mga miyembro pinaagi sa English class midasig sa iyang interes sa Simbahan, ug siya gisugdan sa pagtudlo sa mga misyonaryo. Ang iyang pagpamatuod sa kamatuoran sa gipahiuli nga ebanghelyo molambo sa kada higayon nga siya makigkita sa mga misyonaryo. Samtang nagbasa siya sa Basahon ni Mormon ug namalandong ug nag-ampo kabahin niini ug sa mga butang nga iyang nadunggan, siya nasayud nga kini tinuod.
Sa dihang ang mga misyonaryo misugod sa pagtudlo kaniya sa mga sugo, siya nasayud nga siya kinahanglang mosunod. Iyang gibulagan ang iyang boyfriend ug mihunong sa iyang trabaho, nga nagkinahanglan nga siya motrabaho ma-Dominggo. Siya misugod sa pagsunod sa Pulong sa Kaalam ug midawat sa balaod sa ikapulo. Ang iyang hugot nga pagtuo lig-on kaayo nga siya nagsugod sa pagsunod sa mga sugo halos sa higayon nga iya ning makat-unan.
Sa dihang gipahibalo niya ang iyang pamilya sa iyang interes sa Simbahan ug sa iyang pagtuon sa gipahiuli nga ebanghelyo, giingnan siya sa iyang mga ginikanan nga isip sangputanan niini makompromiso ang ilang relasyon. Sulod sa pipila ka semana sa pagdawat sa mga kasugoan, wala na siyay trabaho, apartment, o suporta sa pamilya. Klaro kaayo, ang mga sangputanan sa iyang pagkamasulundon nakaapekto sa iyang kinabuhi sa lisud kaayo nga paagi.
Nabalaka kaayo ko sa iyang sitwasyon. Usa ka gabii, sa pagkahuman sa usa ka busy nga adlaw, si Lesa ug ako migawas sa mission home aron maglakaw-maglakaw, nagtinguha og malinawong higayon nga mag-uban. Kami nakalitan samtang anaa mi sa usa ka busy nga interseksyon nga nagpadulong namo kining mahigalaong batan-ong investigator sakay sa iyang biseklita. Siya mitimbaya kanamo uban sa usa ka mainitong pahiyom ug gakos. Natingala nganong anaa pa siya sa dalan nga gabii na kaayo, nangutana mi kon unsay iyang gibuhat.
“Padulong ko sa akong bag-ong trabahoan sa drive-up window sa usa ka fast-food restaurant nga graveyard ang shift,” siya malipayong mipahibalo.
Kini nga trabaho nagrepresentar og dakong pag-ubos sa iyang sweldo, responsibilidad, ug oras sa trabaho kompara sa iyang trabaho sa una. Bisan pa niining dagko nga mga pagsulay ug problema sa temporal nga panghitabo sa iyang kinabuhi, malipayon gyud kaayo siya. Iya dayong gipahibalo nga siya aduna nay petsa sa bunyag. Sa among pag-uli sa mission home, si Lesa ug ako nakadayeg gayud kon sa unsang paagi nga ang iyang hugot nga pagtuo ug pagkamasulundon sa bag-ong nakaplagan nga mga kasugoan mipahimutang kaniya sa dalan ngadto sa hingpit nga kalipay.
Mga pipila ka semana ang milabay siya nabunyagan. Milabay ang panahon, siya nakig-uli sa maayong buot ngadto sa iyang pamilya ug nakakita og mas maayo nga trabaho. Mga pipila ka tuig ang milabay human sa iyang bunyag, nabugkos siya uban sa usa ka returned missionary didto sa Templo sa Tokyo Japan nga iyang nakaila sa usa ka kalihokan sa young single adult. Karon may mahangturong pamilya, sila napalanginan og gwapo nga batang lalaki. Usa ka mubo, nindot kaayo nga himno ang makahulagway sa mga panghitabo sa iyang kinabuhi isip resulta sa pagsunod sa mga sugo:
Ato nga sundon ang kasugoan!
May kalinaw ug dunay kaluwasan.
Siya mohatag; og panalangin.
Pulongs propeta: Ang sugo sunda.
Malinawon ug luwas kita.”2
Ang mga sumbanan ug kamatuoran nga makaplagan diha sa Basahon ni Mormon klaro ug naghatag og instruksyon, yano ug bililhon. Kon kita magsugod sa pagkamatarung ug pagkamasulundon, kita matapos uban sa mga panalangin ug hingpit nga kalipay.
Balaod
Pagkamasulundon (pagkamatarung)
Panalangin
Kalipay (hingpit nga kalipay)
Pagkamasinupakon (pagkadautan)
Silot
Magul-anon (alaot)
Mga paghulagway pinaagi ni Dilleen Marsh