Nag-awhag ang Simbahan sa mga Miyembro sa Tibuok Kalibutan sa Lokal nga Pagserbisyo
Sa miaging tuig o sa una pa, ang Welfare Department sa Simbahan mibag-o sa pagpasabut sa mga miyembro sa tibuok kalibutan sa paghatag og tabang diha sa ilang kaugalingong mga komunidad.
Ang seksyon sa Humanitarian Service sa LDS.org nagsugyot, “Unsa nga mga panginahanglan o mga hagit ang inyong nakita o nadungog? … Kon kamo makakita og panginahanglan sa inyong komunidad apan wala makakita og naestablisar nga programa nga makatubag niini nga panginahanglan, paningkamuti ang pagpangita og solusyon” (sa LDS.org, klik sa Resources, Welfare, Humanitarian Service).
Si Lynn Samsel, direktor sa emergency response alang sa Simbahan, mihisgot sa pipila ka mga benepisyo sa humanitarian response sa lokal nga level: “Mas paspas kini, wala kaayoy mga problema sa custom, nagtugot kini sa Simbahan sa pagpalit sa lokal nga mga produkto nga pamilyar sa mga miyembro sa maong dapit, nagsuporta kini sa lokal nga ekonomiya, ug nagtabang kini sa paglig-on og mga relasyon.”
Niadtong 2011, ang politikanhong kasamok sa daghang mga nasud sa Arab nakahatag og problema sa liboan ka mga tawo. Imbis nga maghimo og mga hygiene kit didto sa Salt Lake ug ipadala kini ngadto sa Middle East, ang Simbahan mihatag og kwarta ngadto sa lokal nga kapangulohan sa area. Ang 50 ka mga miyembro nga nagpuyo sa Jordan nakigtambayayong uban sa lokal nga mga organisasyon sa paghimo ug pag-apud-apod sa 40,000 ka mga hygiene kit ug mga pakete sa pagkaon sa lima ka adlaw.
Sa tibuok kalibutan, ang indibidwal nga mga miyembro makasugod sa ilang kaugalingong mga proyekto sa pagserbisyo. Sa ubang mga sitwasyon ang branch, ward, district, o stake makaorganisar og mga oportunidad alang sa mga miyembro ug sa uban sa pagserbisyo.
Lokal nga mga solusyon, gipasabut ni Gustavo Estrada sa Welfare Department, sa kasagaran makatubag sa panginahanglan kay sa mga solusyon nga gikan pa sa liboan ka mga milya.
Pagkahuman sa Marso 11, 2011, nga linog ug tsunami nga miguba sa Japan, ang Simbahan nagdali sa pagtabang. Mipadala sila og kwarta ngadto sa lokal nga mga lider, kinsa mipalit og pagkaon ug ubang mga suplay diha sa nasud. Ang mga miyembro sa Japan nga wala maapektohi direkta sa linog mihimo sa mga kit aron makatabang sa talagsaong mga panginahanglan sa mga biktima sa katalagman kay sa mga generic kit nga anaa.
“Samtang ang mga miyembro mogawas ug moserbisyo sa ilang mga komunidad, ilang malig-on ang ilang mga relasyon sa ilang mga silingan ug makaangkon og pagsalig nga molambo pinaagi sa pagtambayayong sa komon nga problema,” miingon si Sharon Eubank, direktor sa humanitarian services sa Simbahan.
Niadtong 2012, sa pagpaningkamot sa pagpakunhod sa gidaghanon sa nangamatay nga mga bata sa naglambo nga mga nasud, ang LDS nga mga bolunter sa Ghana mipadala og 1.5 ka milyon ka mga text message ngadto sa ilang mga ka nasud, nagpahibalo nila sa pagpamakuna nga gipasiugdahan sa partner sa Simbahan.
“[Karon] kon dunay moabut nga laing problema sa umaabut, adunay foundation nga motabang pag-usab,” miingon si Sister Eubank. “Ang pagserbisyo makahatag og pagsabut ug makapalambo og tinuod nga Kristohanong panag-inigsoonay nga mas paspas kay sa bisan unsa nga akong mahunahunaan.”
Ang mga miyembro sa Chile nagputos og liboan ka mga hygiene kit human sa grabing linog nga nakaguba sa nasud niadtong 2010.
© IRI