Naadik sa mga Video Game
Paghulagway pinaagi ni Stephen Sitton
Sa nag-edad na ako og 13, gihatagan ko sa akong mama og video game para sa akong inadlawan. Ang mga video game bag-o para nako, ug kini dunay nindot nga mga graphic ug makalingaw kaayo. Bakasyon sa eskwelahan, ug nakahukom ko nga akong humanon ang dula og sayo aron makadula ko sa gawas uban sa akong mga higala.
Usa ka Huwebes sa hapon nagsugod ko sa pagdula sa akong bag-ong video game. Wala na ko kabantay, nga lapas na sa tungang gabii, ug wala ko makaampo. Apan nagpadayon ko pagdula.
Migrabe hinoon. Sa akong pagmata sunod nga adlaw, ang unang butang nga akong gihimo mao ang pagdula na sad. Dili gani ko mohunong aron mokaon o matulog, ug ang naa sa akong hunahuna mao ang pag-abut sa sunod nga level sa dula.
Sa Sabado sa gabii ang akong mama mipasidaan nako nga kon dili ko mosayo pagkatulog, maglisud ko pagmata sa sunod buntag sa pagsimba. Apan nagpadayon ko sa pagdula ug wala matulog hangtud sa alas 3:00 sa buntag. Sa pag-abut nako sa simbahan, gikapoy kaayo ko nga dili ko maka-focus. Wala ko makapaambit sa sakrament, ug mipauli ko aron matulog, gikapoy pag-ayo.
Natulog ko sa tibuok Dominggo ug wala momata hangtud sa buntag sa Lunes, ug mimata lang ko aron sa pagdula. Nianang semahana nasayud ko nga kinahanglan kong dunay maayong kinatulgan ug matulog og sayo, pero bisan na nagpadayon kog usik-usik sa panahon sa mga video game. Misugod ko paggahin og mas daghang oras sa pagdula og video game kay sa pagbasa sa mga kasulatan. Gani, mihunong ko sa pagbasa sa daghang mga adlaw. Sa dihang nagsugod na ang pag-eskwela, ang akong mama midili nako sa pagdula sa tingklase, mao nga gipahimuslan nako ang pagkatapos sa semana sa pagdula, lakip ang mga Dominggo.
Sa dili na pagsimba sa Dominggo, mihunong ko sa pagbuhat sa unsay importante alang sa butang nga dili importante sama sa video game. Wala ko magsunod sa tambag sa akong lolo, kinsa sa makausa miingon, “Ayaw gayud biyai ang mga butang nga mas importante alang sa butang nga dili kaayo importante. Kini nga tambag nagpabilin gayud nako.
Nakaamgo ko nga kinahanglan nakong balansihon ang akong kinabuhi. Usa ka butang nga nakatabang nako mao ang akong klase sa seminary. Sa pagsugod nako sa high school, ang seminary gihimong kabahin sa inadlaw nga kurikulum, ug nakatabang gyud ni nako. Nakahatag ni og oportunidad nako sa pagkat-on sa paghimo sa akong tukma nga mga prayoridad ug unahon ang Ginoo labaw sa tanan. Kon mosalig ta Kaniya ug kon mohangyo ta Kaniya gikan sa kinahiladman sa atong mga kasingkasing sa pagtabang nato sa ubang mga aspeto sa atong mga kinabuhi, ang Ginoo maminaw nato. Kon tinud-anay kitang magtinguha nga mag-usab, makahimo ta.
Maayo gani, wala na ko moagi og dagkong problema aron makahunong ko sa pagdula. Ang paghimo sa akong tukma nga mga prayoridad ug paglimit sa panahon nga akong gigahin sa pagdula igo na. Hinoon, wala kana mahitabo hangtud nga akong gihangyo ang Ginoo pinaagi sa pag-ampo alang sa panabang, ug Siya mitabang nako.