Kita Nagkinahanglan sa Simbahan ni Kristo
Usa sa nagkauso nga kinaiya mao ang pagpamakak.
Kon makalili lang mo sa sudlanan sa himan [toolbox] sa yawa, inyong makita ang mga instrumento nga makapadani sa mga tawo nga mawala, ingon man ang pipila ka epektibong mga himan nga klarong iyang gamiton kanunay.
Usa ka partikular nga himan nga iyang mas gigamit karong panahona mao kini nga matang sa dili mabantayang pagpamakak: “Dili na kamo kinahanglang og organisado nga relihiyon aron mahimong buotan nga tawo, espiritwal, o sa paghigugma ni Jesus. Ang tanang mga simbahan dili man gihapon hingpit ug korupt.”
Kini nga matang sa pagpanglingla maliputon kay nakaangkla lang ni sa pipila ka tinuod nga mga ideya aron madawat ang dakong bakak. Tinuod nga kinahanglan natong palig-unon ang atong relasyon ngadto sa Dios ug nga ang mga tawo dili hingpit, apan kining mga kamatuoran wala magpasabut nga ang pagkaadunay simbahan sayop.
Kini nga paghunahuna sayop, ug ania ang lima lang ka rason kon ngano:
1. Si Kristo miestablisar sa Iyang Simbahan. Sa mga Ebanghelyo ni Mateo, Marcus, Lucas, ug Juan, inyong makita ang daghan sa pagpangalagad sa Manluluwas naglangkob sa pagtawag sa mga tawo, paghatag kanila og katungod, pagbansay kanila sa pagpangulo, ug pagtudlo kanila unsaon sa paglihok isip grupo. Si Elder Dallin H. Oaks sa Korum sa Napulog Duha ka mga Apostoles mitudlo, “Kadtong kinsa mosalikway sa panginahangan og organisado nga relihiyon misalikway sa buhat sa Magtutudlo, kinsa mitukod sa Iyang Simbahan ug sa mga opisyal niini diha sa tunga-tunga sa kapanahonan ug kinsa mitukod pag-usab niini sa moderno nga kapanahonan.”1
2. Ang Simbahan ang nagpahigayon sa ebanghelyo ug sa mga ordinansa niini. Ang Manluluwas klarong mitudlo nga ang bunyag ug ang gasa sa Espiritu Santo kinahanglanon sa kaluwasan (tan-awa sa Juan 3:5), ug ang katungod sa pagtudlo sa ebanghelyo ug pagpahigayon niining mga ordinansa gidumala. Sama sa gisulti ni Elder Oaks, “Klaro sa Biblia nga ang katungod sa priesthood kinahanglanon ug kini nga katungod kinahanglan nga matugyan pinaagi sa pagpandong sa mga kamot niadtong naghupot niini. Ang katungod sa priesthood dili maangkon gikan sa usa ka tinguha sa pagserbisyo o sa pagbasa sa mga kasulatan.”2
3. Ang Simbahan nagtabang kanato nga mahimong mas maayo nga katawhan. Si Elder Donald L. Hallstrom sa Kapangulohan sa Seventy bag-ohay lang mitudlo: “Gikinahanglan nato ang ebanghelyo ug ang Simbahan. Gani, ang katuyoan sa Simbahan mao ang pagtabang kanato sa pagsunod sa ebanghelyo.”3 Bisan tuod ang Simbahan adunay dili hingpit nga mga tawo, kini makatabang kanato nga mas mahimong sama ni Jesukristo pinaagi sa pagtudlo kanato sa Iyang doktrina, paghatag kanato og mga oportunidad sa pagserbisyo ug personal nga kalamboan, ug nagtugot kanato sa paghimo ug pagbag-o sa mga pakigsaad uban sa Dios.
4. Ang panaghiusa mahinungdanon. Ang Ginoo nagmando kanato sa “paghiusa, ug kon kamo dili magkahiusa kamo dili ako” (D&P 38:27). Kini nga panaghiusa mahinungdanong bahin sa plano sa Langitnong Amahan alang kanato. Si Presidente Henry B. Eyring, Unang Magtatambag sa Unang Kapangulohan, mitudlo:
“Kita nangandoy, isip espiritu nga mga anak sa atong Langitnong Amahan, alang nianang hingpit nga kalipay nga anaa kanato kaniadto uban Kaniya sa kinabuhi nga wala pa dinhi sa kalibutan. Ang Iyang tinguha mao ang paghatag kanato nianang sagrado nga pangandoy nga magkahiusa gikan sa Iyang gugma alang kanato.
“Siya dili mahimong mohatag niini ngari kanato isip mga indibidwal. Ang hingpit nga kalipay sa panaghiusa nga gusto Niya nga ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini uban sa lain. Mao nga dili ikatingala, nga ang Dios miawhag kanato sa pagpundok aron Siya makapanalangin kanato.”4
5. Ang “organisado” dili susama og kahulugan sa “bati” o “korupt.” Kasagaran kon ang mga two motawag sa usa ka tawo o butang nga “organisado,” kini pagdayeg. Apan sa relihiyon ingon og kini bati. Sumala ni Elder Neal A. Maxwell (1926–2004) sa Korum sa Napulog Duha ka mga Apostoles, usa sa mga rason nga gi-organisar ni Kristo ang Iyang Simbahan “tungod kay ang wala mahan-ay, indibidwal nga pagkamaayo dili paigo sa pagpakigbatok sa yawa.”5 Ang Ginoo klarong mipasabut sa isyu sa dihang Siya misulti, “Tan-awa, ang akong balay mao ang balay sa kahusay, miingon ang Ginoong Dios, ug dili usa ka balay sa kagubot” (D&P 132:8). Ang organisado mao gayud ang kinahanglanon sa relihiyon.
Samtang kamo makasugat sa mga bakak nga anaa sa gigamit nga mga himan sa yawa, hinumdumi nga kamo adunay inyong kaugalingong himan sa pagtabang kaninyo nga makasunod sa ebanghelyo—mga himan nga maanaa kanato pinaagi sa Simbahan ni Jesukristo: mga kasulatan, gasa sa Espiritu Santo, inyong pagpamatuod, ug mga kamatuoran nga gipadayag sa mga propeta karon.
Sa wala: paghulagway sa litrato pinaagi ni Cristina Smith; sa tuo: detalye gikan sa Si Kristo ug ang Batan-ong Datu nga Magmamando, ni Heinrich Hofmann, sa maayong kabubut-on sa C. Harrison Conroy Co.; Pagpahiuli sa Melchizedek Priesthood, ni Walter Rane, © IRI; PAGHULAGWAY sa litrato ni Welden C. Andersen © IRI