Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Pagkadisipulo sa Tanang Panahon, sa Tanang Butang, sa Tanang Dapit,” pahina 22: Ikonsiderar ang pag-imbitar sa inyong pamilya sa pagkompleto sa “eksperimento sa pagkadisipulo” nga gihisgutan niini nga artikulo. Sulod sa usa ka semana, pagtuon nga mainampoon sa usa ka pagtulun-an o istorya mahitungod ni Jesukristo. Sa sunod nga family home evening, ang mga sakop sa pamilya maka-report sa ilang mga kasinatian ug mga pagsabut.

“Mga Suga … Kamera … Aksyon!”, pahina 48: Human makabasa niini nga artikulo, hisguti uban sa inyong pamilya ang kaimportante sa pagpili og maayong media. Ikonsiderar ang pag-imbitar og mga sakop sa pamilya sa pagpakigbahin sa paborito nga ehemplo sa maayong media ug sa unsa nga paagi kini nakatabang nila. Mahimong mopakita ka og litrato ni Jesukristo samtang maghisgot ka sa unsa nga paagi kita makapili og media nga komportable kitang motan-aw o maminaw kon ang Ginoo uban nato. (Dugang nga mga ideya alang sa pagtudlo niini nga hilisgutan makita sa pahina 9.)

“Pagdala sa Primary ngadto sa Panimalay,” pahina 64: Ikonsiderar ang paglakaw-lakaw isip pamilya aron sa pagdiskobre kon pila ka buok ang inyong makita nga gilalang sa Langitnong Amahan. Ang mga sakop sa pamilya mahimong mokolekta og mga butang, modrowing og mga litrato, o molitrato sa ilang paborito nga mga gilalang. Mahimo ninyong tapuson pinaagi sa pagkanta sa “My Heavenly Father Loves Me” [Akong Langitnong Amahan Nahigugma Nako] (Children’s Songbook, 228–29)

Ang Akong Family Home Evening uban sa Misyonaryo

Isip usa ka bag-ong kinabig sa Simbahan, ganahan ako kanunay nga motabang sa mga misyonaryo sa akong ward. Pirme akong makakita nga bisan tuod ang mga investigator dili komportable nga maminaw sa mga panaghisgutan, malipayong silang moapil sa family home evening.

Usa niana ka higayon akong giimbitar ang full-time nga mga misyonaryo ug tibuok pamilya nga dili miyembro sa akong family home evening. Sa wala pa sila moabut, nagpuasa ug nag-ampo ko nga ang Espiritu anaa unta ug mobukas sa ilang mga kasingkasing ngadto sa ebanghelyo. Nanan-aw mi og missionary video mahitungod sa pagtabang sa mga pamilya nga mouswag ug makapalambo og pagsalig. Pagkahuman nagpaambit mi sa among mga pagbati bahin sa video. Ang Espiritu kusog kaayo.

Karon kining talagsaon nga pamilya andam nga makat-on pa mahitungod sa ebanghelyo pinaagi sa pagpakigmiting uban sa mga misyonaryo. Kitang tanan giimbitar sa pagtabang sa misyonaryo nga buhat, ug akong nakita nga ang mga family home evening mao ang epektibo nga paagi sa pagpakigbahin sa uban sa kalipay nga makabaton sa ebanghelyo sa akong kinabuhi.

Maria de los Angeles Vilca Zeballos, Peru