Alang sa Kalig-on sa mga Kabatan-onan
Mga Suga … Kamera … Aksyon!
Kamo ang magbuot unsaon sa pagsulat ang eskrip alang sa inyong kinabuhi.
Nakadungog tingali kamo sa pulong “Usa ka entablado ang tibuok kalibutan” gikan sa inila nga dula ni William Shakespeare As You Like It. Ang ideya nga gipadayag sa karakter ni Shakespeare mao nga kitang tanan mga tigpasundayag nga nagdala sa papel sa dakong dula sa kinabuhi. Ang akong pangutana kaninyo karon mao, “Unsa ang inyong papel sa kinabuhi?” o di ba, “Unsay papel nga inyong gusto sa kinabuhi?”
Si Presidente David O. McKay (1873–1970) miingon, “Ang mga hunahuna mao ang mga binhi sa mga buhat, ug nag-una niini.”1 Apan unsay nakapahimo sa inyong mga hunahuna nga eskrip sa inyong utok? Nakahibalo tingali mo nga ang mga utok sama sa computer: mapagawas ra ninyo unsay inyong gisulod niini. Kon basura ra ang inyong ibutang niini, nan mao ra kana ang inyong makuha. Kinahanglang makaamgo mo nga ang tanan ninyong tan-awon, basahon, o paminawon makatabang sa pagsulat sa eskrip sa inyong kinabuhi.
Mga paghulagway pinaagi ni David Malan
Gamhanan nga mga Imahen ug mga Hunahuna
Tungod kay ang dakong bahin sa akong pagpanarbaho anaa sa advertising, daghan ko og kasinatian kon giunsa sa media paghimo og gamhanan nga mga imahen ug mga hunahuna diha sa mga utok sa mga tawo. Ang paghimo og importanting komersyal sa telebisyon mahimong sama gayud sa paghimo og sine sa Hollywood, gawas sa “pag-shooting” o paghimog salida sa kasagaran mahuman ra sulod sa pipila ka adlaw imbis mga bulan.
Human maggahin og dugayng panahon sa pagsiksik ug pagplano og kampanya sa media, manuhol ko og mga cinematographer gikan sa Hollywood, mga model gikan sa Italy, ug tighimo og musika gikan sa Siyudad sa New York. Dayon magsugod ang trabaho. Human sa grabeng iskedyul sa produksyon, among sugdan ang kampanya sa advertising pinaagi sa tanang matang sa media. Kulbahinam, makapaikag, ug makalingaw kadto nga trabaho.
Niini nga kasinatian makasulti ko ninyo nga ang mga advertisement nga inyong makita sa online, sa telebisyon, o sa mga magasin dili gayud tinuod. Ang mga imahen nga inyong nakita mga artistic nga binuhat, gituyo sa paghimo aron pagdani sa mga tawo sa pagpalit sa gi-advertise nga produkto. Mao kana ngano nga ako dili uyon nga mohimo og advertising sa mga produkto nga wala nako tuhoi. Kadaghanan sa mga tawo nakasabut niining mga kamatuoran bahin sa mga advertisement, apan ang sama nga kinatibuk-ang baruganan magamit alang sa mga sine, mga salida sa TV, web ug mobile ug mga dula nga electronic. gihimo kining tanan uban sa tinuyo nga mga mensahe ug mga tumong luyo niini.
Gamhanang Proteksyon
Tungod kay si Satanas mogamit sa media sa pagsulay sa pag-ilad nato sa pagsupak sa mga sugo sa Dios, kinahanglang sundon ninyo uban sa dili matarug nga determinasyon ang tambag nga gihatag sa Alang sa Kalig-on sa Kabatan-onan: “Maalamon nga mopili kon mogamit sa media, tungod kay kon unsay inyong mabasa, madungog, o makita adunay epekto nganha kaninyo. Pilia lamang ang media nga makapadasig kaninyo.”2
Hinumdumi nga sa pagkatinuod ania kamo niini nga kinabuhi aron sa pagpalambo og hugot nga pagtuo, aron sulayan, ug aron makat-on ug magmalipayon. Isip usa ka miyembro sa tinuod nga Simbahan ni Kristo, kamo adunay dakong gahum nga motabang kaninyo. Kamo adunay gahum sa Espiritu Santo sa pagpasidaan ninyo kon ang inyong giatubang dili eksakto. Kamo usab adunay gahum sa kabubut-on, mao nga kamo makapili unsay inyong buhaton o dili buhaton.
Kon kamo usahay dili maalamon ug panagsa mopili sa pagtan-aw o pagpaminaw sa sayop nga butang, desisyoni na karon ang paghimo og kausaban. Kon kadtong dili maayo nga mga pagpili nakapakunhod sa inyong abilidad sa pagbati sa Espiritu, luhod ug hangyoa ang Langitnong Amahan sa kalig-on ug kapasayloan. Ug kon naglisud gihapon kamo, pangayo og tabang sa inyong ginikanan o bishop. Mahimong mobati kamo og kaulaw o kahadlok sa pagpakigsulti nila, apan kana nagpasabut nga kinahanglan gyud ninyong buhaton. Uban sa kaisug ug pagpaubos mabuntog ninyo ang inyong mga hagit, ug kon inyong buhaton, inyong bation ang mahimayaong kalinaw ug kalipay sa paghinulsol.
Dili lang kamo aktor ug aktres sa entablado; kamo usa ka anak sa Dios sa kalibutan sa pagsulay nga puno sa maayo ug dautan nga media. Kon inyong pakan-on ang inyong espiritu sa eksakto nga butang, ang inyong papel sa kinabuhi mao ang kabahin sa kalipay, ug kamo mahimong kahayag nga modan-ag sa pagtabang ug paggiya sa uban. Adunay kangitngit kanunay sa atong palibut, apan adunay mahangturon ug mahayag nga dalan kanunay nga naggiya nato ngadto sa tinubdan sa tanang kaayo ug kahayag.