Hangtud Kita Magkita Pag-usab
Paghinumdom Kaniya sa Igpapahulay
Ang among leksyon sa Sunday School mahitungod sa pagbalaan sa Igpapahulay nindot ra—hangtud nga adunay naghisgot bahin sa telebisyon
Samtang ang mga tawo mipagawas sa ilang mga opinyon kabahin kon angay ba ang pagtan-aw og telebisyon sa Dominggo, ang ubang mga sakop sa klase nahimong. Sa wala madugay, ang ubang mga sakop sa klase nasilo. Ang Espiritu, nga sa sinugdanan nag-uban sa among panaghisgutan, gipulihan sa klaro nga kabalaka.
Nakaobserbar sa nagpadayong panagbangi, si Kenneth Payne, sakop sa among kapangulohan sa stake, mihangyo nga mosulti. Mibarug siya ug misulti namo kabahin sa iyang anak nga si Brian, nga nagserbisyo sa Japan Tokyo North Mission. Sa dihang si Presidente Payne ug ang iyang pamilya misugat ni Brian sa airport gikan sa iyang misyon niadtong Marso 2003, nagmulo siya sa tikig, sakit nga apapangig. Pipila ka semana, si Brian nadayagnos nga dunay non-Hodgkin’s lymphoma.
Paglabay sa usa ka bulan nagsugod siya og chemotherapy ug dayon radiation. Si Presidente Payne miingon nga ang mga doktor nagplano og bone-marrow transplant inig Septyembre 22, apan human sa unang adlaw nianang bulana, “naglisud na si Brian.”
Naospital siya sa ikaduhang semana sa Septyembre. Nianang higayona, tungod sa kaagresibo sa kanser, ang mga doktor nakatino nga ulahi na kaayo alang sa transplant. Gipauli sa pamilya si Brian gikan sa ospital niadtong Septyembre 21. Namatay siya pagkasunod buntag.
“Ang Septyembre 22 usa ka espesyal nga adlaw alang sa akong pamilya ug nako,” miingon si Presidente Payne. “Nianang adlawa namalandong kami ug naghunahuna ni Brian, sa iyang kontribusyon sa among pamilya, ug sa unsa nga paagi siya mihatag sa katapusang duha ka tuig sa iyang kinabuhi ngadto sa Ginoo ug ngadto sa mga Hapon, nga iyang gimahal. Gimingaw mi niya, ug nianang adlawa mamalandong kami sa iyang kinabuhi ug magpasidungog sa iyang handumanan.”
Alang natong tanan, miingon si Presidente Payne, ang Dominggo mao ang adlaw sa pamalandong ug paghinumdom.
“Mogahin ta og panahon sa pagtambong sa atong mga miting sa Simbahan, pag-ambit sa sakrament, pagsubo sa atong mga sala, ug pagpamalandong sa pag-antus sa Manluluwas alang nato,” miingon siya. Moserbisyo ta, mohigugma ta, ug maningkamot nga dili mabalda sa mga kalihokan nga makapugong nato sa pagsimba Kaniya.”
Miingon si Presidente Payne nga kon ang mga kalihokan sa Dominggo nahisubay niana nga espiritu, nan mabati nato ang eksakto kon mobuhat ta niini. Apan kon kini makabalda nato sa paghinumdom sa Manluluwas ug pagpangalagad sa Igpapahulay sama sa Iyang pagpangalagad, nan tingali kinahanglang atong ikonsiderar ang atong pagpili.
Milingkod dayon siya ug wala nay gisulti. Dili na kinahanglan. Mibalik na ang Espiritu sa klasrom, ug kaming tanan naminaw.
Detalye gikan sa Si Kristo sa GETSEMANI, ni Heinrich Hofmann, sa maayong kabubut-on sa C. Harrison Conroy Co.