Mga Apostoles Nag-focus sa Hugot nga Pagtuo diha sa Ginoong Jesukristo atol sa Pagbisita sa Pilipinas
Sila si Elder David A. Bednar ug Elder Quentin L. Cook sa Korum sa Napulog Duha ka mga Apostoles, uban sa laing mga lider sa Simbahan, mibisita sa Philippines Area gikan sa Agosto 24 hangtud Septyembre 2, 2012.
Sa mga komperensya sa pagpangulo sa priesthood, mga debosyonal sa young single adult, mga komperensya sa stake, ug mga miting sa misyon, ang Kaigsoonan mitudlo sa doktrina ug miawhag sa mga Santos sa paglig-on sa ilang pagtuo diha kang Jesukristo.
Sa Laguna, gitubag ni Elder Bednar ang mga pangutana sa mga young single adult atol sa espesyal nga miting. Mipasabut siya, “Ang Manluluwas migamit og mga pangutana isip usa sa Iyang nag-unang mga himan sa pagtudlo. Kon maningkamot kita sa pagpangutana og dinasig ug epektibo nga mga pangutana samtang kita mamalandong ug mag-ampo, kamo ug ako anaa sa proseso sa pagkat-on nga makapahimo nato nga makadawat og inspirasyon ug makakita sa atong kaugalingong mga tubag gikan sa Espiritu Santo.”
Pagka-Dominggo ang chapel, mga cultural hall, ug ang mga overflow room sa Legazpi Stake Center napuno sa mga miyembro samtang nagtudlo si Elder Cook, “Ayaw itugot nga ang inyong mga pagduha-duha mopahuyang sa inyong pagtuo.”
Gihatagan niya og gibug-aton ang kaimportante sa mga bana ug mga asawa nga magkauban diha sa kaminyoon sama sa gitudlo sa “Ang Pamilya: Usa ka Pamahayag ngadto sa Kalibutan” (Liahona ug Ensign, Nob. 2010, 129).
Gitimbiya ni Elder Cook ang mga miyembro pagkahuman sa miting.
Ang mga miyembro ug misyonaryo sa Iloilo, sa Isla sa Panay, mibiyahe og lima ka mga oras sakay sa barko ug bus sa pagtambong sa mga miting diin si Elder Bednar mihatag og instruksyon sa pagpalig-on sa ilang pagtuo diha kang Jesukristo ug sa pagtabang sa uban nga moduol kang Kristo.
“Ania kami aron sa pagtudlo sa ebanghelyo ni Jesukristo, apan kinahanglang hinumduman nato kanunay nga ang tinuod nga magtutudlo mao ang Espiritu Santo,” gi-summarize ni Sister Manguil, usa ka full-time nga misyonaryo nga nagserbisyo sa Philippines Iloilo Misssion.
Didto sa Cagayan de Oro si Elder Cook misulti sa mga young adult, “Ang inyong pagkamatarung gikinahanglan, ug kini nga nasud kinahanglan malig-on. Isip resulta, may epekto ang kalig-on sa Simbahan dinhi sa Pilipinas nga mopanalangin sa mga tawo sa tibuok Asya.”
Giawhag niya ang mga miyembro sa pag-focus sa unsay labing importante, pagbuntog sa mga pagduha-duha, paggamit sa hugot nga pagtuo, ug pagminyo diha sa templo.
“Ang tayming sa mga pagtulun-an sa mga baruganan ug mga pagpasabut sa mga kasulatan nga ilang gipakigbahin [labing] importante,” miingon ang presidente sa Iligan Philippines Stake nga si Carlo V. Crisanto. “Sa pagkatinuod kadto nga mga baruganan maoy atong gikinahanglan karon. … Sa tanang mga calling nato, ang labing importante anaa sa pamilya.”
Gitapos sa mga Apostoles ang ilang pagbisita sa Pilipinas pinaagi sa pagpakigtagbo sa duha sa mga senador sa Pilipinas ug pagtambong sa kultural nga kalihokan nga gipasundayag sa lokal nga kabatan-onan.
Sulod sa 10 ka adlaw niadtong Agosto ug Septyembre, si Elder David A. Bednar ug Elder Quentin L. Cook sa Korum sa Napulog Dduha ka mga Apostoles mibisita sa mga siyudad sa tibuok Pilipinas aron makigkita sa mga lider, mga miyembro, ug mga misyonaryo.
Gilitratohan ni Kaye Bay