Ang Akong Seminary Teacher Bise usab Kaayo

Ni Maria Andaca, Metro Manila, Philippines

Sa Pilipinas, anaa ang mga science high school nga nag-focus pag-ayo sa mga akademic. Ang mga estudyante niini nga mga eskwelahan adunay daghang mga subject, mogahin og daghang oras sa klase, ug dunay daghang homework. Mao kini ang matang sa akong palibut sa batan-on pa ako.

Gibiyaan nako ang daghang mga kalihokan sa pagsulod na nako sa high school tungod kay nasayud ko nga magkinahanglan ko og daghang oras sa pagtuon. Hapit dili na ako makatambong sa mga kalihokan sa Simbahan ug usahay dili makasimba tungod sa mga kalihokan sa eskwelahan. Naglisud usab ako sa pagtambong sa seminary.

Usa ka Sabado niana ang akong seminary teacher misulti nako kon unsa siya ka bise kaniadto panahon sa iyang pagka-high school. Bisan pa sa iyang iskedyul, gipaningkamutan niya nga mohimo sa mga buluhaton sa seminary ug magtuon sa scripture mastery didto sa librarya. Nakahukom ko sa pagdawat sa iyang hagit sa pagbuhat sa ingon. Akong gidala ang mga kard sa scripture mastery sa tanang higayon ug moribyu niini kon wala koy buhaton. Nag-ampo ko alang sa panabang sa pagbalanse sa akong pagtuon sa seminary uban sa mga buluhaton sa eskwelahan. Akong memoryahon ang mga kasulatan samtang magsakay paingon sa eskwelahan. Akong tan-awon ang mga kard samtang makigsulti sa akong mga higala. Kon bakante ug tingpaniudto, ang akong mga higala malingaw sa pagtesting nako bahin sa mga mastery card. Ug dayon ang uban nila nagsugod sa pagdala sa ilang mga kasulatan ug maghisgot sa ilang mga kalihokan sa ilang mga simbahan. Akong gibati ang kausaban sa akong palibut, ug mas migaan ug mas nindot ang eskwelahan.

Ang akong tulo ka mga manghud nga babaye misunod nako, ug karon ang akong pamilya miani sa mga panalangin sa mga kasulatan sa among panimalay. Ang pagkat-on sa mga bersikulo sa akong scripture mastery usa ra ka yano nga buhat, apan mas importante sa gimemorya nga mga pulong, akong nakat-unan ang kalainan nga nahimo sa mga kasulatan kanako ug sa mga tawo sa akong palibut. Nasayud ko nga bisan unsa nga hagit o pagsulay nga atong atubangon, makita nato kanunay ang kalig-on ug giya diha sa mga pulong sa atong mahigugmaong Manluluwas.