Mensahe sa Unang Kapangulohan
Usa ka Tambag alang sa Nagduha-duha sa Pagpakigbahin sa Ebanghelyo
Ang mga disipulo ni Jesukristo may obligasyon kanunay sa pagdala sa Iyang ebanghelyo ngadto sa kalibutan (tan-awa sa Marcos 16:15–16). Bisan pa niana, usahay lisud sa pagbuka sa atong ba-ba ug maghisgut sa atong relihiyon niadtong nagpalibut kanato. Samtang pipila sa mga miyembro sa Simbahan may natural nga talento sa pag-istorya sa uban kabahin sa relihiyon, ang uban ingon og magduha-duha o mobati nga kiwaw, maulawan, o gani mahadlok sa pagbuhat niini.
Tungod niini, mosugyot ko og upat ka butang nga mahimong buhaton ni bisan kinsa sa pagtuman sa sugo sa Manluluwas sa pagsangyaw sa ebanghelyo “ngadto sa matag linalang” (D&P 58:64).
Mahimong usa ka Kahayag
Usa nako ka paboritong sanglitanan nga sa kanunay mapasidungog ngadto kang St. Francis sa Assisi mabasa, “Isangyaw kanunay ang ebanghelyo ug kon kinahanglan, paggamit og mga pulong.”1 Masabut niini nga sanglitanan nga ang labing makapatandog nga wali kasagaran wala isulti.
Kon kita may integridad ug kanunay nagsunod sa atong mga sumbanan, ang mga tawo makamatikod. Kon kita nagpakita og kalipay, sila mas makamatikod.
Ang tanan gusto nga malipay. Kon kita nga mga miyembro sa Simbahan nagpakita sa kahayag sa ebanghelyo, ang mga tawo makakita sa atong kalipay ug makabati sa gugma sa Dios nga nagpuno sa atong kinabuhi. Gusto nilang masayud kon ngano. Gusto nilang masabtan ang atong sekreto.
Kana nakapahimo kanila sa pagpangutana sama sa “Nganong malipayon kaayo ka?” o “Nganong positibo man kanunay ang imong kinaiya?” Ang mga tubag niining mga pangutanaha, siyempre, modala ngadto sa panaghisgutan kabahin sa gipahiuli nga ebanghelyo ni Jesukristo.
Mahimong Dali nga Ikaistorya
Ang paghisgut kabahin sa relihiyon—ilabi na ngadto sa atong mga higala ug mga minahal—ingon og makahadlok ug mahagiton. Dili gayud unta ingon niini. Ang pag-istorya og espirituhanong mga kasinatian o kabahin sa mga kalihokan o panghitabo sa Simbahan sa kaswal nga paagi mahimong sayon ug nindot kon kita may gamay nga kaisug ug salabutan.
Ang akong asawa, si Harriet, maayo kaayo nga ehemplo niini. Sa dihang nagpuyo mi sa Germany, siya mangita og paagi nga iyang maapil sa pag-istoryahanay ang mga hilisgutan kabahin sa Simbahan ngadto sa iyang mga higala ug kaila. Pananglitan, kon may mangutana kabahin sa iyang tapos sa semana, siya moingon, “Karong Dominggoha aduna mi nindot kaayong kasinatian sa among simbahan! Usa ka 16 anyos nga batan-ong lalaki namulong diha sa 200 ka mga tawo sa among kongregasyon kabahin sa pagpuyo og limpyo nga kinabuhi.” O, “Nahibaloan nako ang usa ka 90 anyos nga babaye kinsa migansilyo og sobra sa 500 ka mga habol ug mihatag niini sa programa sa humanitarian sa Simbahan aron ipadala ngadto sa mga tawo sa tibuok kalibutan nga nanginahanglan.”
Kasagaran, ang mga tawo nga nakadungog niini gustong maminaw pa og dugang. Sila mangutana. Ug kini modala ngadto sa mga oportunidad sa paghisgot kabahin sa ebanghelyo sa natural, masaligon, dili mapugsanong paagi.
Tungod aduna nay Internet ug social media, mas sayon karon maghisgut niining mga butanga sa yanong pag-istoryahanay kaysa kaniadto. Ang ato lang gikinahanglan mao ang simpleng kaisug sa pagbuhat niini.
Magmahimong Puno sa Grasya
Makaguol lang, sayon kaayo nga dili magkauyon. Kanunay kini mahitabo nga kita makiglalis, ipakaubos, ug mahusgahon. Kon kita masuko, magbinastos, o makapasakit sa mga tawo, dili na sila gustong mas masayud pa kabahin nato. Dili na maihap kon pila na ka mga tawo ang mibiya sa Simbahan o wala gyud magpamiyembro tungod kay may usa ka tawo nga nakapasilo kanila.
