Pagtubag sa mga Pangutana mahitungod sa Plano sa Kaluwasan

Ni Michael R. Morris

Mga Magasin sa Simbahan

Ug unsay gituohan sa Mormons mahitungod sa kaminyoon?” ang akong titser sa Spanish sa high school nangutana nako.

Milingi ang tanan nakong mga kauban sa klase, naminaw alang sa akong tubag. Nakapanlad-ok ko sa katingala kon naunsa ang panaghisgutan sa klase nga nausab gikan ni Don Quixote ug Dulcinea ngadto sa dating ug kaminyoon.

Walay laing miyembro sa Simbahan diha sa klase. Unsay akong isulti? Unsa ka detalye ang akong ihatag? Kataw-an ba ko sa tanan kon maghisgot ko og mahangturong kaminyoon?

“Kami, uh … ,” nagkanga-kanga ko, wala gihapon makasiguro kon unsay isulti.

Dayon, ang akong higala nga si Denise mitabang nako. “Ang Mormons adunay nindot nga panan-aw sa kaminyoon,” miingon siya. “Nagtuo sila nga ang kaminyoon nga gipahigayon sa ilang mga templo molungtad sa kahangturan.”

“Nindot kaayo kana,” tubag sa among titser. Bisan ang akong mga kauban sa klase ingon og natagbaw.

Niana, ang klase nagpadayon ug ako natingala nganong gipaningot ko sa pangutana nga sayon ra kaayong gitubag sa akong higala nga dili miyembro.

Kon magkadaghan ang mga tawo nga makadungog mahitungod sa Simbahan, ang mga Santos sa Ulahing mga Adlaw adunay daghang mga oportunidad sa pagtubag sa mga pangutana mahitungod sa ebanghelyo. Sa high school, akong nakat-unan nga dili kinahanglan nga motubag kita og taas, ug dili mahadlok. Ang nindot, yanong mga doktrina sa ebanghelyo naghisgot sa ilang mga kaugalingon.

Sa sunod higayon nga ang inyong mga higala mangutana sa atong nahibaloan sa “plano sa kaluwasan,” i-konsiderar ang paggamit sa mosunod nga mubo nga mga tubag. Naghatag kini og mga detalye sa mga tawo nga gustong makahibalo, mao nga dili kinahanglan nga imo pang i-dayagram ang tibuok plano sa kaluwasan sa usa ka tsart.

Diin Man Kita Gikan?

Kita mahangturong mga binuhat. Sa wala pa kita matawo, nagpuyo kita uban sa Dios, ang Amahan sa atong mga espiritu. Ang tanang mga tawo sa kalibutan tinuod nga mga igsoon sa samang Amahan sa Langit. Sa atong kinabuhi nga wala pa dinhi sa kalibutan, usa kita ka indibidwal nga dunay balaan nga kinaiya ug kapalaran. Gihatagan kitang tanan sa Dios sa gasa sa kabubut-on, o ang katungod sa pagpili alang sa atong mga kaugalingon, didto sa kinabuhi nga wala pa dinhi sa yuta o dinhi na sa kalibutan. Tungod kay Siya ang Amahan sa atong mga espiritu, gitawag nato Siya nga atong Langitnong Amahan.

Nganong Ania Kita Dinhi?

Ang kinabuhi sa kalibutan kabahin sa plano sa Dios alang sa atong mahangturong kalipay. Kana nga plano naglakip sa pag-angkon og pisikal nga lawas ug pagkat-on sa pagpili tali sa maayo ug dautan. Ang atong buhing propeta, si Presidente Thomas S. Monson miingon: Magpasalamat kita nga usa ka maalamon nga Tiglalang mibuhat sa kalibutan ug mihimo nato nga makalimot sa kanhi kinabuhi aron makasinati kita og panahon sa pagsulay, oportunidad sa pagmatuod sa atong kaugalingon, aron kita mokwalipay sa tanan nga giandam sa Dios nga atong dawaton. (“Ang Lumba sa Kinabuhi,” Liahona, Mayo 2012, 91).

Asa Kita Paingon human sa Atong Kinabuhi Dinhi?

Ang atong kinabuhi magpadayon human kita mamatay, apan ang atong umaabut nga mga kinabuhi nagdepende kon giunsa nato sa pagpakabuhi karon. Kon sundon nato ang ebanghelyo, ang grasya ni Ginoong Jesukristo makapahinulsol nato, mapasaylo, ug malimpyo sa atubangan sa Dios.

Sa Basahon ni Mormon atong makat-unan “nga ang mga espiritu sa tanan nga mga tawo, inig biya nila niining mortal nga lawas, … bisan sila maayo o dautan, dad-on sa panimalay ngadto niana nga Dios kinsa mihatag kanila sa kinabuhi.

“Ug unya mahinabo, nga ang mga espiritu niadto kinsa mga matarung pagadawaton ngadto sa kahimtang sa kalipay, diin gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa tanan nila nga mga kasamok ug tanan nga kabalaka ug kasubo” (Alma 40:11–12).

Kon atong gamiton ang Pag-ula, o ang sakripisyo, ni Jesukristo, maghinulsol sa atong mga sala, ug maningkamot sa pagpuyo sama sa Iyang pagpuyo, ang Iyang Pag-ula molimpyo nato ug makapahimo nato nga magpuyo sa kahangturan uban sa Langitnong Amahan.

Kadtong mopili sa dili pagsunod ni Kristo ug modawat sa Iyang ebanghelyo dili makadawat niadto nga mga panalangin (tan-awa sa Alma 40:13–14).

Unsa Ang Tahas ni Jesukristo?

Ang atong Langitnong Amahan mipadala sa Iyang Anak, nga si Jesukristo, nga mahimo natong Manluluwas ug sa pagpakita nato sa paagi sa pagpuyo sumala sa plano sa Dios. Ang pag-ula sa Manluluwas makahugas sa atong mga sala ug makapahimo natong takus sa pagbalik ngadto sa presensya sa Dios. Human sa Pagkalansang sa Manluluwas, ang Iyang lawas gipahimutang sa lubnganan sulod sa tulo ka adlaw hangtud mibalik ang Iyang espiritu. Isip resulta sa kadaugan ni Jesus sa lubnganan (tan-awa sa Mormon 7:5), mabanhaw kita human kita mamatay ug magpuyo sa kahangturan uban sa hingpit nga mga lawas.