Miapil Mi
Nancy Grant, Georgia, USA
Kami mibalhin gikan sa dakong siyudad nga daghang mga Santos sa Ulahing mga Adlaw ngadto sa usa ka lungsod nga 5,000 ang populasyon sa rural nga habagatang silangan sa Estados Unidos, diin kami nagpuyo og sobra sa pito katuig. Sa dihang mibiya ko sa usa ka lokal nga hardware sa una namong adlaw didto, usa ka batan-ong klerk miingon, “Ayo-ayo, Gng. Grant.”
Nangutana ko, “Giunsa nimo pagkahibalo sa akong ngalan?”
Siya mitubag, “Kamo lang ang bag-ong mibalhin dinhi sa lungsod.”
Kami nakapalit og balay tabok sa karsada sa usa ka simbahan sa Protestante ug laing simbahan sa Protestante sa pikas eskina, apan nagpuyo mi og mga 45 minutos sa pinakaduol nga LDS meetinghouse. Matag Dominggo, ingon man makaduha sulod sa semana, kami magbiyahe ngadto sa among meetinghouse. Atol niadtong pito ka tuig, ang akong bana nagserbisyo sa bishopric, ug ako nagserbisyo isip presidente sa Primary ug dayon presidente sa Young Women.
Kami nasayud nga ang social life ug pundasyon sa katilingban sa gamay nga lungsod anaa sa lokal nga simbahan. Aron madawat, kami nasayud nga kinahanglan ming moapil. Sa wala madugay ang among tulo ka bata nasuod sa ubang mga bata sa ward, apan gusto sab namo nga mobati sila nga maapil sa among kasilinganan. Giawhag namo sila nga moapil sa mga kalihokan sa semana sa lokal nga simbahan, lakip ang panihapon sa pamilya matag Miyerkules sa gabii sa usa ka simbahan.
Among gipaapil ang among mga anak sa lokal nga mga programa sa kabatan-onan. Mitambong usab ang among mga anak sa Vacation Bible School sa duha ka duol nga mga simbahan. Ang among mga babaye mikanta sa lokal nga choir sa kabatan-onan; usa sa among anak nga babaye nahimo ganing solowista sa choir. Ang among anak nga lalaki mitambong sa grupo sa mga batan-on sa lokal nga simbahan.
Kanunay may bisita nga ministro nga mosangyaw batok sa “mga Mormon,” apan ang among mga silingan nasayud nga kami dili sama sa mga tawo nga pabantayan sa ministro.
Matag ting-init ang mga simbahan sa rehiyon sa usa sa simbahan nga Protestante mopasiugda og kamping sa mga batan-on sa St. Simons Island, Georgia. Human sa usa niana nga kamping, ang ministro miingon gikan sa pulpito, “Ang bugtong batan-on nga makatambong sa kamping karong ting-init mao ang atong boutang Mormon nga batang babaye, si Kelly Grant.”
Ang among mga silingan nga Protestante midawat kanamo tungod gidawat sab namo sila. Wala namo gikompromiso ang among mga sumbanan o baruganan.
Samtang nagdako ang among mga anak, mao usab ang ilang pagpamatuod sa gipahiuli nga Simbahan. Ang ilang nakat-unan nga mga istorya sa Biblia gikan sa pikas simbahan nakapahimo kanila nga mas masabtan ang relasyon tali sa Biblia ug sa Basahon ni Mormon. Dugang pa, ilang nakita ang mahinungdanong bahin sa priesthood sa atong Simbahan, ug ilang mabati ang kalainan.
Sa dihang ang among mga anak nagkaduol na sa edad nga mahimong makig-date, ang kompaniya sa akong bana mibalhin niya sa Atlanta, Georgia. Naghilak ko samtang among gipirmahan ang kontrata sa pagkahalin sa among balay ngadto sa bag-ong mga tag-iya. Ang among abogado migakos nako ug malumong miingon, “Ang tanan makasulti nga ang mga Mormon nakapuyo dinhi.”
Ang kasinatian sa among mga anak diha sa gamayng lungsod nga daghang Protestante nakatudlo kanila sa pagkamauyunon, pagpailub, ug pagsabut. Sila nakakaplag og komon nga pagtuo sa ubang mga relihiyon, nga nakatabang kanila sa pagserbisyo isip mga representante sa Simbahan. Ug sila nakadayeg sa bili sa Espiritu Santo, sa priesthood, ug sa dakong gugma sa Manluluwas alang kanatong tanan.
Wala kami nakakabig bisan usa niadtong pito ka tuig, apan kami nakatanom og mga liso. Kami napanalanginan karon tungod kadtong mga tawo sa gamay nga lungsod miabut sa among kinabuhi. Naghinaut ko nga sila napanalanginan tungod miabut mi sa ilang kinabuhi.