Grabe kaayo ang binastos karon sa kalibutan. Tungod kay dili mailhan diha sa Internet kon si kinsa ang nagsulat, mas sayon nga magbinastos diha sa internet. Dili ba angay nga kita, ang malaumong mga disipulo sa atong mabinationg Kristo, adunay mas taas nga sumbanan sa kalooy? Ang kasulatan nagtudlo, “Himoa nga sa kanunay magamadanihon ang inyong sinultahan, tinimplahan og asin, nga tungod niana inyong mahibaloan kon unsaon ninyo sa pagtubag kang bisan kinsa” (Mga Taga-Colosas 4:6).
Ganahan ko sa ideya nga ang atong mga pulong malipayon, matinuoron ug mabination. Inyo bang mahunahuna kon sama sa unsa ang atong mga pamilya, mga ward, mga nasud ug gani ang kalibutan kon kita mosunod niining yano nga baruganan?
Mahimong Puno sa Hugot nga Pagtuo
Usahay masobrahan ra ta sa pagdayeg o pagbasol sa atong kaugalingon kon maghisgut kabahin sa pagdawat sa uban sa ebanghelyo. Importanting hinumduman nga ang Ginoo wala magdahum nga kita ang mohimo sa pagkabig.
Ang pagkakabig mahitabo dili pinaagi sa atong mga pulong apan sa langitnong pagpangalagad sa Espiritu Santo. Usahay gikinahanglan lang ang atong mubo nga pagpamatuod o kasinatian aron masugdan ang paghumok sa kasingkasing o oportunidad nga mogiya sa uban sa pagsinati sa makapadasig nga mga kamatuoran pinaagi sa mga aghat sa Espiritu.
Si Presidente Brigham Young (1801–77) miingon nga siya nasayud nga ang ebanghelyo tinuod sa dihang siya “nakakita og tawo nga walay kahanas sa pagsulti, o talento sa pagpamulong sa publiko, kinsa makasulti og, ‘Ako nasayud, pinaagi sa gahum sa Espiritu Santo, nga ang Basahon ni Mormon tinuod, nga si Joseph Smith usa ka Propeta sa Ginoo.’” Miingon si Presidente Young sa dihang nadungog niya kining mapainubsanong pagpamatuod, “Ang Espiritu Santo nga gikan niana nga indibidwal nakapasanag sa akong pagsabut, ug kahayag, himaya, ug pagka-imortal [gipadayag] ngari kanako.”2
Mga kaigsoonan, pagbaton og hugot nga pagtuo. Ang Ginoo mopaklaro sa mga pulong nga inyong isulti ug mohimo niining gamhanan. Ang Dios wala mosugo kaninyo sa pagkabig apan sa pagbuka sa inyong ba-ba. Ang buhat sa pagkabig dili inyoha—kana anaa sa tawo nga naminaw ug sa Espiritu Santo.
Kada Miyembro Usa ka Misyonaryo
Akong mga higala, karon adunay mas daghang paagi kaysa sa una sa pagbuka sa atong ba-ba ug ipakigbahin ang makapalipay nga mga balita sa ebanghelyo ni Jesukristo. Adunay paagi alang sa tanan—bisan niadtong nagduha-duha sa pagpakigbahin sa ebanghelyo—sa pag-apil niining dako nga buhat. Kita makakita og paagi sa paggamit sa atong kaugalingong mga talento ug interes sa pagsuporta sa dakong buhat sa pagpuno sa kalibutan uban sa kahayag ug kamatuoran. Samtang ato ning buhaton, kita makakaplag sa kalipay nga masinati niadtong matinud-anon ug may igong kaisug nga “mobarug ingon nga mga saksi sa Dios sa tanan nga mga panahon” (Mosiah 18:9).
Pagtudlo Niini nga Mensahe
Usa ka epektibong paagi sa pagtudlo mao ang “pag-awhag sa imong mga gitudloan sa paghimo og … mga tumong nga makatabang kanila nga masunod ang baruganan nga imong gitudlo” (Pagtudlo, Walay Labaw Ka Mahinungdanon nga Tawag [1999], 159). Ikonsiderar sa pagdapit niadtong inyong gitudloan nga mainampoong maghimo og tumong sa pagpakigbahin sa ebanghelyo ngadto sa usa o mas daghang tawo karong bulana. Ang mga ginikanan makahisgot sa unsang paagi makatabang ang gagmayng mga bata. Makatabang usab mo sa mga sakop sa pamilya nga mag-brainstorm o mag-role-play og mga paagi nga maapil ang ebanghelyo sa sagad nga panag-istoryahanay ug maghunahuna sa umaabot nga mga kalihokan sa Simbahan diin makadapit sila og higala.
Paghulagway sa litrato pinaagi ni David Stoker, gawas kon gipahibalo