Unsaon Nako Pag-conduct og Miting?

Paghulagway pinaagi ni Scott Greer

Nag-12 anyos na diay ka ug mobalhin gikan sa Primary ngadto sa Young Women o sa Aaronic Priesthood. Nindot na kaayo, ug ikaw ganahan sa bag-ong mga butang nga imong pagabuhaton. Imong nadiskobrehan, nga kini nga kausaban nagdala usab og bag-ong mga responsibilidad. Usa niini nga mga responsibilidad nga medyo makahadlok alang nimo mao nga ikaw hangyoon na sa pag-conduct og mga miting.

Depende unsa nga miting ang imong i-conduct (kalihokan sa Mutual, mga miting sa Dominggo, korum o mga miting sa kapangulohan sa klase), ang kinahanglanon ug agenda malahi gamay, apan aniay pipila ka mga sugyot ug mga giya nga i-konsiderar sa imong pagtuman niini nga responsibilidad:

Paggamit og agenda nga naglatid unsay mahitabo sa miting. Pangutana sa imong mga lider kon duna ba silay agenda template nga imong kasulatan.
Pagpili og musika nga makadapit sa Espiritu.
Pagplano og pangbukas ug panapos nga mga pag-ampo.
Paghimo og mga assignment sa sayo pa kon mahimo.
Pagsayo sa pag-abut ug siguroha nga ang tanan andam na.
Pagpahibalo kinsa ang mag-ampo, mogiya sa musika, motudlo, ug mohimo sa uban mga butang sa miting.
Pagbinuotan samtang ikaw mag-conduct ug tuguti ang Espiritu sa paggiya nimo. Pagpakita og maayong ehemplo ngadto sa ubang mga batan-on nga nagtambong sa miting.

Ang pagkat-on unsaon sa pag-conduct og miting tingali makahadlok og gamay sa sinugdanan, apan magkasayon ra kini kon magsige ka na og himo niini, ug makatabang kini nimo nga makaangkon og mga kahanas nga imong gikinahanglan isip umaabut nga lider sa Simbahan.