Ang Dios Nasayud sa Atong mga Gasa.

President Henry B. Eyring, Unang Magtatambag sa Unang Kapangulohan, “Tabangi Sila nga Motaas ang Panglantaw,” Liahona, Nob. 2012, 67.

Sa dihang nahimo kong usa ka deacon sa edad nga 12, nagpuyo ko sa New Jersey, 50 miles (80 km) gikan sa Siyudad sa New York. Gusto kaayo kong mahimong baseball player. Ang akong papa miuyon nga motan-aw og dula didto sa karaan ug masaysayon nga Yankee Stadium, didto sa Bronx. Makita gihapon nako ang bat nga gilabyog ni Joe DiMaggio nga nakahimo og home run diha sa tunga-tunga sa dulaanan uban sa akong amahan nga naglingkod tupad nako, ang bugtong panahon nga kami miadto sa dakong sangka sa baseball.

Apan ang laing adlaw uban sa akong amahan nakapausab sa akong kinabuhi sa kahangturan. Gidala ko niya gikan sa New Jersey ngadto sa balay sa usa ka giordinahan nga patriyarka sa Siyudad sa Salt Lake. Wala gyud ko kakita niya kaniadto. Gbilin ko sa akong amahan sa may hagdanan. Ang patriyarka mipalingkod nako, mipandong sa iyang mga kamot sa akong ulo, ug mihatag og panalangin nga naglakip og deklarasyon sa dakong tinguha sa akong kasingkasing.

Miingon siya nga ako usa niadtong kinsa giingnan, “Bulahan ang tigbuhat og kalinaw.” [Mateo 5:9.] Nasurprisa kaayo ko nga usa ka tawo nga wala kaila nako nasayud sa akong kasingkasing nga akong gibuka ang akong mga mata aron tan-awon ang kwarto diin nahitabo ang mao nga milagro. Kana nga panalangin sa mga posibilidad nakapalambo sa akong kinabuhi, sa akong kaminyoon, ug sa akong priesthood nga pagserbisyo.

Gikan niana nga kasinatian ug ang misunod niini, ako makapamatuod, “Kay dili tanan aduna sa matag gasa nga ihatag ngadto kanila; kay adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios. (D&P 46:11).

Tungod kay ang Ginoo mipadayag nako sa gasa, ako nakahimo sa pag-ila ug pag-andam sa mga oportunidad sa pagbuhat niini sa pagpanalangin niadtong akong gimahal ug giserbisyohan.

Ang Dios nasayud sa atong mga gasa. Ang akong hagit ninyo ug nako mao ang pag-ampo aron makahibalo sa mga gasa nga gihatag nato, aron makahibalo sa pagpalambo niini, ug sa pag-ila sa mga oportunidad sa pagserbisyo nga gihatag sa Dios nato. Labaw sa tanan, ako nag-ampo nga kamo madasig sa pagtabang sa uban sa pagdiskobre sa ilang espesyal nga mga gasa gikan sa Dios sa pagserbisyo.

Paggamit Niini nga Mensahe

Samtang kamo magbasa sa Doktrina ug mga Pakigsaad 46:11–26, pag-ampo aron makahibalo unsa nga espirituhanong gasa ang anaa ninyo.
Sa unsang paagi nga ang pagtabang sa uban makatabang ninyo sa pagpalambo sa inyong espirituhanong mga gasa?
Kon wala pa mo makadawat og patriyarkal nga mga panalangin, ikonsiderar ang pagkuha.

Ikonsiderar sa pagsulat sa inyong mga hunahuna sa inyong journal o hisguti kini ngadto sa uban.