Gitintal nga Mamakak
Aderogba Aderemi, Nigeria
Ang chapel asa ko nagsimba didto sa Nigeria duol sa eskwelahan kansang prinsipal dili gyud gusto sa Simbahan. Sa usa ka higayon ang prinsipal miingon sa usa ka magtutudlo nga dili na mobalik sa eskwelahan human mahibaloan nga ang magtutudlo usa ka Santos sa Ulahing mga Adlaw. Usa ka miyembro sa Simbahan kinsa miboluntaryo sa pagbisita ug pagpasabut sa misyon sa Simbahan gisalikway.
Isip usa ka salesman alang sa mga ekipo sa laboratoryo ug sa medikal, kanunay kong mobisita og mga eskwelahan ug ospital aron mahalinan. Human sa usa ka bulan nga walay halin, wala na koy kapilian kondili sa pagbisita niining eskwelahan. Ang akong plano mao ang pagbaligya sa akong produkto ug mobiya, naglaum nga dili masayran sa prinsipal nga miyembro ko sa Simbahan. Ang Espiritu, hinoon, nagdasig kanako nga gusto niyang masayud sa akong relihiyon.
Ang akong pagbaligya uban sa nangulo sa science department sa eskwelahan hapsay, ug iya kong gidala sa prinsipal para sa bayad. Human sa pagsulat sa tseke, siya misugod sa pagpangutana aron mas makaila nako. Sa dihang ang iyang mga pangutana nahimong personal, dili nako komportable. Dayon nangutana siya sa dugay na nakong giampo nga dili unta niya ipangutana. “Unsa nga denominasyon nga miyembro ka?”
Gitintal ko nga mamakak, kuhaon akong tseke, ug molakaw tungod kay kinahanglan nako ang halin. Apan mibati ko nga kinahanglang sultian nako siya sa tinuod. Ngano man diay, ang unang mga Santos nakasinati og mas grabe pa ikompara niining gamay nga pagsulay sa akong pagtuo.
Uban sa nabag-ong kaisug, gitan-aw nako siya diretso sa iyang mata ug miingon, “Miyembro ko sa Ang Simbahan ni Jesukristo sa mga Santos sa Ulahing mga Adlaw.” Dayon mipamatuod ko. Sa akong katingala siya mipahiyom, miingon nga kitang tanan nagsimba sa samang Dios, ug gihatag ang tseke.
Sa akong pagbiya, usa ka kasulatan akong nahinumduman. “Karon kini mao ang usa ka dako nga pagsulay niadto nga nagbarug nga lig-on diha sa hugot nga pagtuo; bisan pa niana, sila makanunayon ug dili matarug sa paghupot sa mga sugo sa Dios, ug sila midawat uban ang pagpailub sa pagpanggukod nga gipahamtang diha kanila” (Alma 1:25).
Nalipay ko nga wala nako gipakyas ang Langitnong Amahan o ang akong kaugalingon. Tunggod niini nga kasinatian, mipasalig ko nga mahimong buotang sales representative. Mas importante, mipasalig kong mahimong buotang representante sa ebanghelyo ni Jesukristo.